İsmayıllıda daha bir kəndin qaz xətləri təzələndi

Regionların sosial-iqtisadi inkişafı üzrə I Dövlət Proqramından irəli gələn vəzifələrin icrası ilə bağlı İsmayıllı rayonunda da bir çox layihə həyata keçirilmiş, II Dövlət Proqramında bir çoxunun icrası nəzərdə tutulmuşdur.

Təzəkənd İsmayıllının axar-baxarlı kəndlərindən sayılır. Bu kənddə yaşayanların 17 il idi ki, gözü yolda qalmışdı. Nəhayət, bu günlərdə onların intizarına son qoyuldu. 7600 metr kəndarası orta təzyiqli və 9070 metr paylayıcı qaz xətti əsaslı təmir olunduqdan, bəzi hissələrdə bərpa işləri aparıldıqdan sonra istifadəyə verildi. 265 ailənin sevincinə səbəb olan və bununla bağlı keçirilən mərasimdə çıxış edən İsmayıllı RİH başçısı Nizami Ələkbərov, Milli Məclisin deputatı Novruzəli Aslanov, Yeni Azərbaycan Partiyası İsmayıllı rayon təşkilatının sədri Əzizə Vahabova təzəkəndliləri təbrik edərək onlara uğurlar arzuladılar.

Çıxışlarda qeyd edildi ki, 2013-cü ilədək ikinci Dövlət Proqramına uyğun olaraq rayonun daha 48 kəndinə qazın verilməsi bərpa olunacaqdır.

Kəndin ağsaqqallarından Ötərxan Rəcəbov, Təzəkənd orta məktəbinin direktoru Elxan Bədəlov və müəllim Ağa Nəcəfov qayğı və diqqətə görə ölkə rəhbərliyinə təşəkkürlərini bildirdilər.

Valeh SALEHOV,

İsmayıllı Rayon İcra

Hakimiyyətinin şöbə müdiri

Azərbaycan.- 2009.- 4 iyul.- S. 6.