Dağlıq Qarabağ münaqişəsinin həllində dövlətlərin ərazi bütövlüyü və xalqların öz müqəddəratını təyinetmə prinsipləri eyni tutula bilməz

Azərbaycanda səfərdə olan ATƏT Parlament Assambleyası sədrinin Ermənistan-Azərbaycan, Dağlıq Qarabağ münaqişəsi üzrə xüsusi nümayəndəsi Qoran Lenmarker fevralın 13-də Milli Məclisin Sədri Oqtay Əsədov ilə görüşmüşdür.

Milli Məclisin Sədri ötən ilin avqustunda Cənubi Qafqazda baş vermiş hadisələrdən sonra Avropanın, nüfuzlu beynəlxalq təşkilatların bölgəyə diqqətinin artmasını və bu cür səfərlərin əhəmiyyətini yüksək qiymətləndirmişdir. O.Əsədov demişdir ki, münaqişələrin həllinin yubanması təkcə Cənubi Qafqazın deyil, Avropanın da təhlükəsizliyinə təhdiddir. Ona görə də bu cür münaqişələr tez bir zamanda həllini tapmalıdır.

O.Əsədov demişdir ki, bəzi hallarda dövlətlərin ərazi bütövlüyü və xalqların öz müqəddəratını təyinetmə məsələsi eyni tutulur. Dağlıq Qarabağ münaqişəsi ilə bağlı məsələdə bu iki prinsip heç vaxt bir yerdə ola bilməz. Dağlıq Qarabağda yaşayan millətlərin müqəddəratı yalnız Azərbaycanın ərazi bütövlüyü çərçivəsində mümkündür.

Milli Məclisin Sədri Azərbaycanın Avropaya inteqrasiya etdiyini, Dağlıq Qarabağ münaqişəsinin tezliklə həllinin bu prosesi daha da sürətləndirəcəyini diqqətə çatdırmışdır.

Qoran Lenmarker yenidən Azərbaycanda olmasından məmnunluq duyduğunu bildirmiş və demişdir ki, Azərbaycanın iqtisadi inkişafı ölkə həyatının bütün sahələrində hiss olunur. ATƏT rəsmisi bildirmişdir ki, 2008-ci ilin avqustunda Cənubi Qafqazda baş vermiş hadisələrdən sonra bu bölgəyə diqqət artmışdır. Bu, mövcud problemlərin həllinə müsbət təsir edəcəkdir.

Görüşdə qarşılıqlı maraq doğuran məsələlər ətrafında fikir mübadiləsi aparılmışdır.

Azərbaycan.-2009.-14 fevral.-S.3.