Ekoloji terrorla hər gün mübarizə aparılmalıdır

Fevralın 4-də Ekologiya və Təbii Sərvətlər, Mədəniyyət və Turizm, Kənd Təsərrüfatı və Təhsil nazirliklərinin, bp, ARDNŞ şirkətlərinin, Prezident Yanında Qeyri-Hökumət Təşkilatlarına Dəstək Şurasının və Təhsil Şurasının nümayəndələrinin iştirakı ilə "Ekoloji patrul" layihəsi çərçivəsində 2008-ci il iyul-avqust aylarında başlanan "Ən yaxşı ekoloji foto əsəri" müsabiqəsinin yekunlarına həsr olunmuş toplantı keçirildi.

Tədbiri Azərbaycan Ekologiya Standartlarının Monitorinqi Fondunun prezidenti, professor Rauf Sultanov açaraq cəmiyyətimizdə hər zaman aktual olan ekoloji problemin bir an belə səngimədiyindən narahatlıqla danışdı: "Nə qədər mübarizə aparılsa da, bəzi vətəndaşlarımız maariflənmək istəmirlər. Bilmək istəmirlər ki, təbiət bizim nəfəs yolumuzdur, Xəzər bizim ən zəngin varidatımızdır. Ancaq biz də maarifləndirmə mübarizəmizdən əl çəkmirik. Fondumuz "Ekoloji patrul" layihəsi çərçivəsində 2008-ci ilin iyul-avqust aylarında "Ən yaxşı ekoloji rəsm əsəri" müsabiqəsi elan etmişdi. Müsabiqədə ən çox uşaqlar və gənclər iştirak ediblər. Bu olduqca sevindirici haldır. Deməli, gənclik təbiətə laqeyd deyil. Müsabiqəyə 50-dən çox fotolar təqdim olunmuşdur. Bunların çoxu yaxşı idi. Ən əsası ona görə ki, uşaqların duyumu var. Onlardan bir neçəsi mükafata layiq görülüb. Rəsmlərin birində 10-12 yaşlı bir məktəbli ağacın yanında dayanaraq etiraz əlaməti kimi qollarını qaldırıb ki, ağacı kəsməkdənsə məni kəsin.

Tədbirdə Xəzər dənizinin vəziyyəti ilə bağlı çıxış edənlər bu nadir qapalı su hövzəsinin çirklənməsinə diqqəti yönəltdilər. Çıxış edənlər bildirdilər ki, dənizin flora və faunası azalmışdır. Xəzərə axıdılan çirkab suların miqdarı Kür və Araz çaylarının illik su balansından 1,6 dəfə çoxdur. Bakı-Abşeron Arxipelaqı akvatoriyasının neftlə çirklənməsi bu gün də davam edir. Bu gün Xəzərin mühafizəsi məsələlərinin həll edilməsi gələcəkdə yarana bilən ekoloji böhranın qarşısını ala bilər və sonrakı nəsillər üçün rahat ekoloji mühit yaradar. Xəzərdə ekoloji vəziyyəti yaxşılaşdırmaq üçün mütəxəssislərimiz dünya alimləri, BMT-nin "Ekologiya" təşkilatları ilə daim sıx əlaqələr yaradır.

R.Rzalı

Azərbaycan.-2009.-5 fevral.-S.2.