Milli Məclisin növbədənkənar sessiyası başa çatmışdır

İyunun 30-da Milli Məclisin növbədənkənar sessiyasının sonuncu plenar iclası keçirilmişdir. Gündəliyin müzakirəsinə keçməzdən əvvəl deputatlar cari məsələlərə dair fikirlərini bildirmişlər.

Bundan sonra deputatlar "Dini etiqad azadlığı haqqında" Azərbaycan Respublikasının Qanununa əlavələr və dəyişklik edilməsi barədə" və "Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında" qanun layihələrinin müzakirəsini davam etdirmişlər. Parlamentin Sədri Oqtay Əsədov dedi ki, "Azərbaycan Respublikasının bəzi qanunvericilik aktlarına əlavələr və dəyişikliklər edilməsi haqqında" qanun layihəsi ilə əlaqədar ona müraciətlər olub. Müraciətlərlə bağlı qanun layihəsinə Milli Məclisin Hüquq siyasəti və dövlət quruculuğu komitəsində baxılması tövsiyə olunmuşdur.

Hüquq siyasəti və dövlət quruculuğu komitəsinin sədri Əli Hüseynov isə layihə ilə bağlı dedi ki, ötən iclasdan sonra qanun layihəsinin parlamentin gündəliyindən çıxarılması ilə bağlı yayılan fikirlərin məntiqi əsası yoxdur. Bütün parlamentlərdə qanunların qəbulunun proseduru var: subyekt layihəni təqdim edir, sonra təkliflər olur və komitə də buna münasibət bildirir.

Nəticə etibarilə ancaq parlamentin iradəsi ilə qanun ya qəbul olunur, yaxud qəbul olunmur.

Bu layihə də komitədə çox şəffaf müzakirə olunmuş, Milli Məclis Sədrinə və komitəyə ünvanlanan müraciətlərin, deputatlar tərəfindən verilən təkliflərin əksər hissəsi nəzərə alınmışdır. Komitə sədri layihəyə əsasən "Kütləvi informasiya vasitələri haqqında", "Qeyri-hökumət təşkilatları (ictimai birliklər və fondlar) haqqında", "Qrant haqqında", "Dövlət rüsumu haqqında" qanunlara və İnzibati Xətalar Məcəlləsinə təklif olunan əlavələr və dəyişikliklər barədə də geniş məlumat verdi.

Müzakirələr zamanı deputat Musa Quliyev "Dini etiqad azadlığı haqqında" qanuna təklif olunan əlavələrin və dəyişikliyin günün tələblərinə cavab verdiyini, "Kütləvi informasiya vasitələri haqqında" qanuna nəzərdə tutulan əlavə və dəyişikliklərin mətbuatın məsuliyyətinin artırılması baxımından zəruri olduğunu bildirdi. Qeyri-hökumət təşkilatları (ictimai birliklər və fondlar) haqqında" qanuna təklif olunan əlavələr və dəyişikliklərlə bağlı müxalifətin narahatlığının başa düşülmədiyini deyən Musa Quliyev QHT-lərin dövlət tərəfindən maliyyələşdirilməsinin vacib olduğunu vurğuladı.

ABŞ-ın ölkəmizdəki səfiri Ann Dersi Milli Məclisdə görməkdən məmnun qaldığını deyən deputat Zahid Oruc Azərbaycandakı diplomatik korpusun digər qanun layihələrinin müzakirəsində iştirakını da arzuladı.

Deputat Fəzail İbrahimli çıxışında bildirdi ki, qanun layihələrinə edilən əlavələr və dəyişikliklər Azərbaycanın dövlətçilik maraqlarına xidmət edir.

Deputat İlham Məmmədov da müzakirə olunan məsələlərin dövlətimizin milli təhlükəsizliyi baxımından mühüm əhəmiyyət kəsb etdiyini söylədi.

