Jan NUVEL: "Yeni layihədə Xəzərin xarakteri ilə Bakının tarixini bir obrazda birləşdirməyə çalışmışam"

Fevralın 25-də Azərbaycan Rəssamlar İttifaqında Müasir İncəsənət Muzeyi kompleksinin memarlıq konseptinin təqdimatı keçirilmişdir. Tədbirdə layihənin müəllifi, dünya şöhrətli memar Jan Nuvel, layihənin iştirakçıları Nikolas İlyin, Nikolas Gitton, Norman Rozental, Prezidentin İcra Aparatının Humanitar siyasət məsələləri şöbəsinin müdiri Fatma Abdullazadə, Azərbaycan Rəssamlar İttifaqının sədri, xalq rəssamı Fərhad Xəlilov, Bakının baş memarı Akif Abdullayev, Dövlət Şəhərsalma və Arxitektura Komitəsinin sədri Abbas Ələkbərov və başqaları iştirak etmişlər.

Layihədə 30 min kvadratmetr sahədə - Bayıldan "qızıl hörük" şəklində Xəzərə uzanan və bir neçə kiçik ada ilə tamamlanan obyektlərin tikintisi nəzərdə tutulmuşdur. J.Nuvelin planına görə, Azərbaycanın Dövlət bayrağı meydanından başlanacaq kompleksin suüstü hissənin "işıq" saçan konstruksiyası deşikli möhkəm materialdan hazırlanacaqdır.

Beləliklə, "hörük" qızılı işıq saçacaqdır. J.Nuvel demişdir: "Bunu vurğulamaq vacibdir. Buxtanın formasından istifadə edərək mən dənizin xarakteri ilə şəhərin tarixini birləşdirməyə çalışmışam. Bakının sahilyanı zonası şəhərin özgürlüyünü üzə çıxarmaq üçün ideal ərazidir. Bu mövzu tükənməzdir. Tikililər suyun, neftin və torpağın birliyi ideyasını əks etdirməli, müvafiq forma və rəngə malik olmalıdır". Onun sözlərinə görə, kompleks şəhərin rəmzinə çevriləcəkdir.

J.Nuvel bildirmişdir ki, layihədə təkcə muzey, rəsm salonları, qalereyalar deyil, həm də ticarət və əyləncə mərkəzlərinin tikintisi nəzərdə tutulmuşdur. Turizmin inkişafı amili də nəzərə alınmışdır. J.Nuvelin fikrincə, yeni kompleks ildə təxminən 600 min adamı qəbul edəcəkdir.

Azərbaycan Prezidentinin İcra Aparatının şöbə müdiri Fatma Abdullazadə J.Nuvelin gördüyü böyük işi və "Müasir incəsənət muzeyi" layihəsinin əhəmiyyətini qeyd etmişdir. Onun sözlərinə görə, istiqamət düzgün seçilmişdir və yəqin ki, layihə mərhələlərlə həyata keçiriləcəkdir.

J.Nuvel 1945-ci ildə Fransanın Sarla şəhərində anadan olmuşdur. 1966-1972-ci illərdə Bordoda incəsənət məktəbində təhsil almış, ilk bürosunu tərəfdaşı ilə birlikdə 1970-ci ildə açmışdır. 1994-cü ildə öz memarlıq atelyesini yaratmışdır. 1982-ci ildə Parisdəki Ərəb Dünyası İnstitutu binasının layihəsi üzrə müsabiqədə qalib gəldikdən sonra dünya şöhrəti qazanmışdır. Jan Nuvelin Kartye Fondu və Ərəb Dünyası İnstitutu kimi layihələri Fransanı yenidən dünya memarlığında ön sıraya çıxarmışdır.

J.Nuvelin Barselonadakı Torre Akbar göydələni çoxmərtəbəli binalar tikintisində yeni mərhələdir.

2006-cı ildə J.Nuvelin yeni işi olan Paris Dünya Mədəniyyəti Muzeyi açılmışdır. Müəllif burada muzey, ətraf mühit və eksponatların vəhdətini yarada bilmişdir.

AzərTAc

Azərbaycan.-2009.-26 fevral.-S.2.