"Rusiya bu gün" seminarı başa çatmışdır

İyulun ilk həftəsində Rusiya İnformasiya Teleqraf Agentliyinin (İTAR-TASS) təşkilatçılığı ilə keçirilmiş "Rusiya bu gün - müasir mərhələdə gənclər siyasəti" adlı seminar başa çatmışdır.

Seminarda Azərbaycan Dövlət Teleqraf Agentliyinin (AzərTAc) təmsilçiləri ilə yanaşı, Ukrayna Milli İnformasiya Agentliyinin (Ukrinform), Belarus Teleqraf Agentliyinin (BelTA), "Moldpress" Dövlət İnformasiya Agentliyinin (Moldova) əməkdaşları da iştirak etmişlər.

Seminar iştirakçıları Moskvada İTAR-TASS-ın redaksiyalarında olmuş, Veliki Novqorodda vilayətin qubernatoru, şəhərin meri ilə görüşmüş, Sankt-Peterburqa getmişlər.

Görüşlərdə Rusiyanın bu günü, hazırda həyata keçirilən dövlət gənclər siyasəti barədə ətraflı məlumat alan jurnalistlər həm də adı çəkilən şəhərlərdə tarixi abidələrlə tanış olmuş, müzeyləri gəzmişlər. Qonaqlar Tretyakov Qalereyası, Novqorod Kremli, Ermitaj, İsaakov kilsəsi, Petropavlovsk qalası, Petrodvorets və Peterqofdan zəngin təəssüratla ayrılmışlar.

Azərbaycan.- 2009.- 11 iyul.- S. 3.