Azərbaycan-Rumıniya münasibətləri dinamik sürətlə inkişaf edir

Azərbaycanın Baş naziri Artur Rasizadə iyulun 3-də ölkəmizdə səfərdə olan Rumıniyanın iqtisadiyyat naziri, Azərbaycan-Rumıniya hökumətlərarası komissiyanın həmsədri Adriyan Vidyanunun başçılıq etdiyi nümayəndə heyəti ilə görüşmüşdür.

Baş nazir qonaqları salamlayaraq ölkəmizdə həyata keçirilən iqtisadi islahatların nəticələrindən, ümumi daxili məhsulun artım tempindən, infrastruktura yatırılan xarici sərmayələrin məbləğindən, əməkhaqlarının və müxtəlif sosial müavinətlərin qaldırılması sahəsində görülən işlərdən danışmış, Azərbaycan rəhbərliyinin qlobal enerji layihələrinin həyata keçirilməsi ilə yanaşı, qeyri-neft sektorunun inkişafına da xüsusi diqqət yetirdiyini vurğulamışdır.

Rumıniya-Azərbaycan əlaqələrinin qədim tarixini, Rumıniyanın respublikamızın dövlət müstəqilliyini tanıyan ilk ölkələrdən biri olduğunu xatırladan Artur Rasizadə bildirmişdir ki, Prezident İlham Əliyevin Rumıniyaya səfərindən sonra qarşılıqlı əlaqələr daha da genişlənmişdir.

Baş nazir vurğulamışdır ki, Azərbaycanın başlıca bir problemi vardır. Bu da Azərbaycan torpaqlarının işğalına və bir milyon insanın doğma yurd-yuvalarından didərgin düşməsinə səbəb olmuş Ermənistan-Azərbaycan, Dağlıq Qarabağ münaqişəsinin indiyədək həll edilməməsidir. A.Rasizadə xalqımızın ən ağrılı problemi olan Dağlıq Qarabağ münaqişəsinin həllində həmişə ədalətli, obyektiv mövqe tutan, bütün beynəlxalq tədbirlərdə Azərbaycanın haqq işini dəstəkləyən Rumıniya hökumətinə təşəkkürünü bildirmişdir.

Adriyan Vidyanu səmimi qəbula görə Artur Rasizadəyə minnətdarlığını bildirmiş, Azərbaycan hökuməti və Rumıniya hökuməti arasında ticarət-iqtisadi əlaqələr və elmi-texniki əməkdaşlıq üzrə müştərək komissiyanın 4-cü iclasının gedişi barədə ətraflı məlumat vermişdir.

Ticarət-iqtisadi sahədə əlaqələrin inkişafı üçün çox əlverişli imkanların olduğunu, rumın iş adamlarının Azərbaycana marağının getdikcə artdığını vurğulayan nazir nəqliyyat, energetika, sənaye, kənd təsərrüfatı məhsullarının idxalı, mədəniyyət, turizm sahələrində qarşılıqlı əməkdaşlığın genişləndirilməsinin hər iki tərəf üçün əhəmiyyətli ola biləcəyini demişdir.

A.Vidyanu rumın xalqının və dövlətinin Azərbaycanı özünə mehriban dost, etibarlı tərəfdaş hesab etdiyini bildirmişdir. Qonaq demişdir ki, Rumıniya hökuməti bundan sonra da Azərbaycanın ədalətli mövqeyini dəstəkləyəcək, Ermənistan-Azərbaycan münaqişəsinin beynəlxalq hüquq normaları əsasında, Azərbaycanın ərazi bütövlüyü çərçivəsində həll edilməsi yolunda əlindən gələni əsirgəməyəcəkdir.

Görüşdə qarşılıqlı maraq doğuran məsələlərlə bağlı fikir mübadiləsi aparılmışdır.

AzərTAc

Azərbaycan.- 2009.- 4 iyul.- S. 4.