Rail Qurban oğlu
Rzayev
Azərbaycan Respublikasının Silahlı
Qüvvələrinə ağır
itki üz vermişdir. Azərbaycan Respublikası Müdafiə
Nazirliyi Hərbi Hava Qüvvələrinin və Hava Hücumundan
Müdafiə Qoşunlarının
komandanı - Azərbaycan
Respublikası müdafiə
nazirinin müavini,
general-leytenant Rail Qurban
oğlu Rzayev 2009-cu il fevral ayının
11-də ömrünün 64-cü ilində faciəli surətdə həlak olmuşdur.
Rail Rzayev
1945-ci il mart ayının 10-da Bakı şəhərində anadan
olmuşdur. O, 1962-ci ildə
Sumqayıt şəhərindəki
6 nömrəli orta məktəbi bitirdikdən
sonra SSRİ Hava Hücumundan Müdafiə
Qoşunlarının Orconikidze
radiotexnika məktəbində
təhsil almağa başlamışdır. Rail Rzayev
1966-cı ildə həmin
məktəbi bitirərək,
həqiqi hərbi xidmətini davam etdirmək üçün
Hava Hücumundan Müdafiə Qoşunlarının
Bakı Hərbi Dairəsinə göndərilmişdir.
O, burada baş texnik, daha sonralar
isə hərbi hissədə batareya komandirinin müavini və divizion komandirinin silahlanma üzrə müavini vəzifələrində xidmət
etmişdir.
1975-ci ildə
Rail Rzayev keçmiş
SSRİ-nin marşal Georgi Jukov adına Hava Hücumundan Müdafiə
Hərbi Akademiyasına
daxil olmuşdur. Akademiyanı
bitirdikdən sonra
"N" hərbi hissəsində
divizion komandiri vəzifəsində xidmət
göstərməyə başlamışdır.
O, 1980-1992-ci illərdə müxtəlif
hərbi hissələrdə
hərbi hissə komandirinin müavini, hərbi hissə komandiri vəzifələrini
tutmuşdur. Keçmiş sovet silahlı
qüvvələrində ştatların
ixtisarına görə
o, ordu sıralarından
ehtiyata buraxılmışdır.
1992-ci ildən etibarən Rail Rzayev Azərbaycan Respublikasının Silahlı
Qüvvələrində fəaliyyət
göstərməyə başlamışdır. O, Müdafiə
Nazirliyi Hərbi Hava Qüvvələrinin və Hava Hücumundan
Müdafiə Qoşunlarının
komandanı - idarə
rəisi vəzifəsinə
təyin olunmuşdur.
Rail Rzayev Azərbaycan
Respublikası Prezidentinin
sərəncamı ilə
1993-cü ildə Azərbaycan
Respublikası müdafiə
nazirinin müavini, Hərbi Hava Qüvvələrinin və
Hava Hücumundan Müdafiə Qoşunlarının
komandanı vəzifəsinə
təyin edilmiş və ömrünün sonunadək bu vəzifədə xidmət
etmişdir.
Rail Rzayev
1994-cü ildə general-mayor, 2002-ci ildə isə general-leytenant hərbi rütbələrini almışdır.
Tutduğu vəzifələrdən asılı olmayaraq, Rail Rzayev özünü daim səriştəli və bacarıqlı hərbçi, yüksək
peşəkarlığa və
təşkilatçılıq qabiliyyətinə malik təcrübəli komandir
kimi tanıtmışdır.
Müstəqil Azərbaycan Respublikasının
Hərbi Hava Qüvvələrinin və
Hava Hücumundan Müdafiə Qoşunlarının
yaradılması və
formalaşdırılmasında onun böyük əməyi olmuşdur.
Rail Rzayevin Vətən qarşısında xidmətləri
yüksək qiymətləndirilmişdir. O, bir sıra orden və medallara layiq görülmüş,
o cümlədən Azərbaycanın
müstəqilliyinin və
ərazi bütövlüyünün
qorunub saxlanılmasında
xüsusi xidmətlərinə
görə "Azərbaycan
Bayrağı" ordeni
ilə təltif edilmişdir.
General-leytenant
Rail Qurban oğlu Rzayevin əziz xatirəsi onu tanıyanların qəlbində
həmişə yaşayacaqdır.
Allah rəhmət
eləsin!
İlham Əliyev,
Artur Rasizadə,
Oqtay Əsədov,
Ramiz Mehdiyev,
Hacıbala Abutalıbov,
Səfər Əbiyev,
Ramil Usubov, Eldar Mahmudov,
Kəmaləddin Heydərov,
Elçin Quliyev,
Əliağa Hüseynov,
Nəcməddin Sadıkov,
Vahid Əliyev,
Çingiz Məmmədov,
Şahin Sultanov,
Yaqubəli Qulamov,
Dünyamalı Mürşüdov,
Aqil Hüseynov
Azərbaycan.-2009.-12 fevral.-S.4.