Milli Təhlükəsizlik Nazirliyinin maddi-texniki bazasının möhkəmləndirilməsi xidmətin yüksək səviyyədə qurulmasının rəhnidir

Azərbaycan Respublikasının Milli Təhlükəsizlik Nazirliyinin əməkdaşları hər il olduğu kimi, martın 28-də öz peşə bayramları gününü qeyd etməyə hazırlaşırlar. Lakin bu il qeyd olunacaq bayram xüsusilə onunla əlamətdardır ki, həmin tarixdə Azərbaycanın təhlükəsizlik orqanlarının yaradılmasının 90 illik yubileyi tamam olur. Vətənin, xalqın və dövlətin müstəqilliyi və təhlükəsizliyi keşiyində ayıq-sayıq dayanan Milli Təhlükəsizlik Nazirliyinin əməkdaşları ümummilli lider Heydər Əliyevin qurucusu olduğu müasir Azərbaycan Respublikasını hər cür təhdidlərdən qoruyur, düşmən və rəqib qüvvələrin ölkəmizə qarşı yönələn kəşfiyyat-pozuculuq və terror-təxribat cəhdlərinin qarşısını peşəkarlıqla alırlar.

Xüsusi xidmət orqanlarında milli kadrların yetişdirilməsinə xüsusi əhəmiyyət verən ulu öndər Heydər Əliyev bu təşkilatın şəxsi heyətinin xidmət və sosial-məişət şəraitinin yaxşılaşdırılması sahəsində hələ 1960-cı illərin sonlarından etibarən tədbirlər görülməsinə çalışmışdır. İstər təhlükəsizlik orqanının sədri kimi, istərsə də Azərbaycana rəhbərlik etdiyi dövrdə ümummilli lider bu məsələləri daim diqqət mərkəzində saxlamış, qayğısını əsirgəməmişdir. Ötən əsrin 70-ci illərinin əvvəllərində təhlükəsizlik orqanlarında çalışan əməkdaşlar üçün rahat, geniş və müasir tələblərə cavab verən yeni inzibati binanın layihələşdirilməsi məsələsi xüsusi aktuallıq kəsb edirdi. Lakin mərkəzi hakimiyyət bu haqda heç fikirləşmirdi də. Bunu arxiv sənədləri də təsdiq edir. Məhz ümummilli lider Heydər Əliyevin təşəbbüsü və təkidi ilə bu məsələ öz müsbət həllini tapmışdır. Onun Azərbaycanın layihə institutlarının mütəxəssisləri qarşısında qoyduğu tələblərə uyğun olaraq texniki və kompozisiya quruluşuna görə fərqlənəcək layihəyə təkrar-təkrar qayıdılmış, nəticədə 1973-cü ildə 89 eskiz variantı işlənmişdir.

Ulu öndər bütün təklifləri diqqətlə öyrənərək yüksək peşəkarlıq və memar yanaşması ilə layihə barədə faydalı və dəyərli məsləhətlərini vermiş, yalnız bundan sonra yeni inzibati binanın inşasına başlanmışdır. O zaman bu mühüm işə tanınmış memarlar cəlb edilmişdi. İnzibati binanın layihə müəlliflərindən biri, respublikanın əməkdar memarı, akademik Yusif Qədimov idi. Daim ulu öndərin diqqət və nəzarətində olan bu binanın tikinti-inşaat işləri 1987-ci ildə sona çatmış və istifadəyə verilmişdir. Göstərilən faktlar ulu öndərin xalqın gələcəyinə, müstəqil Azərbaycanın bugünkü inkişafına hesablanmış işlər gördüyünü bir daha sübut edir. Heç təsadüfi deyil ki, 1997-ci ilin iyul ayında ulu öndər Heydər Əliyev Milli Təhlükəsizlik Nazirliyinə gəlişi zamanı, şəxsi heyətlə görüşündə memarlıq baxımından özünəməxsusluğu ilə fərqlənən inzibati binanı özünün "əsərlərindən" biri adlandırmışdı. Ulu öndər

