Bakıda "Dövlət gənclər siyasətinin həyata keçirilməsi: hazırkı vəziyyət və proqnozlar" mövzusunda seminar işə başlamışdır

Fevralın 19-da Gənclər və İdman Nazirliyinin təşkilatçılığı ilə "Dövlət gənclər siyasətinin həyata keçirilməsi: hazırkı vəziyyət və proqnozlar" mövzusunda seminar işə başlamışdır.

Gənclər və idman nazirinin müavini İntiqam Babayev bildirmişdir ki, müasir Azərbaycan gəncləri həm ölkə daxilində, həm də beynəlxalq aləmdə bütün sahələrdə fəal iştirak edirlər. Dövlətin gənclərə göstərdiyi diqqət və qayğı artıq öz bəhrəsini verir. Vurğulamışdır ki, tədbirin məqsədi rayon (şəhər) gənclər və idman idarələrinin dövlətimizin gənclər və idman siyasətinin həyata keçirilməsi sahəsində fəal iştirakını təmin etməkdir.

Azərbaycan Prezidentinin İcra Aparatının ictimai-siyasi məsələlər şöbəsinin müdiri Əli Həsənov bildirmişdir ki, seminarda müasir gənclərin mövcud vəziyyəti təhlil edilərək, bu istiqamətdə qarşıda duran vəzifələr müəyyənləşdiriləcəkdir. Eyni zamanda, bu tədbir mövcud problemləri, perspektivləri, müxtəlif əhəmiyyətli mövzuları müzakirə etmək, bilik və təcrübə mübadiləsi aparmaq baxımından çox əhəmiyyətlidir.

Ə.Həsənov vurğulamışdır ki, seminarda interaktiv və mühazirə üsullarından istifadə etməklə dövlət gənclər siyasətinin həyata keçirilməsində yerli gənclər və idman idarələrinin vəzifələri və rolu, bu istiqamətdə yerli səviyyədə strateji və operativ planlaşdırma, həmçinin digər mövzular üzrə nəzəri və praktiki məşğələlər keçiriləcəkdir.

Sonra qapalı keçən seminar fevralın 23-dək davam edəcəkdir.

AzərTAc

Azərbaycan.-2009.-20 fevral.-S.4.