İyulun 2-də Tunisin
paytaxtında İSESKO-nun Baş Məclisinin 10-cu sessiyası
öz işinə başlamışdır.
Sessiyanın təntənəli
açılış mərasimi zamanı quruma üzv ölkələrin
nümayəndə heyətləri başçıları və
bir sıra beynəlxalq təşkilatların rəhbərlərinin
iştirakı ilə İSESKO və Dialoq və Əməkdaşlıq
uğrunda İslam Konfransı Gənclər Forumu arasında Əməkdaşlıq
Memorandumuna Əlavə Protokol imzalanmışdır. Protokol hər
iki beynəlxalq qurum tərəfindən İslam Konfransı Gənclər
Forumunun mədəniyyətlərarası dialoq üzrə
baş əlaqələndiricisi Leyla Əliyevanın təşəbbüsü
ilə irəli sürülən "Xocalıya Ədalət"
beynəlxalq məlumat-təşviqat kampaniyasına dəstək
verilməsini və kampaniya çərçivəsində
dünya miqyasında təhsil, elm və mədəniyyət
sahələrində birgə tədbirlərin həyata
keçirilməsini nəzərdə tutur.
İSESKO-nun baş
direktoru Əbdüləziz bin Osman əl-Tüveycri və
İslam Konfransı Gənclər Forumunun baş katibi
Elşad İskəndərovun imzaladıqları sənəd
İSESKO tarixində ilk dəfə olaraq bu qurumun humanitar faciə
ilə bağlı hər hansı bir kampaniyaya dəstək
verməsini nəzərdə tutur.
Elşad İskəndərov
sənədi şərh edərkən bildirmişdir ki,
"Xocalıya Ədalət" kampaniyasının beynəlxalq
formatı nəzərə alınaraq sənəddə
İSESKO və İslam Konfransı Gənclər Forumu tərəfindən
İKT üzv ölkələri və Avropada həyata
keçirilməsi vacib olan tədbirlər planı öz əksini
tapmışdır. Tərəflər İKT ölkələrində
ali məktəb dərsliklərinə Xocalı faciəsi
haqqında məlumatların salınması ilə
bağlı proqramların hazırlanması üzrə
görüləcək konkret işləri
razılaşdırmışlar. Sənədə əsasən
İSESKO artıq 2009-2010-cu illərdə müvafiq məlumatların
İKT ölkələrində dərsliklərə daxil edilməsinə
dair öhdəliyi üzərinə
götürmüşdür. Beləliklə, bu sənəd
keçən il İKT ali təhsil və bu ilin mayında
xarici işlər nazirlərinin konfranslarında forumun təşəbbüsü
ilə "Xocalıya Ədalət" kampaniyası ilə
bağlı qəbul edilən siyasi qətnamələrin həyata
keçirilməsi üçün bir "yol xəritəsi"
rolunu oynayacaqdır.
"Xocalıya Ədalət"
kampaniyası Dialoq və Əməkdaşlıq uğrunda
İslam Konfransı Gənclər Forumunun mədəniyyətlərarası
dialoq üzrə baş əlaqələndiricisi Leyla Əliyevanın
təşəbbüsü ilə ötən ilin mayında
elan edilmişdi. Kampaniyanın məqsədi beynəlxalq
ictimaiyyətin Xocalı faciəsi ilə bağlı məlumatlandırılması,
faciəyə beynəlxalq aləmdə mənəvi-siyasi qiymət
verilməsi və beynəlxalq səviyyədə
anılmasını təmin etməkdir. Bu il fevralın 26-da
dünyanın 25 ölkəsində kampaniyaya uğurlu start
verilmişdir. Kampaniya çərçivəsində forumun təşəbbüsü
ilə İKT sammiti və Xarici İşlər Nazirləri
Konfransı tərəfindən qəbul olunmuş qətnamələrdə
Xocalı faciəsi beynəlxalq təşkilatlar tərəfindən
ilk dəfə olaraq insanlığa qarşı cinayət olan
"kütləvi qırğın" kimi qiymətləndirilmişdir.
Kampaniya beynəlxalq səviyyədə www.justiceforkhojaly.org
saytında davam edir.
AzərTAc
Azərbaycan.- 2009.- 4 iyul.- S. 4.