Milli Təhlükəsizlik Nazirliyinin inzibati binasının tikintisi ilə əlaqədar deyirdi: "Bəli, bu böyük memarlıq abidəsidir, Bakı şəhərini gözəlləşdirən binadır və Azərbaycan xalqına bundan sonra əsrlər boyu xidmət edəcəkdir. Bəli, mən bu binanın tikilməsinin təşəbbüskarıyam və buna bilavasitə rəhbərlik etmişəm. Hələ Dövlət Təhlükəsizlik Komitəsinin sədri olarkən belə bir binanın tikilməsi təklifini irəli sürmüşdüm. Çünki dəniz kənarında yerləşən bina köhnə bir bina idi. Yeni bir binanın tikilməsi təklifini irəli sürmüşdüm, amma o vaxt bunu edə bilmirdim, çünki vəsait, başqa şeylər lazım idi. Respublikaya rəhbər keçəndən sonra bu binanın tikilməsi, eyni zamanda Prezident Sarayı adlanan binanın tikilməsi məsələsini ortaya atdım. Məqsədimə də nail oldum. İndi gəlmişəm, girmişəm bu binaya - yer mərmər, divarlar mərmər, bina elə gözəldir, böyük, monumental bir binadır, memarlıq abidəsidir, əsrlər boyu yaşayacaqdır. Bu mənim xidmətimdir, mən bununla fəxr edirəm".

Yeri gəlmişkən, nazirliyin inzibati binasında son təmir-bərpa işləri də məhz Yusif Qədimovun rəyi əsasında aparılmışdır. Hazırda Milli Təhlükəsizlik Nazirliyinin inzibati binasının yeni korpusunun tikintisində də tarixi ənənələrin qorunması və davam etdirilməsi xəttini tutaraq bu işin ulu öndərin təhlükəsizlik orqanlarında qoyduğu zəngin irsə layiq olmasına çalışırıq.

Ümummilli lider Heydər Əliyev 1969-1982-ci illərdə ölkəyə rəhbərlik etdiyi və Azərbaycan xalqının israrlı tələbi ilə 1993-cü ildə ikinci dəfə hakimiyyətə qayıdışı zamanı bütün sahələrə olduğu kimi təhlükəsizlik orqanlarına da xüsusi diqqət və qayğı göstərirdi. Ölkəmiz müstəqilliyini bərpa etdikdən sonra bir neçə dəfə Milli Təhlükəsizlik Nazirliyində şəxsi heyətlə görüşən ulu öndər özünün tarixi çıxışları zamanı digər məsələlərlə yanaşı, maddi-texniki təminat işlərinin görülməsinə də xüsusi əhəmiyyət vermiş, müdrik tövsiyələrini çatdırmışdır. Zəmanəmizin görkəmli dövlət xadiminin həmin nitq və çıxışlarında səslənən fikir, qarşıya qoyulan proqram xarakterli vəzifələr təhlükəsizlik orqanlarında xidmət edən hər bir əməkdaş üçün bu gün də, sabah da aktualdır. Ulu öndərin dəyərli məsləhətləri və tövsiyələri nazirliyin onun adını daşıyan akademiyasının hər bir yetirməsinin yaddaşında, qəlbindədir.

