İyulun 13-də Yeni Azərbaycan
Partiyası (YAP) "Hyatt Regency" mehmanxanasında ulu
öndər Heydər Əliyevin Azərbaycanın rəhbəri
seçilməsinin 40 illiyinə həsr olunmuş tədbir
keçirmişdir.
Prezident
Administrasiyasının rəhbəri akademik Ramiz Mehdiyevin,
Milli Məclis deputatlarının, vaxtilə ulu öndərlə
işləmiş tanınmış şəxslərin, elm, ədəbiyyat
və mədəniyyət xadimlərinin iştirak etdikləri
tədbiri açan YAP sədrinin müavini - icra katibi, Milli Məclisin
deputatı Əli Əhmədov demişdir ki, 40 il bundan əvvəl
Azərbaycanın, onun xalqının həm tarixində, həm
də taleyində əhəmiyyətli dönüş
başlamışdır. İndi dünyanın bütün
guşələrində dəyişiklikdən
danışırlar.
Hamı birmənalı
şəkildə etiraf edir ki, dünya dəyişməlidir. Çoxları
etiraf edir ki, onların yaşadıqları ölkədə
ciddi dəyişikliklər zəruridir. 40 il bundan əvvəl
Azərbaycanda da insanlar dərk edirdilər ki, respublikada ciddi dəyişikliklərə
ehtiyac var. Çünki əks təqdirdə, Azərbaycan
daha böyük bəlalara düçar ola bilər. Qırx
il bundan əvvəl, iyulun 14-də Heydər Əliyevin Azərbaycana
rəhbər seçilməsi haqqında qərar ictimai
düşüncədə və fərdi düşüncədə
respublikanın dəyişilməsinə ehtiyacın dərk
edilməsi ilə üst-üstə düşdü. Sonrakı
illər ərzində Azərbaycan ciddi şəkildə dəyişdi.
Söhbət təkcə Azərbaycanın
iqtisadiyyatının, o cümlədən sənayenin, kənd
təsərrüfatının qısa bir zaman ərzində əhəmiyyətli
dərəcədə dircəldilməsindən getmir. Əsas
məsələ, bütövlükdə Azərbaycanın
milli-mənəvi dəyərlər sisteminin dəyişməsində
ifadə olunan yeniliklərdə idi. Məhz bu yeniliklər
xüsusi əhəmiyyət, daha böyük məna kəsb
edirdi. Əgər mənəvi sahəni əhatə edən dəyişikliklər
olmasaydı, ozamankı cəmiyyəti içəridən
sarsıdan, dağıdan səbəblər aradan
qaldırılmasaydı, yəqin ki, qısa müddətdə
Azərbaycan sürətlə inkişaf edə bilməzdi.
Natiq
xatırlatmışdır ki, 1969-cu ildə Heydər Əliyev
rəhbər seçiləndə Azərbaycan ozamankı
SSRİ-nin ən geridə qalmış respublikası idi.
1971-ci ildə isə Azərbaycan inkişafın sürətinə
görə SSRİ-də ən qabaqcıl bir respublikaya
çevrildi. Əlbəttə, mənəviyyatı, mənəvi-psixoloji
mühiti, insana münasibəti dəyişmədən,
insanın həm cəmiyyətə, həm də ölkəyə
və rəhbərliyə münasibətini dəyişmədən
bu qədər sürətli inkişafı təmin etmək
mümkün olmazdı. Ona görə də Heydər Əliyev
40 il bundan əvvəl Azərbaycana rəhbər seçiləndə
qarşıda başlıca vəzifə kimi, ilk növbədə,
Azərbaycan xalqının mənəviyyatının, mənəvi
dəyərlərinin, ölkənin mənəvi-psixoloji
mühitinin ciddi surətdə dəyişdirilməsi dururdu. Cavan,
qətiyyətli və enerjili lider bu vəzifənin öhdəsindən
layiqincə gəldi.
Böyük tarixi şəxsiyyətlərə
zaman özü həmişə ehtiyac duyur və
respublikamızın Heydər Əliyevə ehtiyacı olanda o,
bu tarixi missiyanı öz üzərinə götürərək
Azərbaycanda siyasi rəhbərliyə gəldi. Güman edirəm
ki, bu salonda əyləşənlərin böyük əksəriyyəti
o zaman Heydər Əliyevin Azərbaycanın rəhbəri
seçilməsinin və bundan sonra baş verən dəyişikliklərin
nə qədər ciddi zərurət olduğunu bilavasitə həmin
dövrdəki proseslərin şahidi və
iştirakçıları kimi yaxşı bilirlər.
