Belarusun milli bayramı şərəfinə

Belarusun Azərbaycandakı səfirliyi ölkəsinin milli bayramı - Respublika günü münasibətilə iyunun 30-da Bakı Əyləncə Mərkəzində rəsmi qəbul təşkil etmişdir. Azərbaycanın və Belarusun dövlət himnləri səslənmişdir.

Belarusun Azərbaycandakı səfiri Nikolay Pastkeviç qəbulda çıxış edərək 2009-cu ilin ölkəsi üçün əhəmiyyətli hadisələrlə yadda qaldığını söyləmişdir. O demişdir ki, bu il iyulun 3-də Belarusun faşist işğalından azad edilməsinin 65-ci ildönümü böyük təntənə ilə qeyd olunacaqdır. Belarusun Azərbaycanla əməkdaşlığının xüsusi roluna toxunan səfir xalqlarımız arasında möhkəm dostluq ənənələrinin olduğunu demişdir. Səfir bildirmişdir ki, Belarusun faşist işğalından azad edilməsində azərbaycanlıların da böyük rolu olmuşdur. Azərbaycanlıların Böyük Vətən müharibəsi illərində mərdliyi, şücaəti Belarus xalqının yaddaşında əbədi yaşayacaqdır.

Nikolay Pastkeviç hər iki ölkənin dövlət başçılarının səfərlərinin, aralarındakı mehriban münasibətlərin, habelə parlamentlərarası əlaqələrin ikitərəfli əlaqələrin daha da genişlənməsinə təkan verdiyini söyləmişdir.

Azərbaycanın rabitə və informasiya texnologiyaları naziri Əli Abbasov Prezident İlham Əliyevin adından milli bayram münasibətilə Belarus xalqını təbrik etmişdir. Ölkələrimiz arasında münasibətlərin yüksək səviyyəsini xatırladan Ə.Abbasov xalqlarımızın sıx dostluq münasibətlərini diqqətə çatdırmışdır. Bildirmişdir ki, ölkələrimiz müstəqilliyini bərpa etdikdən sonra bu əlaqələr daha da möhkəmlənmişdir. Nazir Azərbaycan ilə Belarus arasında son illər 59 sənədin imzalandığını diqqətə çatdıraraq humanitar sahədə ölkələrimiz arasında sıx əməkdaşlıq əlaqələrinin qurulduğunu qeyd etmişdir.

Daha sonra Nikolay Pastkeviç Belarusun faşist işğalından azad olunmasında iştirak edən bir qrup veterana fəxri medallar təqdim etmişdir.

Qəbulda Prezident Administrasiyasının xarici əlaqələr şöbəsinin müdiri Novruz Məmmədov, Milli Məclisin deputatları, dövlət və hökumət rəsmiləri, xarici ölkələrin Azərbaycanda akkreditə olunmuş səfirləri, digər rəsmi şəxslər iştirak etmişlər.

AzərTAc

Azərbaycan.- 2009.- 1 iyul.- S. 3.