İyulun 10-da ABŞ,
Rusiya və Fransa prezidentləri "Böyük 8"lərin
İtaliyanın Akvil şəhərində keçirilən
toplantısında Dağlıq Qarabağ münaqişəsinin
nizamlanması ilə bağlı birgə bəyanatla
çıxış etmişlər.
Bu sözləri Azərbaycanda
səfərdə olan ATƏT-in Minsk qrupunun həmsədrləri
iyulun 10-da Rusiyanın ölkəmizdəki səfirliyində
keçirdikləri mətbuat konfransında demişlər.
Prezidentlər Barak Obama,
Dmitri Medvedev və Nikola Sarkozi həmsədrlərə Azərbaycan
və Ermənistan prezidentlərinə baza prinsiplərinə
dair son təkliflərin əks olunduğu 2007-ci il noyabrın
29-da açıqlanmış Madrid təklifləri üzrə
yeni versiyanı təqdim etməyi tapşırıblar:
"Biz Azərbaycan və Ermənistan prezidentlərini qalan
fikir ayrılıqlarını aradan qaldırmağa və hərtərəfli
sülh planının əsasını təşkil edəcək
baza prinsiplərinin razılaşdırılmasını
başa çatdırmağa
çağırırıq".
Bildirilmişdir ki, ATƏT-in
Minsk qrupunun həmsədr ölkələrinin
başçıları əsas prinsiplərin
razılaşdırılmasında Azərbaycan və Ermənistan
prezidentlərinə dəstək verəcəklərini təsdiqləmişlər.
AzərTAc
Azərbaycan.- 2009.- 11 iyul.- S. 1.