Deputat Əli Əhmədov isə dedi ki, parlamentin iyunun 19-da keçirilən iclasından sonra belə bir təəssürat yaranırdı ki, QHT-lərlə əlaqədar təklif olunan düzəlişlərlə bağlı ən böyük narahatçılığı qeyri-hökumət sektorunda çalışan Azərbaycan vətəndaşları ifadə edirlər. Amma diqqətli müşahidəçilər gördülər ki, narahatçılıq keçirən daha çox Azərbaycan vətəndaşı olmayanlardır. QHT-lərlə bağlı qanunvericiliyə təklif olunan dəyişikliklərin əleyhinə çıxmaq Azərbaycanın dövlətçilik və milli maraqlarının əleyhinə çıxmaq cəhdlərindən başqa bir şey deyil.

Əli Əhmədov "Dini etiqad azadlığı haqqında" qanuna təklif olunan əlavələri və dəyişikliyi də təqdir etdi.

Milli Məclis Sədrinin müavini Valeh Ələsgərov "Qeyri-hökumət təşkilatları (ictimai birliklər və fondlar) haqqında" qanuna edilən dəyişiklərlə bağlı komitə sədri Əli Hüseynovun təqdimatında qeyri-adi heç nəyin olmadığını bildirdi. Dedi ki, vaxtilə bəzi QHT-ləri Bakı-Tbilisi-Ceyhan kimi iri enerji layihələrinin də əleyhinə çıxırdı. Bütün QHT-ləri paklıq nümunəsi kimi təqdim etmək düzgün deyil. O, həmçinin qeyd etdi ki, bu layihəni müzakirə edərkən nəzərə almalıyıq ki, bizim üçün ən ümdə məsələ milli maraqlarımızdır. QHT-lərlə bağlı qanunvericiliyə təklif olunan əlavələrdə və dəyişikliklərdə vətəndaş cəmiyyətinin inkişafına mane ola biləcək heç nə yoxdur.

Milli Məclis Sədrinin birinci müavini Ziyafət Əsgərov isə bildirdi ki, əgər yenə də QHT-lərlə bağlı məsələ iyunun 19-da təqdim olunmuş variant şəklində müzakirə olunsaydı onun lehinə səs verəcəkdi. Çünki bu layihə QHT-lərə qarşı deyil. Söhbət yalnız Azərbaycanın milli maraqlarından gedir. Ziyafət Əsgərovun sözlərinə görə, müxalifətin məsələyə yanaşmasından belə çıxır ki, demokratiya olsun, amma qanun olmasın. Demokratiyanın yolu isə qanunçuluqdan keçir.

Ziyafət Əsgərov onu da bildirdi ki, "Dini etiqad azadlığı haqqında" qanuna təklif olunan əlavələr və dəyişiklik dinin tiryəkə çevrilməsinin qarşısını almaq üçündür.

Müzakirələrin sonunda hər iki qanun layihəsi səsə qoyularaq qəbul edildi.

Fasilədən sonra Milli Məclisin parlamentlərarası əlaqələr üzrə işçi qruplarının tərkibində dəyişikliklər edilməsi barədə qərar layihəsi təsdiq edildi.

Hüquq siyasəti və dövlət quruculuğu komitəsinin sədri Əli Hüseynov Gəncə və Şirvan apellyasiya məhkəmələrinin hakimlərinin vəzifədən azad edilməsi haqqında qərar layihəsi barədə məlumat verdi. Deputatlar qərar layihəsinə müsbət münasibət bildirdilər.

Əli Hüseynov Azərbaycan Respublikasının Mənzil Məcəlləsinin layihəsini (üçüncü oxunuş) də müzakirəyə təqdim etdi. Dedi ki, ikinci oxunuşdan sonra işçi qrup tərəfindən layihə üzərində iş aparılmışdır. Deputatların irəli sürdükləri təkliflərin bir qismi nəzərə alınmışdır. Layihə səsə qoyularaq üçüncü oxunuşda təsdiq edildi.

Azərbaycan Respublikasının İnzibati Prosessual Məcəlləsinin layihəsi (üçüncü oxunuş) barədə Hüquq siyasəti və dövlət quruculuğu komitəsinin üzvü Rafael Cəbrayılov məlumat verdi. Bildirdi ki, bu Məcəllənin qəbulu dövlət - vətəndaş münasibətlərinin hüquqi dövlət prinsiplərinə uyğun şəkildə qurulması baxımından mühüm əhəmiyyət kəsb edəcək. Azərbaycanda hüquqi dövlət quruculuğuna, insan hüquq və azadlıqlarının müdafiəsinə töhfə verəcəkdir. Konstitusiyaya edilmiş son dəyişikliklər baxımından Məcəllənin qəbul edilməsi xüsusilə aktualdır. Deputatlar məsələyə müsbət münasibət bildirdilər.

