ABŞ Konqresinə müraciət qəbul olunmuşdur

İyunun 30-da Milli Məclisin Beynəlxalq münasibətlər və parlamentlərarası əlaqələr və İqtisadi siyasət komitələrinin birgə iclasında 2010-cu il üçün separatçı Dağlıq Qarabağ qurumuna 10 milyon ABŞ dolları məbləğində maliyyə yardımının ayrılması ilə bağlı iyunun 17-də ABŞ Konqresi Nümayəndələr Palatasının Təxsisatlar Komitəsinin Dövlət, Xarici əməliyyatlar və aidiyyəti Proqramlar üzrə alt komitəsi tərəfindən qəbul olunmuş büdcə layihəsinə münasibət bildirildi.

Beynəlxalq münasibətlər və parlamentlərarsı əlaqələr komitəsinin sədri Səməd Seyidov qeyd etdi ki, həmin qərar Milli Məclisin deputatları tərəfindən etirazla qarşılanıb. Çünki ABŞ Azərbaycanın strateji tərəfdaşıdır, ölkəmizin ərazi bütövlüyünü tanıyan dövlətdir və Dağlıq Qarabağ münaqişəsinin həlli istiqamətində çalışan ATƏT-in Minsk qrupunun həmsədridir. ABŞ-ın Dövlət büdcəsi səviyyəsində separatçı Dağlıq Qarabağa belə bir yardımın ayrılması normal məntiqə sığmır, separatizmə dəstək verən bu qərar ədalətli addım deyil, Birləşmiş Ştatların xarici siyasətində ardıcıllığa xələl gətirir.

İclasda sənəd ətraflı müzakirə olundu. İqtisadi siyasət komitəsinin sədri Ziyad Səmədzadə, deputatlardan Vahid Əhmədov, Gültəkin Hacıbəyli, Çingiz Əsədullayev, Qənirə Paşayeva, Asim Mollazadə, Nazim Məmmədov, Nəsib Nəsibli müzakirə olunan sənədə qarşı sərt mövqe nümayiş etdirdilər, ABŞ Konqresində alt komitənin qəbul etdiyi qərar qətiyyətlə pisləndi.

Müzakirələrdə Milli Məclis Aparatının rəhbəri Səfa Mirzəyev qeyd etdi ki, əvvəla, Azərbaycanın tərkib hissəsi olan Dağlıq Qarabağa yardım olunursa, bu, Azərbaycanın adına yazılmalıdır, ayrıca xətlə deyil, ölkəmiz vasitəsilə olunmalıdır. İkincisi, humanitar yardım etnik xarakter daşımamalıdır, həmin bölgədə yaşayan erməni əhalisindən qat-qat çox əziyyət çəkmiş Qarabağ azərbaycanlıları var ki, belə bir yardımdan onları məhrum etmək düzgün deyil.

İki komitənin birgə iclasında aparılan müzakirələrin yekununda ABŞ Konqresinin Nümayəndələr Palatasına və Senata, ABŞ-Azərbaycan parlamentlərarası əlaqələr üzrə işçi qrupa, bütün senatorlara müraciət qəbul olundu.

Milli Məclisin mətbuat xidməti

Azərbaycan.- 2009.- 1 iyul.- S. 3.