Astanada MDB Dövlət İnformasiya Agentlikləri Rəhbərləri Şurasının 9-cu iclası keçirilmişdir

İyunun 29-30-da Astanada MDB Dövlət İnformasiya Agentlikləri Rəhbərləri Şurasının 9-cu iclası keçirilmişdir.

Azərbaycan Dövlət Teleqraf Agentliyinin (AzərTAc) xarici dillərdə informasiya redaksiyasının baş redaktoru Nazim Xıdırovun da qatıldığı iclasda Qazaxıstan, Qırğızıstan, Belarus, Türkmənistan və Tacikistanın dövlət informasiya agentliklərinin rəhbərləri və ya nümayəndələri iştirak etmişlər.

İclası Qazaxıstanın Kazinform Milli Şirkətinin prezidenti Dauren Diyarov açmış, ölkədə dövlət KİV-ləri sistemində dəyişikliklər haqqında məlumat vermiş, "Ama-Media" adlı Milli İnformasiya Holdinqinin yaradılması haqqında danışmışdır.

Tədbirdə MDB Dövlət İnformasiya Agentlikləri Rəhbərləri Şurası sədrinin birinci müavini Mixail Kalmıkov bundan əvvəlki iclasda qəbul edilmiş qərarların yerinə yetirilməsindən söhbət açmış, maliyyə böhranının KİV-lərə, əsasən də çap nəşrlərinə təsiri haqqında danışmışdır.

İclasda MDB-nin informasiya agentlikləri arasında əlaqələrin dərinləşdirilməsi, Milli İnformasiya Agentlikləri Assosiasiyasının internet-portalının yaradılması və digər məsələlər də müzakirə edilmişdir.

Qulu KƏNGƏRLİ,

AzərTAc-ın xüsusi müxbiri

Astana

Azərbaycan.- 2009.- 2 iyul.- S.5.