Bakıda "Azərbaycan Respublikası regionlarının sosial-iqtisadi inkişafı Dövlət Proqramının

(2004-2008-ci illər)" icrasının yekunlarına həsr olunmuş konfrans keçirilmişdir

Sabirabad Rayon İcra Hakimiyyətinin başçısı Heydər Abbasovun çıxışı

- Möhtərəm cənab Prezident!

- Hörmətli konfrans iştirakçıları!

Sizə iftixarla hesabat veririk ki, regionların sosial-iqtisadi inkişafı Dövlət Proqramında Sabirabad rayonu üzrə nəzərdə tutulmuş bütün tədbirlər müvəffəqiyyətlə yerinə yetirilmiş, rayonumuz keyfiyyətcə yeni inkişaf mərhələsinə qədəm qoymuşdur.

Böyük qürur hissi ilə bildirmək istəyirəm ki, Sabirabad rayonunun inkişafı ümummilli liderimiz Heydər Əliyevin adı ilə bağlıdır. Ulu öndərimiz Azərbaycana rəhbərliyi dövründə 14 dəfə Sabirabadda olmuş, hər gəlişi ilə rayonun sosial-iqtisadi və mədəni inkişafına böyük töhfələr vermişdir. Ümummilli liderimizin ölkəmizə rəhbərlik etdiyi illərdə rayonumuz kənd təsərrüfatında misilsiz nəticələr əldə etmiş, çoxsaylı emal müəssisələri yaradılmışdır. Nəticədə həmin vaxtlar Sabirabad rayonu kənd təsərrüfatı məhsullarının istehsalı sahəsində nəinki respublikada, hətta keçmiş Sovetlər İttifaqında tanınmış bir məkana çevrilmişdi.

Zati-aliləri, XXI əsrdə Sabirabadın dirçəlişi və inkişafı isə məhz Sizin möhtəşəm, uğurlu siyasətinizlə bağlıdır. Sizin ölkədə həyata keçirdiyiniz islahatlar Sabirabadın da simasını dəyişmiş, rayonun iqtisadi inkişafına yeni nəfəs vermişdir. Ölkədə sahibkarlığa göstərdiyiniz qayğı və diqqət, iş adamlarına yaratdığınız əlverişli münbit şərait özəl sektorun inkişafına güclü təkan vermiş, nəticədə rayonumuz kənd təsərrüfatı rayonundan aqrar-sənaye rayonuna çevrilmişdir.

Son iki ildə sovetlər dövründən qalmış Sabirabad konserv zavodu yenidən qurulmuş, onun nəzdində ən müasir avadanlıqla təchiz edilmiş, ümumi gücü ildə 20 milyon şərti banka olan yeni istehsal sahələri yaradılmışdır. Sahibkarlar artıq kəndlərə də investisiya yönəltməyə başlamışlar. Kürkəndi kəndində ildə müxtəlif çeşiddə 5 milyon şərti banka şirə hazırlayan zavod istifadəyə verilmişdir. Önəmli haldır ki, vaxtilə rayonda emal olunan kənd təsərrüfatı məhsulları ancaq MDB məkanına çıxarılırdısa, indi bu məhsullar Almaniya, ABŞ, Kanada və Türkiyədə alıcıların rəğbətini qazanmışdır.

Möhtərəm cənab Prezident!

Bu gün ölkəmiz tikinti meydanını xatırladır. Gündən-günə tikinti materiallarına artan tələbat rayonumuzda da bu sahə üzrə yeni istehsal müəssisələrinin yaradılmasına təkan vermişdir. Uzun illər fəaliyyətsiz qalmış mexaniki təmir zavodunun bazasında 2008-ci ildə müasir avadanlıqla təchiz edilmiş alüminium kompozit panelləri istehsal edən zavod yaradılmışdır. Sutkada 4500-5000 kvadratmetr məhsul istehsal etmək gücündə olan müəssisənin məhsullarına sifarişçilərin sayı get-gedə artır. Məlumat verim ki, artıq zavodun məhsulları daxili tələbatı ödəməklə yanaşı, bir çox xarici ölkələrə də ixrac olunur.

Möhtərəm cənab Prezident!

2008-ci il sentyabrın 26-da Siz rayonumuza səfəriniz çərçivəsində sərnişin və yük liftləri istehsal edən zavodun fəaliyyəti ilə tanış oldunuz. Ötən müddətdə zavod 300 ədəd lift hazırlayaraq sifarişçilərə çatdırmışdır. Cari ilin əvvəlindən isə bu müəssisə artıq Gürcüstana və Qazaxıstana məhsul göndərməyə başlamışdır. Əgər sifarişlər bu cür davam edərsə, zavod 2009-cu ildə 5 min sərnişin və yük liftləri hazırlaya bilər.

