Azərbaycan Milli Kitabxanasında "Qədim Bakı" kitabının təqdimatı olmuşdur

Fevralın 19-da M.F.Axundov adına Azərbaycan Milli Kitabxanasında "Bakı - İslam mədəniyyətinin paytaxtı-2009" Mədəniyyət ili çərçivəsində akademik Çingiz Qacarın "Qədim Bakı" (ingilis dilində) kitabının təqdimatı olmuşdur.

Tədbirdə mədəniyyət və turizm naziri Əbülfəs Qarayev Bakının artıq ikinci gündür ki, çox şərəfli olan islam mədəniyyəti paytaxtı adını daşıdığını bildirmiş, təqdimatı keçirilən kitabın da Bakının adı ilə bağlı olduğunu söyləmişdir. Azərbaycan barədə məlumatların gələcək nəsillərə çatdırılmasında kitabların, müxtəlif nəşrlərin əhəmiyyətini diqqətə çatdıran Ə.Qarayev, ölkənin, eləcə də paytaxt Bakının tarixi haqqında yazılmış hər bir kitabın misilsiz rol oynadığını söyləmişdir.

Əbülfəs Qarayev tanınmış alim, akademik Çingiz Qacarın Bakının qədim tarixinə həsr olunmuş kitabı ilə daha çox oxucu kütləsinin tanışlığı üçün bu fundamental əsərin Azərbaycan Mədəniyyətinin Dostları Fondunun iştirakı ilə nazirlik tərəfindən ingilis dilinə tərcümə olunaraq nəşr etdirildiyini diqqətə çatdırmışdır. Nazir kitabı oxuyan hər kəs üçün Bakının tarixinin, şəhərin daxili aləminin, onun yeni xüsusiyyətlərinin maraqlı olacağına əminliyini bildirmiş və "Qədim Bakı" kitabının nüsxəsini İslam Ölkələri Elm, Təhsil və Mədəniyyət Təşkilatının (İSESKO) Baş direktoru Əbdüləziz bin Osman əl-Tüveycriyə təqdim etmişdir.

Əbdüləziz bin Osman əl-Tüveycri Bakının islam mədəniyyətinin paytaxtı elan edilməsinə həsr olunmuş tədbirlərdə iştirak etdiyindən məmnunluğunu, mədəniyyət ili çərçivəsində Bakının tarixinə həsr olunmuş kitabın təqdimatı mərasiminə dəvətə görə təşəkkürünü bildirmişdir. Baş direktor kitabın intellektin və biliyin mənbəyi olduğunu qeyd etmiş, islam dünyasının Azərbaycanda yaşayıb-yaratmış görkəmli alimlərini, filosoflarını xatırlatmışdır.

Azərbaycan Mədəniyyətinin Dostları Fondunun icraçı direktoru İbrahim Quliyev Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın rəhbərliyi ilə qurumun ölkə mədəniyyətinin, incəsənətinin inkişafı üçün xeyli işlər gördüyünü bildirmişdir. İ.Quliyev 1998-ci ildən məhz Mehriban xanım Əliyevanın təşəbbüsü ilə üç dildə "Azərbaycan-İrs" jurnalının nəşr edildiyini və dünyanın bir çox ölkələrində yayılaraq Azərbaycanın tarixi, incəsənəti, mədəniyyəti haqqında dəqiq məlumatları oxuculara çatdırdığını vurğulamışdır. Fondun fəaliyyətində Azərbaycan həqiqətlərinə, tarixinə, mədəniyyətinə və digər mövzulara həsr olunmuş nəşrlərin xarici dillərdə çap olunmasının mühüm istiqamət olduğunu söyləyən icraçı direktor, qurumun bu vacib işi gələcəkdə də diqqət mərkəzində saxlayacağını bildirmişdir.

Gürcüstan mədəniyyət, abidələrin mühafizəsi və idman nazirinin müavini xanım Marine Çoğoşvili, Avstriyanın Təhsil, İncəsənət və Mədəniyyət üzrə Federal Nazirliyi beynəlxalq əlaqələr şöbəsinin müdiri Norbert Ridr, ABŞ-ın Bakı ilə qardaşlaşmış Hyüston şəhərinin şura üzvü Çarlz Conson çıxış etmiş, İslam mədəniyyəti ili çərçivəsində Bakıda keçirilən tədbirlərdə iştirak etmələrindən razılıqlarını bildirmiş, belə mərasimlərin xalqlar arasında əlaqələrin, dostluq münasibətlərinin yaranmasında və daha da genişlənməsində mühüm rolundan danışmışlar.

Sonda akademik Çingiz Qacarın həyat yoldaşı Aliyə xanım "Qədim Bakı" kitabının yazılması tarixinin bəzi məqamlarından danışmış, tədbirin təşkilatçılarına və iştirakçılara minnətdarlığını bildirmişdir.

Milli Kitabxanada təşkil edilmiş "Azərbaycanın tacı - Qarabağ", "Azərbaycanda turizm" və digər mövzularda kitab stendləri qonaqların böyük marağına səbəb olmuşdur.

Tədbirdə milli geyimli ansamblın ifasında Azərbaycan musiqisi səslənmişdir.

AzərTAc

Azərbaycan.-2009.-20 fevral.-S.8.