Bakıda "Azərbaycan Respublikası regionlarının sosial-iqtisadi inkişafı Dövlət Proqramının

(2004-2008-ci illər)" icrasının yekunlarına həsr olunmuş konfrans keçirilmişdir

Ağcabədi Rayon İcra Hakimiyyətinin başçısı Şahin Məmmədovun çıxışı

- Möhtərəm cənab Prezident!

- Hörmətli konfrans iştirakçıları!

Qürur hissi ilə bu yüksək kürsüdən Sizə hesabat verirəm ki, ölkənin ahəngdar inkişafını təmin etmiş regionların sosial-iqtisadi inkişafı Dövlət Proqramında Ağcabədi rayonu üzrə nəzərdə tutulmuş bütün tədbirlər böyük müvəffəqiyyətlə yerinə yetirilmişdir. Ağcabədi rayonu indi yeni inkişaf dövrünə qədəm qoymuş, öz simasını dəyişərək abad bir diyara çevrilmişdir.

Cənab Prezident, bütün qarabağlılar, o cümlədən ağcabədililər daim Sizin qayğınızı hiss edir, cəbhə bölgəsində yerləşməsinə baxmayaraq yaşayır, qurur, yaradırlar. Həyata keçirilən sosial-iqtisadi islahatlar ağcabədililərin həyatında, onların maddi rifah halının yaxşılaşdırılmasında mühüm rol oynamışdır. Məhz bunun nəticəsində son 5 ildə ümumi məhsul buraxılışı 2,8 dəfə, kənd təsərrüfatı məhsullarının istehsalı 1,7 dəfə, orta aylıq əməkhaqqı 5 dəfədən çox artmışdır. Bu dövrdə 3 mindən artıq sahibkarlıq subyekti fəaliyyətə başlamış, 11 mindən çox yeni iş yeri açılmışdır ki, onların da yarısından çoxu daimi iş yerləridir.

Respublikamızda sahibkarlığa yaradılmış münbit şəraitin nəticəsi olaraq rayonumuzda sutkalıq gücü 40 ton olan pambıq emalı, beton məmulatı zavodları, "Hindarx" nar şirəsi istehsalı sexi tikilib istifadəyə verilmişdir. Hər birində 150 nəfərin işləyəcəyi 2 süd emalı zavodunda, 200 nəfərin yeni iş yeri ilə təmin ediləcəyi "Cahidoğlu" Məhdud Məsuliyyətli Müəssisəsində isə tikinti-quraşdırma işləri davam etdirilir.

Rayon iqtisadiyyatının əsasını təşkil edən kənd təsərrüfatının inkişafı məqsədi ilə ən ağrılı problemin - suvarma suyu probleminin həlli istiqamətində əsaslı tədbirlər həyata keçirilmişdir. 1300 kilometr suvarma, 431 kilometr drenaj kanalı lildən təmizlənmiş, 700 hektar sahənin suvarılmasını təmin edən 7,6 kilometrlik Hindarx kanalı bərpa edilərək istifadəyə verilmiş, kənd təsərrüfatı məhsulları istehsalçılarının əkin suyuna olan tələbatının ödənilməsi üçün 152 ədəd subartezian quyusu qazılıb işə salınmışdır. 8 min hektar sahənin suvarılmasını təmin edəcək 19 kilometrlik Xanqızı kanalının bərpası isə cari ilin aprel ayında yekunlaşacaqdır. Əhalinin içməli suya olan tələbatının ödənilməsi məqsədi ilə Yuxarı Qarabağ kanalından rayon mərkəzinə 7,2 kilometr məsafədən içməli su xətti çəkilmiş, 3 sutəmizləyici qurğu quraşdırılmış, 34 ədəd içməli su artezian quyusu istifadəyə verilmişdir.

Cənab Prezident, Sizin Ağcabədiyə səfərinizdən dərhal sonra ayırdığınız vəsait hesabına 70 ildən yuxarı məskunlaşma tarixi, 11 min nəfərdən çox əhalisi olan Kəbirli, Mehrablı, Qaradolaq, Yeni Qaradolaq və Aran kəndlərinin içməli suya olan tələbatı ilə əlaqədar problem artıq öz həllini tapmışdır. Sizin tapşırığınızla hazırda Ağcabədi şəhərinin içməli su təchizatı şəbəkəsinin yenidən qurulması və kanalizasiya çəkilişi layihəsi üzərində qızğın iş gedir.

Son 5 ildə rayonda abadlıq və quruculuq işləri geniş vüsət almış, tikinti-quraşdırma işlərinin həcmi 19,2 dəfə artmışdır. Heydər Əliyev adına park, şəhərin küçə və yolları yenidən qurulmuş, çoxmənzilli yaşayış binalarının dam örtükləri və fasadları əsaslı təmir edilmiş, 5 yeni inzibati bina tikilib istifadəyə verilmişdir. Vaxtilə yararsız binalarda yerləşən rabitə müəssisələrindən 21-i üçün yeni binalar tikilmiş, rayonumuzda ən ucqar kəndlərdə belə əhaliyə nümunəvi rabitə xidməti göstərilməsi təmin edilmişdir. Tapşırığınızla 350 yerlik rayon mədəniyyət evi ən müasir tələblər səviyyəsində əsaslı təmir edilmişdir.

