İyulun 2-də
Bakıda Beynəlxalq Miqrasiya Təşkilatının (BMqT)
Azərbaycan nümayəndəliyi tərəfindən həyata
keçirilən və ABŞ Dövlət Departamentinin maliyyələşdirdiyi
"Azərbaycanda insan alveri qurbanları üçün
sığınacaq və qaynar xəttin idarə olunması
üzrə ölkə potensiallarının
artırılması" layihəsi çərçivəsində
insan alveri qurbanları üçün yardım və sosial
reinteqrasiya modelinin inkişafına dair regional müşavirə
işə başlamışdır.
Azərbaycan,
Gürcüstan, Türkiyə, Rusiya, Moldova, Makedoniya, Litva,
Özbəkistan, İran və Hindistandan olan beynəlxalq
ekspertlərin, ölkəmizin hökumət rəsmilərinin,
insan alveri ilə mübarizə sahəsində fəaliyyət
göstərən qeyri-hökumət təşkilatları təmsilçilərinin
iştirak etdikləri müşavirəni giriş sözü
ilə BMqT-nin Bakıdakı nümayəndəliyinin rəhbəri
Vasili Yujanin açaraq tədbirin məqsəd və vəzifələri
barədə məlumat vermişdir.
Azərbaycan
Respublikası Daxili İşlər Nazirliyi (DİN) İnsan
Alverinə Qarşı Mübarizə İdarəsi insan alveri
qurbanları ilə işin təşkili şöbəsinin rəisi
Şahin Qocayev hazırda çox təhlükəli qlobal bəlaya
qarşı ölkəmizdə həyata keçirilən
ardıcıl tədbirləri müşavirə
iştirakçılarının diqqətinə
çatdırmışdır. Azərbaycan üçün
yeni problem olan insan alverinin bütün təzahürlərinə
qarşı barışmaz mübarizə
aparıldığını söyləyən Ş.Qocayey
ölkədə bu məqsədlə etibarlı hüquqi baza
yaradıldığını vurğulamışdır. Bildirmişdir
ki, ölkəmiz BMT-nin "Transmilli mütəşəkkil
cinayətkarlığa qarşı" Konvensiyasına,
"İnsan alverinin, xüsusən qadın və uşaq
alverinin qarşısının alınması, aradan
qaldırılması və cinayətkarların cəzalandırılmasına
dair" Protokoluna, "Uşaq hüquqları haqqında"
BMT Konvensiyasının "Uşaq alverinə, uşaq
fahişəliyinə və uşaq pornoqrafiyasına dair
Fakültətiv Protokolu"na və digər beynəlxalq sənədlərə
qoşulmuşdur.
Şöbə rəisi
bu sahədə formalaşmış milli qanunvericilikdən
söhbət açarkən diqqəti daha çox Azərbaycan
Prezidentinin 2009-cu il 6 fevral tarixli Sərəncamı ilə təsdiq
edilmiş "Azərbaycan Respublikasında insan alverinə
qarşı mübarizə üzrə Milli Fəaliyyət
Planı (2009-2013-cü illər)"na yönəltmişdir. Bildirilmişdir
ki, bu sənəd ölkədə insan alverinin bütün təzahürlərinə
qarşı mübarizə sahəsində strateji məqsədlərin
prioritet istiqamətlərini özündə əks etdirir.
Ş.Qocayev
respublikamızda 2005-ci ildən indiyədək insan alveri cinayətlərinin
və onların nəticələrinin aradan qaldırılmasına
dair statistik məlumatları tədbir
iştirakçılarına çatdırmışdır.
Cari ilin birinci
yarısının statistikasından danışarkən
demişdir ki, bu müddətdə ölkəmizdə insan
alveri ilə bağlı 48 cinayət faktı qeydə
alınmış, 60 vətəndaş bu hüquqazidd əməlin
qurbanı olmuşdur. Bu cinayəti törədən 41 şəxs
məsuliyyətə cəlb edilmişdir. İnsan alveri
qurbanlarının hamısı dövlətdən hüquqi
yardım almış, o cümlədən 34 nəfər insan
alveri qurbanları üçün yaradılmış
sığınacaqda yerləşdirilmiş, 11 nəfər
işlə təmin olunmuş, 32 nəfər peşə
hazırlığı kurslarına göndərilmiş, 47 nəfərə
müavinət təyin edilmiş, 9 vətəndaşa cinayət
nəticəsində dəymiş ziyan ödənilmişdir.
Müşavirədə
ABŞ-ın Azərbaycandakı səfirliyinin nümayəndəsi
Piter Ştrasse qlobal təhlükə olan insan alveri ilə
mübarizənin ayrılıqda götürülmüş
bir ölkənin və ya qitənin işi
olmadığını, bu transmilli cinayətin
kökünü kəsmək üçün beynəlxalq səylərin
birləşdirilməsinin vacibliyini vurğulamış,
Bakıda keçirilən və böyük bir coğrafi məkanı
əhatə edən regional müşavirənin bu məqsədə
xidmət etdiyini diqqətə çatdırmışdır.
DİN-in İnsan Alverinə
Qarşı Mübarizə İdarəsi qeyri-hökumət təşkilatları
və ictimaiyyətlə əlaqələr qrupunun xüsusilə
mühüm işlər üzrə baş əməliyyat
müvəkkili Fuad Əliyevin Azərbaycan hökumətinin
insan alverinə qarşı mübarizə sahəsində
atdığı addımlardan bəhs edən təqdimatı
müşavirə iştirakçılarının
marağına səbəb olmuşdur.
Sonra beynəlxalq ekspertlər
və Azərbaycanın vətəndaş cəmiyyəti təşkilatlarının
təmsilçiləri insan alverinə qarşı mübarizənin
müxtəlif aspektlərinə dair səmərəli
profilaktika strategiyasının, davamlı yardım və sosial
reinteqrasiya mexanizmlərinin yaradılması ilə
bağlı maraqlı təqdimatlarla çıxış
etmiş, mövzu ətrafında işgüzar fikir mübadiləsi
aparmışlar.
İyulun 3-də regional
müşavirə işini davam etdirəcəkdir.
AzərTAc
Azərbaycan.- 2009.- 3 iyul.- S. 5.