Sonra "Bədən tərbiyəsi və idman haqqında" Azərbaycan Respublikası qanununun layihəsi (üçüncü oxunuş) müzakirəyə çıxarıldı. Layihə barədə məlumat verən Sosial siyasət komitəsinin sədri Hadi Rəcəbli dedi ki, bu qanunun qəbulu zəruridir. Layihə Sosial siyasət komitəsində, Milli Məclis Aparatının müvafiq qanunvericilik şöbəsində və idman ictimaiyyətində müzakirə olunmuş, təklif və mülahizələr nəzərə alınmışdır.

Deputatlar Siyavuş Novruzov və Gülər Əhmədova "Bədən tərbiyəsi və idman haqqında" qanun layihəsinin vacibliyindən danışdılar. Qeyd olundu ki, sənədin qəbulu Azərbaycanda idmanın inkişafına təkan verəcəkdir.

İclasda iştirak edən Azərbaycan Respublikasının gənclər və idman naziri Azad Rəhimov dedi ki, ölkəmiz dünyada bütün sahələr üzrə inkişaf edən dövlət kimi tanınır. Ölkəmizdə idmana olan böyük maraq və beynəlxalq idman aləmində baş verən yeniliklər bu sahə ilə bağlı qanunvericiliyin təkmilləşdirilməsini zəruri edir. Çünki ölkəmizin dünyada daha geniş miqyasda tanınmasına və Azərbaycan haqqında müsbət imicin formalaşmasında idman böyük rol oynayır. Azərbaycan idmançılarının nailiyyətlərinin artması Prezident İlham Əliyevin məqsədyönlü siyasətinin nəticəsidir. Müzakirələrin sonunda qanun layihəsi qəbul edildi.

Milli Məclis Sədrinin müavini Valeh Ələsgərov "Yaponiya Beynəlxalq Əməkdaşlıq Agentliyi və Azərbaycan Respublikası hökuməti arasında "Kiçik şəhərlərdə su təchizatı və kanalizasiya layihəsi"nə dair Kredit Sazişinin təsdiq edilməsi haqqında" Azərbaycan Respublikası qanununun layihəsini parlamentin müzakirəsinə çıxardı. Bildirdi ki, Kredit Sazişi və qanun layihəsi Milli Məclisin Təbii ehtiyatlar, energetika və ekologiya komitəsində müzakirə olunub. Sazişin birinci əlavəsində göstərilir ki, ayrılacaq vəsaitlə Şirvan, Salyan, Neftçala, Xaçmaz, Bərdə, Yevlax, Xızı, Qusar, Qobustan və Naftalanda su təchizatı və kanalizasiya sistemləri təkmilləşdiriləcək. Deputatlar qanun layihəsinə müsbət münasibət bildirdilər.

Hüquq siyasəti və dövlət quruculuğu komitəsinin sədri Əli Hüseynov "Diplomatik xidmətdə fərqlənməyə görə" medalının təsis edilməsi haqqında" və "Azərbaycan Respublikası diplomatik xidmət orqanlarının 90 illiyi (1919-2009)" Azərbaycan Respublikasının yubiley medalının təsis edilməsi haqqında" qanun layihələri barədə məlumat verdi. Bildirdi ki, qanun layihələrinə əsasən ölkəmizin orden və medallarının sıyahısına daha iki yeni medalın əlavə edilməsi təklif olunur. Diplomatik xidmət dövlət qulluğunun xüsusi formasıdır. Bu xidmət həm keçmişdə, həm də müasir dövrdə fədakar xidmətlərdən olub. Hər iki qanun layihəsi səsə qoyularaq qəbul edildi.

