Azərbaycan-İsrail əlaqələri genişlənir

AzərTAc xəbər verir ki, İqtisadi İnkişaf naziri Şahin Mustafayev Bakıda səfərdə olan İsrailin sənaye, ticarət və əmək naziri Binyamin Ben-Elizerin rəhbərlik etdiyi nümayəndə heyəti ilə görüşmüşdür.

Şahin Mustafayev qonağa Azərbaycan iqtisadiyyatı, aparılan islahatlar və qazanılmış uğurlar barədə məlumat vermişdir. Qeyd edilmişdir ki, əsası ümummilli liderimiz Heydər Əliyev tərəfindən qoyulmuş və hazırda Azərbaycan Prezidenti İlham Əliyevin uğurla davam etdirdiyi islahatlar nəticəsində iqtisadiyyatın bütün sahələrində əhəmiyyətli irəliləyişlərə nail olunmuşdur. Azərbaycanda özəl bölmənin inkişafına dövlət dəstəyi daha da gücləndirilmiş, əlverişli investisiya mühiti yaradılmış, sahibkarlıq iqtisadiyyatın aparıcı sahəsinə çevrilmişdir.

Ölkəmizdə beynəlxalq əlaqələrin inkişafına xüsusi əhəmiyyət verildiyini vurğulayan nazir Azərbaycan ilə İsrail arasında əməkdaşlığın inkişaf etdirilməsi, ticarət-iqtisadi əlaqələrin genişləndirilməsi üçün işgüzar görüşlərin, biznes-forumlarının təşkilinin əhəmiyyətini qeyd etmişdir.

Vurğulamışdır ki, Azərbaycanın və İsrailin dövlət başçılarının iştirakı ilə keçirilmiş biznes-forum əməkdaşlığın inkişafında xüsusi rol oynayacaqdır. Hər iki ölkənin iş adamlarının böyük maraq göstərdiyi tədbir sahibkarların işgüzar əlaqələrinin inkişafı üçün atılan mühüm addımdır.

Şahin Mustafayev İsrail şirkətlərinin kənd təsərrüfatı sahəsində müasir texnologiyalara əsaslanan istehsal və emal müəssisələrinin yaradılması ilə bağlı qabaqcıl təcrübəyə malik olduğunu qeyd etmiş, Azərbaycan tərəfinin müasir aqrofermaların, logistik mərkəzlərinin, həmçinin soyuducu anbarların və istixanaların yaradılmasında maraqlı olduğunu bildirmiş, israilli iş adamlarını bu layihələrdə fəal iştiraka dəvət etmişdir. Diqqətə çatdırmışdır ki, İsrail iş adamları, həmçinin Azərbaycan İnvestisiya Şirkəti ilə əməkdaşlığı genişləndirməklə qeyri-neft sektoruna, xüsusilə də kənd təsərrüfatı, informasiya-kommunikasiya texnologiyaları, səhiyyə və s. sahələrə investisiya yatıra bilərlər.

Binyamin Ben-Elizer ölkəsinin Azərbaycanla iqtisadi əlaqələrinin genişlənməsində maraqlı olduğunu vurğulamış, əməkdaşlığın inkişafı üçün İsrailin hər cür dəstək göstərməyə hazır olduğunu bildirmişdir.

Görüşdə Azərbaycanda İsrail texnologiyasına əsaslanan pilot fermer təsərrüfatının yaradılması layihəsi ilə bağlı müzakirə aparılmış, bu təsərrüfatın müştərək müəssisə formasında olması barədə ilkin razılıq əldə edilmişdir. Tərəflər hər iki ölkənin marağını nəzərə alaraq bu sahədə işlərin davam etdirilməsini məqsədəuyğun hesab etmişlər.

İsrailli nazir azərbaycanlı həmkarını 2009-cu ilin noyabrında Təl-Əvivdə keçiriləcək aqrar sahədə texnologiyalara həsr olunmuş "Watech" sərgi və konfransına dəvət etmişdir.

Azərbaycan.- 2009.- 2 iyul.- S. 6.