Bakıda "Milli geyimlər və müasir modada ümumilik" mövzusunda beynəlxalq simpozium keçirilmişdir

Azərbaycan Mədəniyyət Fondunun (AMF), Azərbaycan-Koreya Mədəniyyət Mübadiləsi Assosiasiyasının (SEBA) təşkilatçılığı, Mədəniyyət və Turizm Nazirliyinin dəstəyi ilə iyulun 4-də Milli Azərbaycan Tarixi Muzeyində "Milli geyimlər və müasir modada ümumilik" mövzusunda beynəlxalq simpozium keçirilmişdir.

Simpoziumun iştirakçıları əvvəlcə moda sərgisi ilə tanış olmuşlar.

Sərgidə Azərbaycan, Koreya Respublikası, Türkiyə, Bolqarıstan, Misir, Çin və Yaponiyadan olan müəllif-dizaynerlərin hazırladığı geyim və aksesuarlardan ibarət yüzə yaxın əl işi nümayiş etdirilmişdir. Nizami və Cəmaləddin Əyyubovların klassik Azərbaycan bəzək nümunələri əsasında hazırladıqları bəzək əşyaları xüsusi marağa səbəb olmuşdur.

Azərbaycanın tanınmış incəsənət xadimləri, ziyalıları, Milli Məclisin deputatları, ölkəmizdə akkreditə olunmuş diplomatik korpusun nümayəndələri ilə yanaşı, tədbirdə 130-dək qonaq iştirak etmişdir.

Rəsmi açılış mərasimində çıxış edən SEBA-nın sədri Ruhəngiz Heydərova simpoziumun iştirakçılarını salamlamış, onlara uğurlar arzulamış, belə tədbirin keçirilməsini yüksək qiymətləndirmişdir.

Ölkələrimiz arasında iqtisadi əlaqələrin daha yüksək səviyyədə olduğunu bildirən Koreya Respublikasının Azərbaycandakı səfiri Lü Kvanq Çul mədəniyyət sahəsində əlaqələrin daha da inkişafı üçün belə tədbirlərin böyük rol oynadığını bildirmişdir.

Moskva Dövlət Universitetinin Bakı filialının rektoru, Azərbaycan Mədəniyyət Fondunun vitse-prezidenti Nərgiz Paşayeva çıxış edərək AMF və SEBA tərəfindən uğurla həyata keçirilən tədbirlər və onların nəticələrindən danışmışdır. 2007-ci ildə Bakı Dövlət Universitetində Koreya dilinin tədrisinə başlandığını bildirən Nərgiz Paşayeva elə həmin il BDU-da Koreya Mədəniyyət Mərkəzinin yaradıldığını diqqətə çatdırmışdır.

Mədəniyyət və turizm nazirinin müavini Sevda Məmmədəliyeva, Koreya Moda və Geyim Dizaynı Assosiasiyasının sədri Kim Byon Mi Azərbaycan ilə Koreya Respublikası arasında mədəni əlaqələrdən danışmış, 2007-ci ildə Koreyada "Azərbaycan mədəniyyət günləri"nin keçirildiyini xatırlatmışlar.

Tədbirin təşkilinə görə Heydər Əliyev Fondunun prezidenti, Azərbaycan Mədəniyyət Fondunun prezidenti, Milli Məclisin deputatı Mehriban xanım Əliyevaya dərin minnətdarlıqlarını bildirən simpozium iştirakçıları AMF üçün nəzərdə tutulan hədiyyəni fondun vitse-prezidenti Nərgiz Paşayevaya təqdim etmişlər.

Tədbirdə Nizami Gəncəvi adına Milli Azərbaycan Ədəbiyyatı Muzeyinin direktoru Rafael Hüseynovun, Bolqarıstan Dizayn Assosiasiyasının sədri Teodora Momekovanın, digər yerli və xarici iştirakçıların milli və müasir geyim sahəsində apardıqları tədqiqatlar barədə məruzələri dinlənilmişdir.

AzərTAc

Azərbaycan.- 2009.- 5 iyul.- S. 2.