Ümummilli lider Heydər Əliyevin irsinin öyrənilməsi işinə yeni töhfə

İyulun 10-da "Hyatt Regency" mehmanxanasında Heydər Əliyev İrsini Araşdırma Mərkəzinin tarixin ən böyük azərbaycanlısı, ümummilli lider Heydər Əliyevin respublikamızda siyasi hakimiyyətə gəlməsinin 40 illiyinə ithaf olunmuş "Sabaha doğru" (Azərbaycan, ingilis və rus dillərində) kitabının təqdimatı olmuşdur.

Tədbirdə Heydər Əliyev İrsini Araşdırma Mərkəzi elmi-redaksiya şurasının sədri, akademik Asəf Nadirov, kinorejissor, xalq artisti Tofiq İsmayılov, Azərbaycanda Atatürk Mərkəzinin müdiri, Milli Məclisin Mədəniyyət komitəsinin sədri Nizami Cəfərov, Milli Məclisin deputatı Fəttah Heydərov, Azərbaycan Respublikasının Prezidenti yanında Dövlət İdarəçilik Akademiyasının rektoru, professor Seyfəddin Qəndilov və başqaları çıxış etmişlər. Natiqlər ulu öndər Heydər Əliyevin ötən əsrin 70-80-ci illərində respublikada milli-mənəvi dəyərlərin qorunması, iqtisadiyyatın, elmin, təhsilin, səhiyyənin inkişafı və insanların rifah halının yaxşılaşdırılmasında, ümummilli liderin xalqın təkidli tələbi ilə ikinci dəfə siyasi hakimiyyətə qayıdışından sonra müstəqil Azərbaycan dövlətinin yaranıb möhkəmlənməsində, beynəlxalq aləmdə tanınmasında tarixi xidmətlərindən danışmış, onun nurlu ideyalarının ölkəmizin parlaq gələcəyinə yönəldiyini vurğulamışlar. Bildirilmişdir ki, "Sabaha doğru" kitabına ümummilli lider Heydər Əliyevin və bu dahi şəxsiyyətin siyasi xəttini böyük uğurla davam etdirən Prezident İlham Əliyevin çıxışları daxil edilmişdir. Nəşrə rəmzi olaraq məhz 40 çıxış salınmışdır. Bu çıxışların hər biri Azərbaycan dövlətinin qarşısında duran prioritetləri müəyyənləşdirmək, ölkənin taleyüklü problemlərini həll etmək baxımından xüsusi əhəmiyyətə malikdir. Diqqətə çatdırılmışdır ki, kitaba daxil edilən çıxışlar ümummilli liderin fəaliyyətinin ən müxtəlif aspektlərini - andiçmə mərasimləri, xarici və daxili siyasət, Qarabağ müharibəsi, iqtisadiyyat, neft strategiyası, ordu quruculuğu, mədəniyyət, təhsil və digər sahələri əhatə edir.

Çıxış edənlər bildirmişlər ki, bu gün Heydər Əliyev kursu yaşayır və qalib gəlir. Prezident İlham Əliyev bütün fəaliyyəti ilə təsdiqləyir ki, Heydər Əliyev siyasəti, Heydər Əliyev yolu bu gün yeganə düzgün yoldur. Dövlətimizin başçısının kitaba daxil edilən çıxışları da bir daha göstərir ki, siyasətdə varislik davam edir.

Tədqiqatçılar, politoloqlar, tələbələr və geniş oxucu kütləsi üçün nəzərdə tutulmuş və nəfis şəkildə tərtib edilmiş kitabda Azərbaycan Dövlət Teleqraf Agentliyinin (AzərTAc) materiallarından istifadə olunmuşdur.

AzərTAc

Azərbaycan.- 2009.- 11 iyul.- S. 2.