Deputatlar Azərbaycan Respublikasının İsmayıllı, Hacıqabul, Salyan, Sabirabad rayonlarının və Şirvan şəhərinin inzibati ərazi bölgüsündə qismən dəyişiklik edilməsi haqqında qanun layihələrinə də müsbət münasibət bildirdilər.

Regional məsələlər komitəsinin sədri Arif Rəhimzadə "Ərazi quruluşu və inzibati ərazi bölgüsü haqqında" Azərbaycan Respublikasının Qanununa dəyişikliklər və əlavələr edilməsi barədə" qanun layihəsi barədə bildirdi ki, hazırda ərazi vahidlərində və inzibati ərazi dairələrinin yaradılması, ləğv edilməsi, onların statusunun müəyyənləşdirilməsi üçün xəritələrin hazırlanması tələb olunur. Xəritələr hazırlanarkən onların döngə nöqtələri və koordinatları müəyyən edilməli, bu rəqəmlər, koordinatlar xəritələrdə dəqiq verilməlidir. Lakin bir çox hallarda, ələlxüsus ərazi kiçik olduqda döngə nöqtələrinin koordinatlarını xəritədə yerləşdirmək mümkün olmur. Qanun layihəsində ərazilərin xəritələrinin mövcud qaydada hazırlanması, döngə nöqtələrinin əks etdirilməsi nəzərdə tutulur.

Müzakirələr zamanı deputat Nizami Xudiyev qanun layihəsi ilə bağlı bir neçə təkliflə çıxış etdi. Qanun layihəsi səsə qoyularaq qəbul edildi.

Deputatlar "Azərbaycan Respublikasının ərazi vahidlərinin və inzibati ərazi dairələrinin Dövlət reyestrinin aparılması və onlara şəhadətnamənin verilməsi haqqında" Əsasnamənin təsdiq edilməsi barədə" Azərbaycan Respublikasının Qanununda dəyişikliklər və əlavələr edilməsi haqqında" qanun layihəsinə müsbət münasibət bildirdilər.

"Sahibkarlıq fəaliyyəti haqqında" Azərbaycan Respublikası Qanununa əlavə edilməsi barədə" qanun layihəsi ilə bağlı İqtisadi siyasət komitəsinin sədri Ziyad Səmədzadə məlumat verdi. Qanun layihəsi səsə qoyularaq qəbul edildi.

Daha sonra "Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında" Azərbaycan Respublikasının Qanununun tətbiqi ilə əlaqədar Azərbaycan Respublikasının bəzi qanunvericilik aktlarına əlavələr və dəyişikliklər edilməsi barədə qanun layihəsinə, "Mühasibat uçotu üzrə qanunvericiliyin, hesabat və məlumatların təqdim edilməsi qaydalarının pozulmasına görə məsuliyyətin gücləndirilməsi məqsədi ilə Azərbaycan Respublikasının İnzibati Xətalar Məcəlləsinə dəyişikliklər edilməsi barədə" Azərbaycan Respublikasının qanun layihəsinə və "Miqrasiya proseslərinin idarə olunmasında "bir pəncərə" prinsipinin tətbiqi ilə əlaqədar Azərbaycan Respublikasının bəzi qanunlarına əlavələr və dəyişikliklər edilməsi və "Azərbaycan Respublikasında daimi yaşayan əcnəbinin və ya vətəndaşlığı olmayan şəxsin qeydiyyat vəsiqəsinin formasının təsdiq edilməsi barədə" Azərbaycan Respublikası Qanununun qüvvədən düşmüş hesab edilməsi haqqında" qanun layihəsi müzakirə olundu. Deputatlar hər üç qanun layihəsinə müsbət münasibət bildirdilər.

Bununla da Milli Məclisin növbədənkənar sessiyası öz işini başa çatdırdı. İclasa sədrlik edən Oqtay Əsədov növbədənkənar sessiyanın səmərəli keçdiyini, deputatların qanun layihələrinin müzakirəsində fəal iştirak etdiklərini, zəruri qanunların və qanun layihələrinin qəbul olunduğunu bildirdi.

Sonda Azərbaycan Respublikasının dövlət himni səsləndirildi.

Azərbaycan.- 2009.- 1 iyul.- S. 3.