Niderland Azərbaycanın ərazi bütövlüyünü və suverenliyini birmənalı dəstəkləyir

Görüşdə Azərbaycan ilə Niderland arasında əməkdaşlığın cari vəziyyəti müzakirə olunmuş, əlaqələrin daha da inkişafı üçün xarici işlər nazirlikləri arasında mütəmadi siyasi məsləhətləşmələrin aparılması, qarşılıqlı səfərlərin daha da intensivləşdirilməsi, iş adamlarının, mədəniyyət nümayəndələrinin təcrübə mübadiləsinin və digər sahələrdə əlaqələrin genişləndirilməsinin məqsədəmüvafiqliyi vurğulanmışdır.

Niderland diplomatı Cənubi Qafqaz bölgəsində gedən proseslərə toxunaraq regionda sabitliyin bərqərar olunması, bunun üçün Avropa İttifaqının "Şərq tərəfdaşlığı" təşəbbüsünün həyata keçirilməsinin vacibliyi və ölkəsinin bu proqramı tam dəstəklədiyini demişdir.

Nazir E.Məmmədyarov Ermənistan-Azərbaycan, Dağlıq Qarabağ münaqişəsi barədə ətraflı məlumat vermiş, problemin yalnız Azərbaycanın ərazi bütövlüyü prinsipi, sərhədlərinin toxunulmazlığı çərçivəsində həllinin mümkünlüyünü qonağın diqqətinə çatdırmışdır.

Piter de Hayer Niderland hökumətinin Azərbaycanın ərazi bütövlüyünü və suverenliyini birmənalı dəstəklədiyini vurğulamışdır.

Görüşdə həmçinin regional məsələlər və qarşılıqlı maraq doğuran digər məsələlər müzakirə olunmuşdur.

AzərTAc

Azərbaycan.-2009.-14 fevral.-S.3.