Məhkəmə fəaliyyətinin təkmilləşdirilməsi üzrə tədbirlər davam etdirilir

Fevralın 24-də Fikrət Məmmədovun sədrliyi ilə Məhkəmə-Hüquq Şurasının növbəti iclası keçirilmişdir. İclasda ədalət mühakiməsinin səmərəliliyinin artırılması üzrə son vaxtlar görülmüş işlər vurğulanmış, ölkəmizin Prezidenti İlham Əliyevin Sərəncamı ilə təsdiq olunmuş "Azərbaycan ədliyyəsinin inkişafına dair 2009-2013-cü illər üçün Dövlət Proqramı"nda məhkəmə fəaliyyətinə dair tədbirlərin icrasının təşkili ilə bağlı məsələ müzakirə edilmişdir.

Şura üzvləri çıxış edərək Dövlət Proqramının qəbul edilməsinin məhkəmə fəaliyyətinin təkmilləşdirilməsinə böyük diqqət və qayğının təzahürü olduğunu bildirmiş, dövlətimizin başçısına dərin minnətdarlıqlarını ifadə etmiş, proqramın məhkəmə fəaliyyətinin müasirləşdirilməsinə və inkişafına, bu sahədə tədbirlərin daha mütəşəkkil həyata keçirilməsinə xidmət edəcəyi vurğulanmışdır.

Həmçinin iclasda hakimlərin mükafatlandırılması, iş yerlərinin dəyişdirilməsi ilə bağlı məsələlərə baxılmış, hakimliyə namizədlərin seçilməsi prosesinin vəziyyəti ilə bağlı Hakimlərin Seçki Komitəsinin məlumatı dinlənilmişdir.

Hakimlər barədə başlanılmış intizam icraatlarına baxılaraq fəaliyyətində yol verdikləri ciddi qanun pozuntuları və digər nöqsanlara görə Astara Rayon Məhkəməsinin sədri Elnur Cəbiyevin vəzifəsinin dəyişdirilməsi, Xızı Rayon Məhkəməsinin hakimi İsmiyar İsmayıllıya töhmət verilməsi barədə qərarlar qəbul edilmişdir.

Eyni zamanda qanunvericiliyin tələblərinin pozulması ilə bağlı 2 hakim barədə intizam icraatları başlanılmışdır.

AzərTAc

Azərbaycan.-2009.-25 fevral.-S.4.