Ötən il tikinti məhsulları istehsal edən, buraxılış gücü sutkada 500 ton olan "Muğan Sement" zavodunda yüksək keyfiyyətli sement istehsalına başlanılmışdır. Burada istehsal olunan müxtəlif növ sement bütün ətraf rayonların tələbatını tam ödəmək iqtidarındadır. Rayonda 2008-ci ildə işə düşmüş yumşaq tara fabrikində ildə 20 milyon ədəd müxtəlif növ kisə istehsal olunur. Bu müəssisənin özəlliyi ondadır ki, burada çalışanların əksəriyyətini qadınlar təşkil edir. Son iki ildə yaradılmış 10 istehsal müəssisəsində ümumilikdə 1200 nəfərdən artıq işçi qüvvəsi çalışır ki, onların da orta aylıq əməkhaqqı 280 manatdır.

Cari ildə həmin müəssisələrdə 120-130 milyon manatlıq sənaye məhsulunun istehsalı nəzərdə tutulmuşdur ki, bu da 2003-cü illə müqayisədə ən azı 20 dəfə çoxdur. Bu müəssisələrin istehsal gücü proqnozlaşdırılan səviyyəyə qaldırılarsa, burada çalışan işçilərin maaşlarının hətta 400-500 manata çatdırılması mümkün olacaqdır.

Sizin sahibkarlara yaratdığınız əlverişli şəraitin nəticəsidir ki, əgər 2003-cü ildə sənaye istehsalının həcmi ümumi daxili məhsulun cəmi 4,7 faizini təşkil edirdisə, 2008-ci ildə yeni sənaye müəssisələrinin işə düşməsi ilə bu rəqəm 27 faizədək yüksəlmişdir. Ancaq bu sahədə bütün potensiallardan tam istifadə olunmamışdır. Hesab edirik ki, 2009-cu ildə bu rəqəm 60-70 faizə çatacaq, Sabirabad rayonunun tarixində ilk dəfə sənaye məhsullarının həcmi rayonun ümumi məhsul buraxılışının əsasını təşkil edəcəkdir.

Möhtərəm cənab Prezident!

Sənayenin sıçrayışla inkişafı rayonda yeni peşə və ixtisaslara olan tələbatı ortaya çıxarmış, peşə hazırlığı məsələlərinə diqqətin artırılması zərurətini yaratmışdır. Bunun üçün biz Sabirabad şəhərindəki texniki peşə məktəbində müxtəlif peşələr üzrə hazırlıq kursları təşkil etmişik.

Rayonda sənayenin sürətli inkişafı, yeni iş yerlərinin açılması gənclərin rayonda qalmaları üçün əsaslı zəmin yaratmışdır. Bütün bunların sayəsində ölkəmizdən xaricə iş dalınca gedən gənclərimiz geri qayıtmağa başlamışlar. Təkcə son iki ildə geri dönənlərin sayı 850-ni keçmişdir.

Göstərilənlər isə öz növbəsində, xidmət sahələrinin də inkişafına təkan vermişdir. Xidmətlərin ümumi çəkisinin artması ilə yanaşı, onların çeşidi və keyfiyyəti də əhəmiyyətli dərəcədə yüksəlmişdir. Təkcə bir rəqəmi diqqətinizə çatdırmaq istəyirəm ki, əhalinin xidmət sahələri üzrə aylıq xərcləri 2003-cü illə müqayisədə 3,4 dəfə artmışdır.

Gənclərin asudə vaxtlarının təşkili və sağlam həyat tərzi üçün rayonda hər cür şəraitin yaradılması bu günün ən aktual məsələlərindəndir. Sizin təməlini qoyduğunuz və 2008-ci ildə açılışını etdiyiniz Olimpiya-İdman Kompleksi sabirabadlı gənclərə böyük hədiyyə olmuşdur. Xeyir-duanızla ötən il istifadəyə verilmiş Gənclər Mərkəzi də gənclərin sevimli istirahət yerinə çevrilmiş, burada marketinq və menecment, xarici dil, dizayn və arxitektura, stilist kursları təşkil edilmiş, elektron kitabxana, dərnəklər, klublar fəaliyyətə başlamışdır.

Möhtərəm cənab Prezident!

Sizin bilavasitə rəhbərliyiniz və tapşırığınız əsasında rayonda abadlıq və quruculuq işləri geniş vüsət almış, nəticədə Sabirabad şəhərinin siması tamamilə dəyişmişdir. Burada yeni parklar və xiyabanlar salınır, müasir işıqlandırma sistemi quraşdırılır, küçələr və yollar abadlaşdırılır.

Möhtərəm cənab Prezident!

Siz Sabirabadda olarkən "Sabirabad yeni inkişaf dövrünü yaşayır" demişdiniz. Bu inkişaf bütün ölkədə olduğu kimi, Sabirabadda da Sizin adınızla bağlıdır. Əmin ola bilərsiniz ki, biz sabirabadlılar həmişə olduğu kimi, Sizin ölkəmizdə həyata keçirdiyiniz möhtəşəm quruculuq işlərində yaxından iştirak edəcək, böyük diqqət və qayğınıza əməli işimizlə cavab verəcək, müstəqil Azərbaycanımızın inkişafı naminə üzərimizə düşən bütün vəzifələri layiqincə yerinə yetirəcəyik.

Diqqətinizə görə çox sağ olun.

Azərbaycan.-2009.-24 fevral.-S.3-4.