İyulun 8-də
Bakıda Azərbaycan Respublikası Mədəniyyət və
Turizm Nazirliyinin, Avropa Şurasının Bakıdakı
nümayəndəliyinin birgə təşkilatçılığı
ilə Avropa Şurasının 60 illik yubileyi çərçivəsində
"Azərbaycan-Avropa Şurası mədəni əməkdaşlığı:
İmkanlar və perspektivlər" mövzusunda mərasim
keçirilmişdir. Əvvəlcə Avropa
Şurasının tarixindən bəhs edən film
nümayiş etdirilmişdir.
Mərasimi açan Azərbaycanın
mədəniyyət və turizm naziri Əbülfəs Qarayev
Azərbaycan ilə Avropa Şurasının birgə həyata
keçirdiyi layihələrdən danışmış, mədəni
əlaqələrimizin hazırda yüksək səviyyədə
olduğunu bildirmişdir. Azərbaycanın Avropa Şurası
ilə əməkdaşlığa böyük əhəmiyyət
verdiyini bildirən nazir, ölkəmizin şuranın
iclasında ilk dəfə iştirak etdiyi 2001-ci ildə rəsmi
nümayəndə heyətinə məhz Prezident İlham Əliyevin
rəhbərlik etdiyini xatırlatmışdır.
Əbülfəs Qarayev
Avropa Şurasının mədəniyyət, mədəni və
təbii irs üzrə direktoru Robert Palmerin rəhbərliyi ilə
nümayəndə heyətinin mərasimdə
iştirakını yüksək qiymətləndirmişdir.
Avropa Şurasının Baş katibinin Azərbaycandakı
xüsusi nümayəndəsi xanım Veronika Kotek ölkəmizdə
son illərdə mədəniyyətlərarası və
sivilizasiyalararası dialoqlara dair bir sıra mötəbər
tədbirin keçirilməsini Azərbaycan dövlətinin mədəniyyət
sahəsinə böyük qayğısı kimi qiymətləndirmişdir.
Avropa
Şurasının mədəniyyət, mədəni və təbii
irs üzrə direktoru Robert Palmer Bakıda onları səmimiyyətlə
qarşıladıqlarına və tədbirin yüksək səviyyədə
təşkilinə görə dərin minnətdarlığını
bildirmişdir. Azərbaycanın Avropa Şurasının əsas
konvensiyalarına, o cümlədən Mədəniyyət
Konvensiyasına qoşulduğunu və bu sahədə fəal
iştirakını qeyd edən Robert Palmer sülhün və
əmin-amanlığın bərpası istiqamətində
gördükləri işlərdən
danışmışdır.
Mədəniyyət və
turizm nazirinin müavini Sevda Məmmədəliyeva
çıxış edərək ölkəmizdə həyata
keçirilən mədəniyyət layihələrindən,
Avropa Şurası ilə əlaqələrin inkişafı
sahəsində görülən işlərdən
danışmışdır. Avropa Şurasının 60 illik
fəaliyyəti, Azərbaycan ilə təşkilat arasında
mədəni əməkdaşlığın vəziyyəti
müzakirə edilmişdir.
Azərbaycan ilə
Avropa Şurasının birgə həyata keçirdiyi layihələr
slaydlarla nümayiş etdirildikdən sonra Avropa
Şurasının üzvü olan ölkələrin mədəniyyət
nazirlərinin "Mədəniyyətlərarası dialoq
Avropa və onun qonşu regionlarında davamlı
inkişafın və sülhün əsasıdır"
mövzusunda 2008-ci il dekabrın 2-3-də Bakıda keçirilən
konfransından hazırlanmış film göstərilmişdir.
Nazir Əbülfəs
Qarayev mərasimə yekun vuraraq gələcəkdə mədəniyyətlərarası
dialoqun genişləndirilməsi istiqamətində Avropa
Şurası ilə həyata keçiriləcək birgə
layihələrdən danışmış, tədbirdə
iştirakına görə Avropa Şurasının səlahiyyətli
nümayəndələrinə, bir sıra dövlət
qurumlarının və vətəndaş cəmiyyətinin təmsilçilərinə
təşəkkürünü bildirmişdir.
Fasilədən sona
Avropa Şurasının "Sənətçilər dialoq
naminə" layihəsinə həsr olunan birinci ekspert
görüşü olmuşdur.
İki gün davam edəcək
"Sənətçilər dialoq naminə" layihəsinin
əsası Azərbaycanın təşəbbüsü ilə
başlanmış "Bakı prosesi" çərçivəsində
Avropa Şurasına üzv ölkələrin mədəniyyət
nazirlərinin 2008-ci il dekabrın 2-3-də keçirilən
konfransında qoyulmuşdur. Layihənin məqsədi müxtəlif
sivilizasiyaları, xüsusilə də Avropa və ona qonşu
regionlarda yerləşən dövlətlərin sənət
adamları vasitəsilə dialoqu təşviq etmək və
bu istiqamətdə layihələr həyata keçirməkdir.
AzərTAc
Azərbaycan.- 2009.- 9 iyul.- S. 6.