Ötən il Ağdaşda ümumi daxili məhsul istehsalı 24,5 faiz artmışdır

Ağdaşda 2008-ci ilin sosial-iqtisadi yekunlarına və 2009-cu ildə qarşıda duran vəzifələrə həsr olunmuş hesabat yığıncağı keçirilmişdir. Yığıncaqda rayon icra hakimiyyətinin başçısı Rafiq Niftəliyev hesabat məruzəsi ilə çıxış etmişdir. Bildirmişdir ki, 2008-ci ildə rayonda ümumi daxili məhsul istehsalı 24,5, sənaye məhsulları istehsalı 18, pərakəndə əmtəə dövriyyəsi 80,1, əhalinin gəlirləri 46,5, adambaşına düşən gəlirlər 44,6, orta aylıq əməkhaqqı isə 72,9 faiz artmışdır. Ötən il Ağdaşda 2447 yeni iş yeri açılmışdır ki, bunun da 817-si daimidir.

Əhalinin elektrik enerjisi ilə təminatının yaxşılaşdırılması məqsədilə 2008-ci ildə rayonda 23,3 km uzunluğunda müxtəlif gücdə elektrik verilişi xətləri çəkilmiş, 13 yeni transformator qoyulmuş və 55 elektrik transformatoru təmir olunmuşdur. Bununla belə, məruzəçi onu da qeyd etmişdir kt, mövcud elektrik avadanlıqlarının müəyyən qisminin istismar müddətini başa vurması əhalinin elektrik enerjisi ilə təminatında fasilələrin yaranmasına, ötürülən enerjinin keyfiyyətinin standartdan aşağı olmasına gətirib çıxarır. Paylayıcı Elektrik Şəbəkəsi sadalanan problemləri aradan qaldırmaq üçün zəruri tədbirlər görməli, sayğaclara müdaxilə və qanunsuz qidalanma hallarına qarşı mübarizəni gücləndirməlidir. Keçən il təbii qaz verilişi bərpa olunan yaşayış məntəqələrinin sayı 27-yə çatdırılmışdır. Hazırda bu iş davam etdirilir.

2008-ci ildə rayonda təmir-tikinti və quruculuq-abadlıq işləri geniş vüsət almış, rayon ərazisində 26,7 milyon manatlıq tikinti işləri görülmüşdür. Bu sıradan şəhid ailələri və Qarabağ əlilləri üçün 48 mənzilli yaşayış evinin, Dövlət Sosial Müdafiə Fondunun rayon şöbəsinin yeni inzibati binasının və 9 saylı Ərazi Vergilər İdarəsinin yeni xidmət terminalının istifadəyə verilməsini göstərmək olar. Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın təşəbbüsü ilə rayonda inşa olunan uşaq musiqi məktəbinin tikintisində isə tamamlama işləri aparılır. Bunlardan əlavə, ötən il Ərəb kəndində həkim ambulatoriyası, Ləki qəsəbəsində poçt binası tikilmiş, həmçinin rayonun Orta Ləki, Kükəl, Ərəb kəndlərinin kəndarası yolları, Əmirarx-Güvəkənd-Ləki qəsəbəsi yolu asfaltlaşdırılmış, Eymur, Ərəbşəki, Ağcaqovaq və Şordəhnə kəndlərinin daxili yolları əsaslı təmir olunmuş, bütün kənddaxili yollara çınqıl döşənmişdir. Eyni zamanda, Yuxarı Nemətabad kəndində sutəmizləyici qurğu quraşdırılmış, Xosrov və Pirəzə kəndlərində artezian quyuları qazılmışdır.

Yeri gəlmişkən qeyd edək ki, 2008-ci il aprel ayının 17-də Ağdaş şəhərinin su-kanalizasiya sisteminin yenidən qurulması layihəsinin təqdimat mərasimi keçirilmiş, layihə çərçivəsində 3 artezian quyusu qazılmış, idarə və anbar binalarının tikintisinə başlanmışdır.

Ağdaş respublikanın aqrar rayonlarından olduğu üçün burada kənd təsərrüfatı məhsulları istehsalının artırılması ön plana çəkilmiş, 2008-ci ildə kənd təsərrüfatı məhsulları istehsalından 97,6 milyon manat gəlir əldə edilmişdir. Keçən il rayon üzrə 43,3 min ton taxıl istehsal olunmuş, qara malın sayı 72,1 min, davarların sayı isə 87,4 min başa çatdırılmışdır. 2008-ci ildə bostançılıq və meyvəçilik də sürətlə inkişaf etmiş, 19,1 min ton meyvə, 10 min tona yaxın kartof, 21,2 min ton bostan məhsulları istehsal olunmuşdur.

Məruzədən o da məlum oldu ki, son beş il ərzində Ağdaşda 664 yerlik orta məktəb binaları və 520 yerlik əlavə sinif otaqları inşa edilmiş, bir sıra məktəb binaları əsaslı və cari təmir olunmuşdur. Hazırda Yuxarı Ləki və Qaradeyin kəndlərində yeni məktəb binaları tikilir. İnşa edilən Olimpiya İdman Kompleksinin tikintisi isə başa çatmaq üzrədir.

Telman Nəzərli

Azərbaycan.-2009.-21 fevral.-S.4.