Milli Azərbaycan Tarixi Muzeyi ilə tanışlıq

Çexiya Respublikasının Baş naziri Mirek Topolanek və onu müşayiət edən nümayəndə heyəti Milli Azərbaycan Tarixi Muzeyində olmuşdur.

Qonağa məlumat verildi ki, 1920-ci ildə yaradılmış muzeydə qədim dövrdən başlayaraq Azərbaycan tarixinin bütün mərhələlərinə dair 300 mindən çox eksponat toplanmışdır. Azərbaycanın ərazisində mövcud olmuş Atropatena, Albaniya, Şirvanşahlar, Ağqoyunlular, Səfəvilər dövlətləri dövrünə aid maddi mədəniyyət nümunələri ölkəmizin qədim dövlətçilik ənənələrinin bariz nümunəsidir.

Orta əsr Azərbaycan əhalisinin məişətdə işlətdiyi əşyalar Cexiyanın Baş nazirində xüsusi maraq doğurdu. Hörmətli qonağa məlumat verildi ki, 150-dən çox işçinin çalışdığı muzey həm də Milli Elmlər Akademiyasının strukturunda elmi tədqiqat və mədəni-maarif müəssisəsi funksiyasını yerinə yetirir. Muzeyin yerləşdiyi, 1895-1897-ci illərdə tikilmiş və Bakının memarlıq abidələrindən sayılan bina isə Azərbaycan milyonçusu, məşhur xeyriyyəçi Hacı Zeynalabdin Tağıyevin mülkü olmuşdur.

Bina Azərbaycan Prezidenti İlham Əliyevin göstərişi ilə əsaslı təmir olunmuş və yeni görkəm almışdır.

Muzeylə tanışlıqdan xoş təəssürat alan Mirek Topolanek fəxri qonaqlar kitabına ürək sözlərini yazdı.

AzərTAc

Azərbaycan.-2009.-14 fevral.-S.2.