Fəxrlə qeyd etmək lazımdır ki, bu gün təməlini ulu öndərin qoyduğu gələcəyə hesablanmış uğurlu siyasət kursu Azərbaycan Respublikasının Prezidenti, Ali Baş Komandan cənab İlham Əliyev tərəfindən yeni səviyyəyə qaldırılmaqla davam etdirilir və ölkə ictimaiyyəti tərəfindən rəğbətlə qarşılanır. Bu taleyüklü və son dərəcə məsuliyyətli missiyanın layiqincə yerinə yetirilməsində digər dövlət orqanları kimi Milli Təhlükəsizlik Nazirliyi də yaxından iştirak edir. Onu da vurğulamaq istərdim ki, xüsusilə 2004-cü ilin iyul ayından sonra nazirliyin fəaliyyətinin yeni tələblər səviyyəsinə qaldırılması istiqamətindəki ardıcıl və məqsədyönlü tədbirlər nəticəsində ölkədə sabitliyin, təhlükəsizliyin hərtərəfli təminatında, milli maraqların qorunmasında daha böyük nailiyyətlər qazanılmışdır. Bu dövrdə nazirliyin yeni rəhbərliyi tərəfindən bütün struktur bölmələrin fəaliyyətinin və imkanlarının diqqətlə araşdırılıb öyrənilməsi, iş metod və üsullarının müasir tələblərə uyğun təkmilləşdirilməsi, əsaslı struktur dəyişiklikləri və köklü islahatların aparılması öz müsbət nəticələrini vermişdir. Müvafiq kompleks tədbirlər planının hazırlanması və həyata keçirilməsi ilə yanaşı, nazirlikdə sağlam işgüzar mühitin formalaşması, kadrların düzgün seçilib yerləşdirilməsi, xidmətin daha da yüksək səviyyədə təşkili, əməkdaşlar üçün normal iş və yaşayış şəraitinin yaradılması, ümumən sosial müdafiənin gücləndirilməsi də uğur qazanılmasında başlıca amillərdən olmuşdur.

Ötən bir neçə ildə Milli Təhlükəsizlik Nazirliyinin maddi-texniki bazasının möhkəmləndirilməsi istiqamətində görülmüş tədbirlərdən danışarkən bir cəhəti xüsusi vurğulamaq lazımdır ki, müvafiq struktur bölmələrin yaxından iştirakı ilə həyata keçirilən bu işlər hər bir əməkdaşın normal fəaliyyəti üçün lazımi şəraitin yaradılmasına xidmət etmişdir. Milli Təhlükəsizlik Nazirliyində qeyd edilən istiqamətdə ciddi dönüşün təməli isə təsərrüfat və maddi-texniki təminat işlərinin həcminin artması, qarşıda duran vəzifələrin daha çevik və ahəngdar yerinə yetirilməsi zərurəti ilə əlaqədar bu sahəyə cavabdeh struktur bölmənin təkmilləşdirilməsi və möhkəmləndirilməsi ilə qoyulmuşdur.

Milli təhlükəsizlik orqanlarının maddi-texniki bazasının inkişafı sahəsində son illərin ən mühüm və uğurlu cəhətlərindən biri görülən tədbirlərin həcm və ardıcıllıq baxımından əvvəlki dövrdən müsbət mənada xeyli fərqlənməsi, müasir zamanın tələbləri ilə uyğunlaşdırılmasıdır. Milli təhlükəsizlik naziri general-leytenant cənab Eldar Mahmudovun təhlükəsizlik orqanları əməkdaşlarının ötənilki peşə bayramında qeyd etdiyi kimi: "bütün ölkədə, eləcə də nazirliyimizdə tikinti-quruculuq işlərinin vüsəti xeyli artmış, texniki təchizat sahəsində vəziyyətin köklü surətdə dəyişdirilməsinə başlanmışdır. Bu işlər yalnız mərkəzi orqanlarda deyil, hətta ən ucqar bölgələrdə yerləşən struktur bölmələrdə də uğurla aparılır. Əlbəttə, bu istiqamətdə ölkə başçısı möhtərəm İlham Əliyevin nazirliyimizə göstərdiyi diqqət və qayğı xüsusi əhəmiyyət kəsb etmişdir. Həmin qayğının təzahürü olan müvafiq Dövlət Proqramının icrasına lazımi şəraitin yaradılmasının nəticəsidir ki, nazirliyimizdə bütün sahələrdə inkişafa nail olunmuşdur".

Bu baxımdan, ərazi orqanları üçün təkcə son iki il ərzində 7 müasir tipli xidməti binanın tikilib istifadəyə verilməsi, inşaat-quruculuq və təmir-bərpa işləri ilə yanaşı, vaxtılə Milli Təhlükəsizlik Nazirliyinin balansından çıxarılmış binaların nazirliyə qaytarılması, avtoparkın yeniləşməsi və digər işləri qeyd etmək olar.

