Uğurlu siyasətin nəticəsidir ki, ölkəmizdə istehsal sahələri genişlənir

Son beş ildə, xüsusilə ötən il ölkəmizdə yeni istehsal sahələrinin yaradılması istiqamətində çox böyük işlər görülmüşdür. İstər paytaxt Bakıda, istərsə də bölgələrdə günün tələblərinə cavab verən müəssisələr, zavod, fabrik tikilib, firma və şirkətlər açılıb, həm dövlət investisiyaları, həm də özəl sektorun fəaliyyəti nəticəsində nəhəng infrastruktur layihələri icra olunub, iqtisadiyyatımız 2,6 dəfə artıb. Soydaşlarımızın sosial həyat şəraiti nəzərəçarpacaq dərəcədə yaxşılaşıb. Son beş ildə açılan 766 min yeni iş yerinin 548 mini daimidir. Respublikamızın hərtərəfli inkişafı, hər bir bölgədə əhalinin sosial rifahında müsbət dinamikanın təmin olunması, uğurlu sosial proqramların icrası xalqın Prezidentə inam və etibarını daha da artırmışdır. Ötən il oktyabrın 15-də ölkə rəhbəri cənab İlham Əliyevin prezident seskilərində məhz xalqın çox böyük dəstəyi ilə qələbə qazanması bu reallığın və inamın təzahürüdür.

"Azərbaycan Respublikası regionlarının sosial-iqtisadi inkişafına dair Dövlət Proqramı"na uyğun olaraq Naxçıvan Muxtar Respublikasının Cülfa və Şahbuz rayonlarında, Sumqayıt, Gəncə, Mingəçevir, Şirvan, Lənkəran şəhərlərində və digər yerlərdə dövlət və qeyri-dövlət sektoruna aid obyektlərin açılışında Azərbaycan Prezidenti İlham Əliyev iştirak etmişdir. Yəqin ki, mingəçevirlilər ötən il dövlət başçısının iştirakı ilə konveyer üsulu ilə kompüter istehsal edən "Kür" elektron avadanlıqları zavodunun açılışını, gəncəlilər Novruz bayramı ərəfəsində Gəncə polad kompleksinin və Det-al alüminium zavodunun təməlqoyma mərasimini, lənkəranlılar Lənkəran beynəlxalq hava limanının, "Cənub TV" televiziya kanalının yeni binasının istifadəyə verilməsini, Saatlı camaatı biyan məhsulları istehsalı zavodunun istifadəyə verilməsi mərasimini, kürdəmirlilər "Qelios" Məhdud Məsuliyyətli Cəmiyyətinin şərab, şirə istehsalı kombinatının açılışını, ağstafalılar "Akkord" Şirkətlər Qrupunun rayon mərkəzindəki tikiş fabrikinin, balakənlilər rayon mərkəzinə çəkilmiş su xəttinin, mərkəzi rayon elektron kitabxanasının, yeni avtovağzal binasının, ticarət mərkəzinin, yem istehsalı zavodunun açılışını uzun müddət xatırlayacaqlar. Ölkə Prezidentinin iştirakı ilə keçirilən mərasimlərə dair misalların sayını artırmaq da olar. Dediyimiz odur ki, belə sürətli sosial-iqtisadi inkişaf, uğurlu iqtisadi layihələr, insanlara göstərilən ardıcıl diqqət və qayğı, işsizliyin aradan qaldırılması yeni iş yerlərinin açılması sayəsində mümkün olub. Sevindirici haldır ki, ölkəmizdə yeni obyektlərin və iş yerlərinin sayı yenə də artmaqdadır.

Yanvarın 16-da Azərbaycan Prezidenti İlham Əliyevin sədrliyi ilə Nazirlər Kabinetinin 2008-ci ildə sosial-iqtisadi inkişafın yekunlarına həsr olunmuş iclasında ölkə Prezidenti böyük inam və qətiyyətlə bu barədə demişdir: "Ölkəmizi bundan sonra da inkişaf etdirməliyik. 2009-cu ildə və ondan sonrakı illərdə nəzərdə tutulmuş bütün proqramlar icra olunacaqdır... Növbəti beş il üçün yeni geniş proqram hazırlanır və yəqin ki, yaxın vaxtlarda biz bunu qəbul edəcəyik".

Azərbaycan.-2009.-26 fevral.-S.1.