Azərbaycan qazının dünyaya yolu buradan başlanır

Azərbaycan qazını dünyaya aparan yol Səngəçal terminalından başlanır. Buraya qaz dənizdən, "Şahdəniz" yatağından sualtı borularla daxil olur.

Əslində, "Şahdəniz"dən Səngəçaladək üç kəmər uzanır. Bunlardan biri 26 düymlük qaz kəməridir. Digər kəmərlər isə kondensat və monoetil-qlükol üçündür. Xatırladaq ki, "Şahdəniz"dən qazla yanaşı, kondensat da hasil edilir və o, Heydər Əliyev adına Bakı-Tbilisi-Ceyhan neft kəmərinə vurulur.

Azərbaycan qazı dünyaya Bakı-Tbilisi-Ərzurum kəməri vasitəsilə çatdırılır. Bu xəttin Azərbaycandan və Gürcüstandan keçən hissəsi Cənubi Qafqaz Boru Kəməri adlanır. Bu iki ölkənin ərazisində 691 kilometr məsafə qət edən həmin kəmər öz başlanğıcını terminaldan götürür.

Lakin qaz kəmərə vurulmazdan əvvəl ilkin emal olunur. Bunun üçün də Səngəçal terminalında ayrıca bir sahə - "Şahdəniz" sahəsi var. Keçən il buradan Cənubi Qafqaz Boru Kəmərinə gündə orta hesabla 19,8 milyon kubmetr qaz ötürülüb. Bu ilin birinci rübündə isə kəmər gündə orta hesabla 19,7 milyon kubmetr qaz nəql edib.

Gürcüstan-Türkiyə sərhədindən uzanan 280 kilometrlik xətt "Şahdəniz" qazını Ərzurumadək aparır. Buradan isə Azərbaycan qazının yolu bütün dünyaya şaxələnməkdədir.

Azərbaycan.- 2009.- 5 iyul.- S. 3.