Hazırda Milli Təhlükəsizlik Nazirliyi rəhbərliyinin göstərişi ilə həm Bakı şəhərində, həm də respublikanın bölgələrində fəaliyyət göstərən strukturların iş, sosial və məişət şəraitinin yaxşılaşdırılması məqsədi ilə tikinti işləri davam etdirilir. 2007-ci ildə Milli Təhlükəsizlik Nazirliyinin yeni Hərbi Hospitalının, bir neçə yerli ərazi orqanı və müvafiq baş idarəsi üçün nəzərdə tutulan inzibati binaların təməli qoyulmuşdur. Bütün bu işlərin yaxın vaxtlarda başa çatdırılması nəzərdə tutulur.

Milli Təhlükəsizlik Nazirliyinin balansına verilmiş keçmiş Şəhriyar adına mədəniyyət evinin yaxınlarda müasir tələblər səviyyəsində, yüksək zövqlə təmir və bərpa olunması isə Azərbaycanın təhlükəsizlik orqanlarının yaradılmasının 90 illik yubileyinə töhfədir və bizə öz təntənəli tədbirlərimizi orada qeyd etməyə imkan verəcəkdir.

Ölkənin təhlükəsizliyinin təmin olunmasında peşəkar, vətənə, dövlətə, xalqa sadiq kadrların hazırlanmasını daim diqqət mərkəzində saxlayan Milli Təhlükəsizlik Nazirliyinin rəhbərliyi gənclərin təhsil və məişət şəraitinin günün tələbləri səviyyəsində qurulması istiqamətində ardıcıl tədbirlər görür. Bu sahədə əsas rol oynayan Milli Təhlükəsizlik Nazirliyinin Heydər Əliyev adına Akademiyasının inzibati binası əsaslı təmir olunmuş, hərtərəfli şəraitə malik yeni tədris, idman və yataqxana kompleksi, zabit-kursant yeməkxanaları inşa edilmişdir. Bir sözlə, ulu öndərin adını daşıyan bu xüsusi təhsil ocağının maddi-texniki bazasının möhkəmləndirilməsi sahəsində həyata keçirilən kompleks tədbirlər nəticəsində akademiya elm şəhərciyinə çevrilmiş, onun siması fəaliyyətə başladığı ilk illərlə müqayisə edilməz dərəcədə dəyişmişdir. Əlbəttə, bütün bunlar dövlət başçısının birbaşa diqqəti və gündəlik qayğısı sayəsində mümkün olmuşdur. Ümumiyyətlə, son illər Milli Təhlükəsizlik Nazirliyində baş verən digər ciddi dəyişikliklərlə yanaşı, maddi-texniki bazanın möhkəmləndirilməsi, iş və sosial şəraitin yaxşılaşdırılması, ən müasir texniki vasitələrlə təminat və digər məsələlər də əslində ölkə başçısının göstərdiyi xüsusi qayğının nəticəsidir.

Milli Təhlükəsizlik Nazirliyinin Heydər Əliyev adına Akademiyasında istər şəxsi heyətin, kursantların və dinləyicilərin, istərsə də gələn qonaqların, elm adamlarının daim ehtiramla baş çəkdiyi, hamımız üçün əziz olan bir ocağın yaradılması da xüsusi qeyd edilə bilər. Artıq üçüncü ildir ki, burada ümummilli lider Heydər Əliyevlə bağlı zəngin və nadir eksponatların toplandığı "Şöhrət" muzeyi fəaliyyət göstərir. Milli Təhlükəsizlik Nazirliyi əməkdaşlarının peşə bayramı ərəfəsində - 2006-cı il mart ayının 27-də bu möhtəşəm məbədin açılışında iştirak edən Azərbaycan Respublikasının Prezidenti cənab İlham Əliyev ölkədə bənzəri olmayan "Şöhrət" muzeyini, ümumən təhsil ocağında görülmüş işləri yüksək qiymətləndirmiş, akademiyaya Döyüş bayrağını təqdim etmişdir. Möhtərəm dövlət başçısının: "Burada işlər yüksək səviyyədə qurulub, akademiya ən yüksək dünya standartlarına cavab verir" - deməsi həmin işlərin görülməsində iştirak etmiş hər bir kəsin əməyinə verilən böyük qiymət və bizim daha əzmkarlıqla çalışmağımız üçün stimul olmuşdur. Həmin tədbirin təəssüratı istər akademiya kollektivinin, istərsə də milli təhlükəsizlik orqanlarının şəxsi heyətinin yaddaşında daim qalacaqdır.

