Azərbaycan Respublikası Tarif (qiymət) Şurasının növbəti iclası olmuşdur

Tarif (qiymət) Şurasının katibliyindən bildirmişlər ki, iclasda "Dövlət rüsumu haqqında" Azərbaycan Respublikası Qanununa dəyişikliklər və əlavələr edilməsi barədə" Azərbaycan Respublikası Qanununa əsasən Azərbaycan Respublikası Tarif (qiymət) Şurasının bəzi qərarlarının qüvvədən düşmüş hesab edilməsi və bəzi qərarlarına əlavə və dəyişikliklər edilməsi, Azərbaycan Respublikası Xüsusi Dövlət Mühafizə Xidmətinin təklifləri nəzərə alınaraq mövcud internet tariflərinin və respublika ərazisində təbii qazın əhali üçün pərakəndə satış tariflərinin tənzimlənməsi məsələlərinə baxılmışdır.

Qəbul edilmiş qərara əsasən "Dövlət rüsumu haqqında" Azərbaycan Respublikasının Qanununa dəyişikliklər və əlavələr edilməsi barədə" Azərbaycan Respublikası Qanununa əsasən Azərbaycan Respublikası Daşınmaz Əmlakın Dövlət Reyestri Xidməti sahəsində və Azərbaycan Respublikası Dövlət Əmlakının İdarə Edilməsi üzrə Dövlət Komitəsinin Əmlakın Texniki İnventarlaşdırılması Bürosu tərəfindən göstərilən xidmətlərin tarifləri barəsində Azərbaycan Respublikası Tarif (qiymət) Şurasının əvvəllər qəbul edilmiş qərarlarının qüvvədən düşdüyü bildirilmişdir.

Bununla yanaşı, Standartlaşdırma, Metrologiya, Dövlət Torpaq və Xəritəçəkmə Komitəsi, Dövlət Dəniz Administrasiyası, Kənd Təsərrüfatı Nazirliyi yanında Dövlət Baytarlıq Xidməti və Dövlət Fitosanitar Nəzarəti Xidməti sahəsindəki və küçə reklamlarının yerləşdirilməsi və yayımı sahəsindəki xidmətlərin, həmçinin Daxili İşlər Nazirliyinin Baş Dövlət Yol Polisi İdarəsi tərəfindən hüquqi və fiziki şəxslərə göstərilən xidmətlərin və Səhiyyə Nazirliyinin təsərrüfat subyektləri tərəfindən dərman vasitələrinin və maddələrinin dövlət qeydiyyatına alınması xidmətlərinin tarifləri barədə qəbul edilmiş qərarların bəzi bəndləri və bölmələri də qüvvədən düşmüş hesab olunmuşdur.

Azərbaycan Respublikası Kənd Təsərrüfatı Nazirliyi yanında Dövlət Baytarlıq Xidməti tərəfindən baytarlıq nəzarəti vacib olan obyektlərin mülkiyyətçilərinin vəsaiti hesabına maliyyələşdirilən xidmətlərin və Səhiyyə Nazirliyinin təsərrüfat subyektləri tərəfindən dərman vasitələrinin və maddələrinin dövlət qeydiyyatına alınması xidmətlərinin tarifləri barədə əvvəllər qəbul edilmiş qərarlara isə bəzi əlavə və dəyişikliklər edilmişdir.

Şuranın qərarına əsasən son dövrlərdə respublikaya daxil olan internet trafikinin həcminin artdığı və internet şəbəkəsinə qoşulma haqlarının aşağı salındığı əsas gətirilərək Xüsusi Dövlət Mühafizə Xidməti tərəfindən "AzStateNet" Dövlət iternet və xüsusi rabitə xidmətlərinin aylıq abunə tarifləri (SİR) kanal tutumundan asılı olaraq 44,4 - 66,0 faiz arasında aşağı salınmışdır.

Belə ki, 128, 256, 384, 512, 768, 1024, 1536 və 2048 kb/s kanal tutumları üzrə aylıq abunə tarifləri 30, 60, 85,125, 170, 250, 375, 500 manat səviyyəsində müəyyənləşdirilmişdir ki, əvvəllər həmin tariflər uyğun olaraq 75, 160, 250, 340, 450, 630, 720 və 900 manat təşkil edirdi.

Tarif (qiymət) Şurasının iclasında "Azəriqaz" QSC-nin əhali istehlakçı qrupuna satılan qazın qiymətinə yenidən baxılmasına dair müraciəti müzakirə olunmuş və təbii qazın istehlakında israfçılığın qarşısının alınması, əhalinin təbii qazla keyfiyyətli və etibarlı təminatının daha da yaxşılaşdırılması məqsədi ilə, eləcə də mövcud qiymətin çəkilən xərcləri ödəməməsi nəzərə alınaraq hər 1000 kubmetr təbii qazın qiyməti 47,2 manatdan 100,0 manata dəyişdirilmişdir.

Qəbul olunmuş qərarlar 2009-cu il iyulun 1-dən tətbiq ediləcəkdir.

AzərTAc

Azərbaycan.- 2009.- 1 iyul.- S. 5.