"Yeni Azərbaycan" təşviqat qrupunun bölgə seminarları keçirilmişdir

 

Fevralın 9-da Azərbaycan Respublikasının Konstitusiyasına əlavələr və dəyişikliklərlə bağlı martın 18-nə təyin olunmuş ümumxalq səsverməsinə hazırlıqla əlaqədar "Yeni Azərbaycan" təşviqat qrupunun Dəvəçi, Siyəzən və Xızı rayonlarının nümayəndələri üçün Dəvəçi şəhərində, sonra Xaçmaz, Quba və Qusar rayonlarının nümayəndələri üçün Xaçmaz şəhərində seminarlar keçirilmişdir.

Seminarlarda Azərbaycan Konstitusiyasına əlavələr və dəyişikliklərlə bağlı "Yeni Azərbaycan" təşviqat qrupunun səlahiyyətli nümayəndəsi, YAP sədrinin müavini-icra katibi, Milli Məclisin deputatı Əli Əhmədov təşviqat qrupunun nümayəndələri qarşısında referendumun keçirilməsini zəruri edən şərtlər və ümumxalq müzakirəsinə təklif olunmuş əlavə və dəyişikliklərin mahiyyəti barəsində geniş nitq söyləmişdir. Natiq qeyd etmişdir ki, "Yeni Azərbaycan" təşviqat qrupu konstitusiyamıza təklif olunan əlavələr və dəyişikliklərin hər biri ilə bağlı geniş məlumat verməyi və maarifləndirmə işləri aparmağı qarşısına əsas məqsəd qoymuşdur.

Müşavirələrdə "Yeni Azərbaycan" təşviqat qrupunun səlahiyyətli nümayəndələrindən MM-in komissiya sədri Eldar İbrahimov, həmçinin parlamentin deputatları Tahir Süleymanov və Yevda Abramov iştirak etmişlər.

Martın 18-nə təyin olunmuş referendumla əlaqədar yaradılmış "Yeni Azərbaycan" təşviqat qrupu Qəbələ şəhərində seminar keçirmişdir.

Tədbirdə "Yeni Azərbaycan" təşviqat qrupunun Şəki, Qəbələ və Oğuz rayonlarındakı qərargahlarının üzvləri iştirak etmişlər.

180-nə yaxın nümayəndənin iştirak etdiyi seminarda "Yeni Azərbaycan" təşviqat qrupunun səlahiyyətli nümayəndəsi, Milli Məclisin deputatı, YAP icra katibinin müavini Mübariz Qurbanlı, "Yeni Azərbaycan" təşviqat qrupunun vəkili, Milli Məclisin deputatı Fəttah Heydərov Azərbaycan Respublikası Konstitusiyasına təklif edilən əlavələr və dəyişikliklərin mahiyyətini açıqlamışdır.

Təşviqat qrupunun Qəbələ rayon qərargahının rəhbəri, YAP rayon təşkilatının sədri Qüdrət Səmədov bildirmişdir ki, imzatoplama kampaniyasında tələb olunan sayda imza yığılaraq aidiyyəti üzrə təqdim edilmişdir. Bildirilmişdir ki, referendumun yüksək səviyyədə keçirilməsi, vətəndaşların səsvermədə mütəşəkkil qaydada iştirakı və seçki məntəqələrinin hazırlıq vəziyyətinə gətirilməsi üçün rayonun yaşayış məntəqələrində ardıcıl tədbirlər həyata keçirilməkdədir.

 

 

AzərTAc

 

Azərbaycan.-2009.-10 fevral.-S.4.