Xocalı faciəsinə həsr olunmuş film nümayiş olundu

Dünən Azərbaycan Türkiyə İş Adamları Birliyinin ofisində Xocalı faciəsinə həsr olunmuş qısametrajlı filmin nümayiş etdirilməsi bütün tədbir iştirakçılarında mənfur erməni işğalçılarının törətdikləri amansızlıqlara, vəhşiliklərə qarşı nifrət oyadaraq intiqam hisslərini bir daha artırdı.

Yerli və xarici televiziya kanalları ilə, internet vasitəsilə bütün dünyaya yayımlanması nəzərdə tutulan Xocalı soyqırımına həsr olunmuş "Xocalı qətliamı. Bu, son oslun!" adlı qısametrajlı filmin rejissoru Türkiyənin tanınmış sənətçisi, nüfuzlu Berlin festivalının laureatı Korhan Yurtsevərdir. Çəkilişlər Türkiyədə aparılıb. Türk dilində çəkilən film Azərbaycan, rus və ingilis dillərinə tərcümə edilib.

Filmdən Azərbaycanda və xarici ölkələrdə keçirilən müxtəlif tədbirlərdə vizual təbliğat vasitəsi kimi istifadə edilməsi nəzərdə tutulub. Azərbaycan-Türkiyə-Amerika Fondunun vasitəsilə filmin Xocalı faciəsinin ildönümü ilə bağlı ABŞ-da keçiriləcək tədbirlərdə nümayişi planlaşdırılıb.

Filmin Ümumdünya Azərbaycan Konqresinin vasitəsilə Moskvada və Rusiyanın bir çox şəhərlərində keçiriləcək tədbirlərdə nümayiş etdirilməsi də nəzərdə tutulub.

"Xocalı qətliamı. Bu, son oslun!" filmi Türkiyədə Mərmərə Vakfı və Türkiyə-Azərbaycan Dərnəkləri Federasiyası vasitəsilə keçiriləcək tədbirlərdə də yayımlanacaq.

Azərbaycan televiziya kanalları vasitəsilə nümayiş etdiriləcək film internet vasitəsilə də beynəlxalq ictimaiyyətin nəzərinə çatdırılacaqdır.

Valeh Cəfərov

Azərbaycan.-2009.-26 fevral.-S.11.