Heydər Əliyev Azərbaycan xalqının misilsiz təəssübkeşi, dövlətçiliyimizin xilaskarıdır

İyulun 10-da Atatürk Mərkəzində ümummilli lider Heydər Əliyevin Azərbaycanda birinci dəfə hakimiyyətə gəlməsinin 40 illiyinə həsr olunmuş "Bir millət, iki dövlət: münasibətlərin inkişafında Heydər Əliyev fenomeni gənc liderlərin gözü ilə" adlı konfrans keçirilmişdir.

Konfransda Milli Məclisin deputatları, gənclər təşkilatlarının, eləcə də Türkiyənin hakim Ədalət və İnkişaf Partiyası Gənclər Birliyinin nümayəndələri iştirak etmişlər.

Yeni Azərbaycan Partiyası (YAP) Gənclər birliyinin sədri Ramil Həsənov tədbiri açaraq 40 il əvvəl - 1969-cu il iyulun 14-də ümummilli lider Heydər Əliyevin Azərbaycanda siyasi hakimiyyətə gəlişi ilə xalqımızın tarixində yeni dövrün başlandığını bildirmiş, dahi rəhbərin Vətən və xalq qarşısındakı xidmətlərindən bəhs etmişdir. O qeyd etmişdir ki, Azərbaycan gəncliyinin inkişafı və çiçəklənməsi də məhz ulu öndərin adı ilə bağlıdır.

Türkiyənin Ədalət və İnkişaf Partiyası Gənclər Birliyi sədrinin müavini İsmayıl Karaosmanoğlu çıxışında Azərbaycan-Türkiyə münasibətlərindən danışmış, ölkələrimiz arasındakı dostluq və qardaşlıq əlaqələrinin inkişafında ümummilli lider Heydər Əliyevin və Türkiyənin sabiq prezidenti Süleyman Dəmirəlin xidmətlərini xüsusi qeyd etmişdir.

Gənclər və idman nazirinin müavini İntiqam Babayev ulu öndərin gənclərə qayğısından danışmış, Azərbaycan gəncliyinin qazandığı bugünkü uğurların məhz Heydər Əliyevin uzaqgörən siyasətinin nəticələri olduğunu bildirmişdir.

Sonra Milli Məclisin deputatları Qənirə Paşayeva, Fuad Muradov, "İRƏLİ" ictimai birliyinin sədri Ceyhun Osmanlı və başqaları çıxış etmiş, Heydər Əliyevin Azərbaycan dövlətçiliyinin möhkəmlənməsi və inkişafındakı xidmətlərindən danışmışlar. Bildirilmişdir ki, Heydər Əliyev özünün dərin zəkası, liderlik xarizması, milli ideallara, adət-ənənələrə möhkəm bağlılığı, zəngin idarəçilik keyfiyyətləri ilə hələ ötən əsrin 70-80-ci illərində qanunçuluğun qorunması və möhkəmləndirilməsi istiqamətində prinsipial addımlar atmış, xalqın hüquqlarının əzmkar müdafiəçisinə çevrilməklə milli ruh, iradə və özünüdərk meyillərinin ictimai şüurda möhkəmləndirilməsinə nail olmuşdur. Azərbaycan xalqı fenomenal liderinin rəhbərliyi altında yüksək iradə nümayiş etdirməklə milli yaddaşını, mənəvi-əxlaqi dəyərlərini, tarixi dövlətçilik ənənələrini qoruyub saxlamağa nail olmuş, dövlət müstəqilliyi üçün zəruri siyasi-hüquqi və iqtisadi zəmin formalaşdırmışdır.

Bu gün 1969-cu ildən başlayan müasir tariximizi, ulu öndərimizi həm də ona görə qürurla xatırlayırıq ki, ölkəmiz müstəqilliyini bərpa edəndən sonra da Azərbaycanın inkişaf etməsində, onun dünya dövlətləri arasında özünə layiqli yer tutmasında ümummilli lider Heydər Əliyevin müstəsna rolu olmuşdur.

Çıxış edənlər bu gün Prezident İlham Əliyevin uğurla davam etdirdiyi və ölkəmizi dünyanın qabaqcıl dövlətləri sırasına çıxaran məqsədyönlü daxili və xarici siyasətin təməlinin 1969-cu ildə ulu öndərimiz tərəfindən qoyulduğunu diqqətə çatdırmışlar. Ümummilli liderin siyasi xəttinin layiqli davamçısı Prezident İlham Əliyevin rəhbərliyi altında qazanılan uğurları Heydər Əliyevin zəkasından doğan işığın sönməzliyi kimi qiymətləndirmişlər.

AzərTAc

Azərbaycan.- 2009.- 11 iyul.- S. 2.