Azərbaycan Prezidenti İlham Əliyev Təzəpir məscid kompleksinin açılışında iştirak edən xarici ölkələrin din xadimlərini qəbul etmişdir

İyulun 6-da Azərbaycan Respublikasının Prezidenti İlham Əliyev Təzəpir məscid kompleksinin açılışında iştirak edən xarici ölkələrin din xadimlərini qəbul etmişdir.

Dövlətimizin başçısı Təzəpir məscid kompleksinin açılış mərasimində iştirak etdiklərinə görə qonaqlara minnətdarlığını bildirərək dedi ki, bizim müxtəlif xalqlarla, o cümlədən din xadimləri ilə yaxşı münasibətlərimiz vardır. Qafqazda sülh hamıya lazımdır. Həm regionda yaşayan xalqlara, həm də bütün dünyaya. Təəssüflər olsun ki, regionumuzda həmişə münaqişələr, müharibələr olub və bu gün də vardır. Bütün bunlara ancaq birgə səylərlə son qoymaq olar.

Azərbaycan Prezidenti vurğuladı ki, biz öz dinimizi dünyaya olduğu kimi təqdim etmək üçün maarifləndirmə işlərini gücləndirməliyik. Müxtəlif təşkilatlar çərçivəsində tədbirlər də keçirilməlidir. Prezident İlham Əliyev bu istiqamətdə Bakıda keçirilən mühüm tədbirlər barədə qonaqlara məlumat verdi və dedi ki, Azərbaycan dinlərarası dialoqun mərkəzi olmaq imkanına malikdir. Bir tərəfdən, Azərbaycanda islam ənənələri çox möhkəm və qədimdir. Digər tərəfdən, ölkəmizin coğrafi vəziyyəti də öz rolunu oynayır. Azərbaycan həm Avropanın, həm də Asiyanın bir hissəsidir.

Müsəlman dövlətləri ilə yaxşı əlaqələr qurmaqla yanaşı, Avropa Şurasının üzvü olan və digər Avropa qurumları ilə əməkdaşlıq edən Azərbaycanın çoxmillətli və çoxkonfessiyalı ölkə olduğunu vurğulayan Prezident İlham Əliyev qeyd etdi ki, respublikamızın hər bir vətəndaşı özünü cəmiyyətin bir hissəsi kimi hiss edir. Hakimiyyətlə din xadimləri arasında möhkəm dostluq əlaqələri vardır. Bunun əsası ulu öndər Heydər Əliyev tərəfindən qoyulub və bu gün də davam etdirilir.

Dövlətimizin başçısı bu məsələlərdə Qafqaz Müsəlmanları İdarəsinin və MDB Müsəlmanları Məsləhət Şurasının sədri şeyxülislam Allahşükür Paşazadənin xidmətlərindən də danışdı. Daha sonra Prezident İlham Əliyev respublikamızın iqtisadi inkişafı barədə xarici ölkələrin din xadimlərinə məlumat verərək bildirdi ki, dünyada mövcud olan iqtisadi böhrana baxmayaraq, son beş ayda Azərbaycanın iqtisadiyyatında 4,5 faiz artıma nail olunmuşdur. Bütövlükdə son beş il ərzində iqtisadiyyat 2,6 dəfə artmışdır. Yoxsulluq 49 faizdən 13 faizə enmiş, 800 minə yaxın yeni iş yeri yaradılmışdır. Regionlarda sosial məsələlərin həllinə böyük diqqət yetirilir.

Prezident İlham Əliyev Ermənistan-Azərbaycan, Dağlıq Qarabağ münaqişəsi zamanı doğma yurdlarından didərgin düşmüş məcburi köçkünlərin, eləcə də Ermənistandakı qədim torpaqlarından qovulmuş soydaşlarımızın və Orta Asiyadan Azərbaycana köçmüş mesxeti türklərinin problemlərinin həlli istiqamətində görülən işlərdən danışmışdır. Dövlətimizin başçısı bildirmişdir ki, qonşu ölkələrdən fərqli olaraq, biz bu problemləri kənardan yardım almadan, öz gücümüzlə həll edirik.

Daha sonra Azərbaycan Prezidenti Rusiyanın regionları, xüsusilə də Şimali Qafqaz respublikaları ilə əlaqələrdən, bütövlükdə qonşu Rusiya Federasiyası ilə münasibətlərin bugünkü vəziyyətindən danışmış, Azərbaycan ilə Rusiya arasında ticari-iqtisadi və humanitar sahələrdə əlaqələrin genişləndirilməsinin hər iki ölkə xalqlarının mənafeyinə xidmət etdiyini əsaslandırmışdır.

Şimali Qafqaz Müsəlmanları Şurasının sədri İsmayıl Berdıyev Təzəpir məscid kompleksinin əsaslı yenidənqurmadan sonra dindarların istifadəsinə verilməsini çox mühüm hadisə kimi dəyərləndirmiş və demişdir ki, Allah eşqinə bu dünyada məscid tikənə Allah-təala cənnətdə saray tikir. İsmayıl Berdıyev ulu öndər Heydər Əliyev haqqında xoş xatirələrini də dilə gətirmiş, Azərbaycanda dinlə dövlət arasındakı dostluğun digər ölkələr üçün nümunə olduğunu söyləmiş, bu amilin respublikada gedən inkişaf prosesinə təsirindən danışmışdır.

"Mən Azərbaycan xalqının ümummilli lideri Heydər Əliyevin din xadimlərinə və ümumiyyətlə, müsəlmanlara gözəl münasibətinin şahidiyəm", - deyən Azərbaycan-İran Dostluq Cəmiyyətinin sədri Əhəd Qəzai bildirmişdir ki, bu qayğı hazırda Prezident İlham Əliyev tərəfindən uğurla davam etdirilir və Təzəpir məscid kompleksinin yenidən qurularaq dindarların istifadəsinə verilməsi bunun əyani təzahürüdür. Əhəd Qəzai Azərbaycanda digər məscidlərin, müqəddəs ocaqların da bərpasına diqqət yetirilməsini müsbət hal kimi səciyyələndirmişdir.

Küveyt Dövlətinin islam və vəqf nazirinin müavini Adil əl-Fəlah Prezident İlham Əliyevi, bütün Azərbaycan xalqını Təzəpir məscid kompleksinin açılışı ilə əlaqədar təbrik etmiş və din xadimlərinin belə formatda görüşünün təşkilinə görə dövlətimizin başçısına minnətdarlığını bildirmişdir. Bakı barədə təəssüratlarını danışan qonaq yüksək inkişafda Azərbaycan Prezidentinin xüsusi xidmətləri olduğunu söyləmişdir.

Bu yaxınlarda Küveytdə səfərdə olduğunu vurğulayan Prezident İlham Əliyev Küveyt Əmiri ilə səmərəli danışıqlar apardığını və onu Azərbaycana səfərə dəvət etdiyini bildirmişdir.

Dövlətimizin başçısı Adil əl-Fəlahdan xahiş etmişdir ki, onun salamlarını və dəvətini bir daha Küveyt Əmirinə çatdırsın.

AzərTAc

Azərbaycan.- 2009.- 7 iyul.- S. 3.