Milli Təhlükəsizlik Nazirliyinin xidməti fəaliyyətinin səmərəli və müasir tələblər səviyyəsində təşkili məqsədilə xüsusi texniki vasitələrin alınmasını da qeyd etmək istərdim. Artıq xidməti işin təşkilində istifadə olunan həmin müasir texnologiyalar nazirliyin fəaliyyətinin yeni keyfiyyət səviyyəsinə yüksəlməsinə əlavə imkanlar yaradır.

Həmçinin qeyd etmək lazımdır ki, xüsusilə son dörd ildə əməkdaşların sosial-məişət problemlərinin həlli istiqamətində çox mühüm dəyişikliklər baş vermişdir. Göstərilən müddətdə nazirliyin 200-dən çox əməkdaşının mənzil şəraiti yaxşılaşdırılmış, 300 nəfərdən artıq şəxs isə fərdi mənzil tikintisi üçün torpaq sahəsi ilə təmin edilmişdir. Onların arasında xidməti fəaliyyətlərində önəmli nəticələri olan hərbi qulluqçular, şəhid ailələri, Qarabağ müharibəsi iştirakçıları, sıravi əməkdaşlar vardır. Milli təhlükəsizlik naziri cənab Eldar Mahmudov daim qeyd və tövsiyə edir ki, səmərəli fəaliyyətlə bağlı əməkdaşın qarşısında tələblər qoymaqdan öncə, onun üçün normal iş şəraiti yaradılmalı, mümkün qədər məişət və digər sosial problemlərinin həllinə diqqət yetirilməlidir.

Bu gün bizim qarşımızda duran vəzifələrin miqyası da, səviyyəsi də fərqlidir. Ölkənin dinamik inkişafı, beynəlxalq münasibətlər sistemində yerinin və rolunun artması nazirliyin bütün fəaliyyət istiqamətlərində, o cümlədən maddi-texniki təminat sahəsində işlərin yeni keyfiyyət səviyyəsinə qaldırılmasını tələb edir. Milli Təhlükəsizlik Nazirliyində bu gün də inamla davam etdirilən dəyişikliklər, qarşıya qoyulan vəzifələrin məsuliyyətinin dərindən dərk edilməsi xidməti işə öz müsbət təsirini göstərməkdədir. Bu baxımdan, rəhbərliyin maddi-texniki bazanın daha da möhkəmləndirilməsi istiqamətindəki tapşırıq və tövsiyələrini biz gələcək əməli fəaliyyətimizin əsası kimi qəbul edirik.

90 illik yubileyini qeyd etməyə hazırlaşan Milli Təhlükəsizlik Nazirliyi ölkəmizi, dövlətimizi rəqib və düşmən dövlətlərin hər cür terror-təxribat, kəşfiyyat-pozuculuq cəhdlərindən qoruyur, milli maraqların təmin olunmasında bütün qüvvə və imkanlarını səfərbər edir. Milli təhlükəsizlik orqanlarının digər struktur bölmələrinin əməkdaşları kimi biz də üzərimizə düşən vəzifələrin məsuliyyətini dərindən dərk edir, bu bayram ərəfəsində rəhbərliyin bütün tapşırıqlarının öhdəsindən layiqincə gəlməyə, ölkənin tərəqqisində daha yaxından və səylə iştirak etməyə çalışırıq.

"Mən çox sevinirəm ki, Milli Təhlükəsizlik Nazirliyi qarşısında duran bütün vəzifələri ləyaqətlə icra edir" - deyən möhtərəm Prezident, Ali Baş Komandan İlham Əliyevin etimadını doğrultmaq, xalqa və dövlətçiliyə xidmət etmək bizim şərəf və vəzifə borcumuzdur.

Nizaməddin Həmidov

Baş İdarə rəisi, polkovnik

Azərbaycan.-2009.-20 fevral.-S.5.