Heydər Əliyev Fondunun təşəbbüsü ilə yenidən qurulmuş Üzeyir Hacıbəyli adına mədəniyyət və istirahət parkında Qarabağ Muğam Mərkəzinin, gənclər evinin, ahıllar istirahət klubunun inşa edilməsi nəinki ağcabədililərin, bütün Qarabağ camaatının böyük sevincinə səbəb olmuşdur.

Cənab Prezident, artıq Ağcabədi və 6 qonşu rayondan olan 70 gənc və yeniyetmə bu mərkəzdə muğamın sirlərinə yiyələnirlər.

Son 5 ildə rayonda sosial sahədə də nəzərəçarpacaq dərəcədə işlər görülmüşdür. Sizin diqqət və qayğınız nəticəsində Ağcabədidə ümumi şagird yeri 7 minə çatan 25 orta ümumtəhsil məktəb binası tikilmiş, 10 məktəb binası əsaslı təmir edilmişdir. 10 yeni səhiyyə obyekti istifadəyə verilmiş, Ağcabədi rayon uşaq xəstəxanası, rayon poliklinikası, doğum evi, 5 həkim ambulatoriyası, 8 feldşer-mama məntəqəsi əsaslı təmir edilmişdir. Bu işlərin də əksəriyyəti Heydər Əliyev Fondunun təşəbbüsü və dəstəyi ilə həyata keçirilmişdir.

İcazə verin, respublikamızda təhsilin, səhiyyənin, mədəniyyətin, o cümlədən muğam sənətinin, milli mənəvi dəyərlərimizin qorunub saxlanması və inkişaf etdirilməsində misilsiz xidmətləri olan Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya bütün ağcabədililərin dərin minnətdarlığını çatdırım.

Möhtərəm cənab Prezident!

Siz keçən ilin soyuq yanvar günlərində Qarabağın dilbər guşələrindən olan Ağcabədiyə səfər etdiniz. Ağcabədililər həmin günü böyük qürur hissi və minnətdarlıqla xatırlayırlar. Həmin gün Sizin iştirakınızla ulu öndər Heydər Əliyevin möhtəşəm abidəsinin və Heydər Əliyev muzeyinin açılışı oldu. Sizin və Heydər Əliyev Fondunun prezidenti Mehriban xanım Əliyevanın 24 mənzilli binanın açılışında iştirak etməyiniz, həmin binada yeni mənzillə təmin olunmuş şəhid ailələri və Qarabağ müharibəsi əlillərinə orderlərin və fərdi hədiyyələrin təqdim edilməsi nəinki onların, bütün ağcabədililərin qəlbində silinməz iz buraxmışdır. Bu əlamətdar hadisədən 9 ay sonra daha 16 şəhid ailəsi və Qarabağ müharibəsi əlili yeni mənzillərlə təmin olunmuşdur.

Rayonumuza səfəriniz zamanı uzun illər təbii qaz yanacağından məhrum olan Ağcabədiyə qaz nəqlinin ilk məşəlini alovlandırmaqla Siz bizim həm ocağımıza, həm də qəlbimizə hərarət bəxş etdiniz. Məhz Sizin qayğınız nəticəsində 2008-ci ildə 5500 evə qaz verilişi bərpa edilmişdir. Bu ildən isə Sizin tapşırığınızla kəndlərimizə qaz nəqlinin bərpasına başlanacaqdır.

Möhtərəm cənab Prezident, bu gün Sizə hesabat verirəm ki, vətəndaşların istək və arzularının yerinə yetirilməsi onların müraciətlərinin məzmununu da dəyişmişdir. İnsanlar artıq əmək şəraitinin yaxşılaşdırılması, əməkhaqqının artırılması, bir sözlə, həyat keyfiyyətinin yüksəldilməsi ilə əlaqədar suallarla daha çox müraciət edirlər. İnsanlarımızın Sizə, Sizin simanızda xoşbəxt gələcəklərinə inamının nəticəsi olaraq son 5 ildə rayon üzrə 98 min kvadratmetr fərdi mənzil sahəsi tikilib istifadəyə verilmişdir ki, indi ağcabədili ailəsinin hər bir üzvünə 15,5 kvadratmetr mənzil sahəsi düşür. Rayon mərkəzində 7 mərtəbəli 120 mənzilli binanın tikintisi isə Ağcabədinin tikinti sektoru üçün cəlbedici bölgəyə çevrildiyindən xəbər verir. Əhalinin maddi rifahının yüksəlməsi nəticəsində fərdi minik avtomobillərinin sayı son 5 ildə 2 min ədəd artaraq 8 mini keçmişdir.

Möhtərəm cənab Prezident!

Siz daim çalışırsınız ki, cəbhə bölgəsində yaşayan soydaşlarımız yurd-yuvalarında özlərini iqtisadi cəhətdən təminatlı, sosial cəhətdən müdafiə olunmuş hiss etsinlər. Biz əminik ki, işğalda olan torpaqlarımız Sizin rəhbərliyiniz altında geri qaytarılacaqdır.

Möhtərəm Prezident, cənab Ali Baş Komandan, biz qarabağlılar Sizə inanır, Sizinlə fəxr edir, Sizə əzəmətli bir dağ kimi güvənirik və hər an istənilən əmrinizi yerinə yetirməyə hazır olduğumuzu bildiririk.

Diqqətinizə görə sağ olun.

Azərbaycan.-2009.-24 fevral.-S.3.