Bakıda "Azərbaycan Respublikası regionlarının sosial-iqtisadi inkişafı Dövlət Proqramının

(2004-2008-ci illər)" icrasının yekunlarına həsr olunmuş konfrans keçirilmişdir

"Biləsuvar AQRO" süd emalı zavodunun direktoru Tahir Sadıqovun çıxışı

- Möhtərəm cənab Prezident!

- Hörmətli müşavirə iştirakçıları!

Müstəqil ölkəmiz ulu öndərimiz Heydər Əliyevin yolu ilə inamla gedərək Azərbaycan Respublikasının Prezidenti cənab İlham Əliyevin müdrik rəhbərliyi ilə son 5 ildə çox böyük uğurlara imza atmışdır. Azərbaycanımız çox sürətli sosial-iqtisadi inkişaf yoluna qədəm qoymuşdur. Qlobal maliyyə böhranına baxmayaraq, ölkəmizin bir nömrəli islahatçı ölkə kimi tanınması, ümumi daxili məhsulun (ÜDM) artımına görə lider dövlətlər arasında birinci olması hamımızın qəlbini böyük iftixar hissi ilə doldurur. Ölkə rəhbərliyi tərəfindən qeyri-neft sektorunun, eləcə də regionların inkişafı ilə bağlı həyata keçirdiyi tədbirlər, qəbul olunmuş və həyata keçirilmiş proqramlar öz bəhrəsini verməkdədir.

Dövlət Proqramının tərkib hissəsi kimi "Biləsuvar AQRO" süd zavodu artıq fəaliyyətə başlamışdır. Dəyəri 8 milyon manat olan süd zavodunun tikinti-quraşdırma işləri 2008-ci ilin sentyabrında tamamlanmış və Azərbaycan Prezidenti cənab İlham Əliyevin 2008-ci il oktyabr ayının 7-də Biləsuvar rayonuna səfəri zamanı bilavasitə xeyir-duası ilə açılmışdır. Zavodda quraşdırılmış avadanlıq Avropa ölkələrindən alınmış ən müasir texnikadır. Zavodumuzun tikintisinə sərf olunmuş 8 milyon manat vəsaitin bir qisminin Sahibkarlığa Kömək Milli Fondundan alınmış güzəştli kreditdən ibarət olması biz sahibkarlara dövlət qayğısının parlaq nümunəsidir.

Bildirmək istəyirəm ki, regionda analoqu olmayan müəssisəmizin gün ərzində emal gücü 200 tondur. Zavodumuz tam gücü ilə işlədikdən sonra ölkəmizin daxili süd məhsullarına tələbatını bütünlüklə ödəyəcək, eyni zamanda, quru süd kimi mühüm məhsulu ixrac edə biləcəkdir.

Biz fəaliyyətə başladıqdan sonra həm Biləsuvarda, həm də ətraf rayonlarda əsas fəaliyyətləri kənd təsərrüfatı və heyvandarlıqla bağlı olan insanlar "Biləsuvar AQRO" süd zavodunun işə başlamasını ölkə rəhbərliyinin, şəxsən cənab Prezidentin aqrar sektora, kənd təsərrüfatı ilə məşğul olanlara çox yüksək diqqət və qayğısı kimi qiymətləndirir, böyük razılıq və minnətdarlıq hisslərini çatdırırlar.

Hörmətli müşavirə iştirakçıları, Azərbaycan Prezidenti İlham Əliyev Biləsuvara səfəri zamanı "Biləsuvar AQRO" süd zavodunun respublikamız üçün əhəmiyyətini yüksək qiymətləndirərək qeyd etmişdir ki, Azərbaycanda ilk dəfə quru süd istehsal edən zavod tikilibdir və bu zavod Azərbaycanın bütün tələbatını təmin edəcək, eyni zamanda, çox böyük ixrac potensialına da malikdir.

Möhtərəm cənab Prezident, icazə verin çıxışımın sonunda bildirim ki, həm xarici, həm də daxili investorların Azərbaycan iqtisadiyyatına həvəslə və çəkinmədən sərmayə qoyması və səmərəli fəaliyyət göstərməsi Sizin müdrik siyasətinizin nəticəsidir. Sizi əmin etmək istəyirəm ki, biz sahibkarlar Azərbaycanımızın sosial-iqtisadi inkişafı, xalqımızın xoşbəxt və firavan həyatının təmin edilməsi ilə bağlı iqtisadi siyasətinizin həyata keçirilməsində daim Sizin yaxın köməkçiniz olacağıq.

Diqqətinizə görə təşəkkür edirəm.

Azərbaycan.-2009.-24 fevral.-S.3.