Azərbaycan 1990-cı
illərin əvvəllərində hamımıza məlum
olan fəlakət, uçurum qarşısında olanda yenə
də tarixin, xalqın çağırışına səs
verən Heydər Əliyev öz xilaskarlıq
missiyasını yerinə yetirmiş oldu. Beləliklə də,
1969-cu ildə əsası qoyulan yol, müəyyənləşdirilən
siyasət Azərbaycana xidmət edir. Bu 40 ildə dünya
çox dəyişmişdir. Sovetlər ittifaqı süquta
uğramışdır, Azərbaycan indi müstəqil
dövlət kimi yaşayır və inkişaf edir. Heydər Əliyev
siyasəti ötən 40 il ərzində Azərbaycanın
simasını kökündən dəyişib və
hazırda həmin siyasət ulu öndərin layiqli varisi tərəfindən
uğurla davam və inkişaf etdirilir. 1970-ci illərdə Azərbaycan
sovetlər birliyinin ən dinamik inkişaf edən
respublikası imicini, adını qazandı. İndi isə məmnunluq
hissi ilə deyirik ki, Heydər Əliyevin memarı və
qurucusu olduğu müasir, müstəqil Azərbaycan dövləti
bütün dünyada ən dinamik iqtisadiyyatı olan, ən
böyük sürətlə inkişaf edən dövlət
kimi tanınmışdır. Bu onu göstərir ki, Heydər
Əliyevin müəyyənləşdirdiyi siyasət, yol
bütün ideoloji çərçivələrdə əhəmiyyətli
dəyişikliklərin baş verməsinə baxmayaraq,
xalqımıza, Vətənimizə xidmət edib və bu
gün də xidmət etməkdədir.
Ə.Əhmədov
vurğulamışdır ki, bu tədbirə
toplaşanların çoxu 40 il ərzində ayrı-ayrı
mərhələlərdə Heydər Əliyevin ətrafında
olan, onun siyasətinin həyata keçirilməsində
bilavasitə iştirak edən, Azərbaycanın
inkişafına, yüksəlişinə, tərəqqisinə,
güclənməsinə özlərinin əhəmiyyətli
töhfəsini verən insanlardır. Azərbaycanda baş verən
dəyişikliklər Heydər Əliyevin rəhbərliyi
altında, onun siyasətinin həyata keçirilməsi nəticəsində,
bu insanların əməyinin nəticəsində
mümkün olmuşdur. Təbiidir ki, Heydər Əliyevin
etimadını qazanmaq fövqəladə bir iş idi. Heydər
Əliyevin həyata keçirdiyi siyasətə bu və ya digər
dərəcədə töhfə vermək, hər hansı
bir sahəyə rəhbərlik etmək qədər
böyük etimadı, xalqa, dövlətə xidmətin məsuliyyətini
təsəvvür etmək mümkün deyildir.
Bu salondakı insanlar
Heydər Əliyevin bilavasitə etimadı sayəsində həmin
tarixi missiyanı öz üzərlərinə
götürmüş və layiqincə də yerinə
yetirmişlər. Onların arasında 1969-cu ildən etibarən
Heydər Əliyevlə bir yerdə olanlar da, Azərbaycan
müstəqil dövlət olduqdan sonra Heydər Əliyev
siyasətinin həyata keçirilməsinə qoşulmuş
cavanlar da, gənclər də var.
Heydər Əliyevin
yaratdığı Yeni Azərbaycan Partiyasının hər
bir üzvü - ulu öndərin siyasətinə,
ideyalarına sadiq qaldığınıza görə sizin hər
birinizə minnətdardır. Güman edirəm ki, Heydər Əliyevin
Azərbaycana rəhbər seçilməsinin 40 illiyini ölkənin
hər bir guşəsində təntənə ilə qeyd
etdiyimiz bu günlərdə sizinlə görüşməyimiz,
sizinlə bir yerdə oturmağımız, sizin əməyinizi
bir daha vurğulamağımız Heydər Əliyevin xatirəsinə
ən böyük hörmət və ehtiram əlaməti
olardı.
Mən sizi bu əlamətdar
gün münasibətilə təbrik etmək istəyir, hər
birinizə bu yolda, bu siyasətin həyata keçirilməsində
öz ağsaqqal tövsiyələrinizi bundan sonra da verməyinizi
arzulayıram. Sizə möhkəm cansağlığı diləyir
və güman edirəm ki, bizim bugünkü tədbirimizdə
bu yolun ayrı-ayrı mərhələlərində
iştirak etmiş, Azərbaycanda tanınan və hörmət
edilən çox dəyərli insanlar öz fikirlərini
bölüşəcəklər.
Mən sizi təbrik etmək
istəyirəm. Bir daha Heydər Əliyev yoluna, Heydər Əliyev
siyasətinə, bugünkü Azərbaycanın Prezidenti
İlham Əliyevin həyata keçirdiyi siyasətə sədaqət
və bu yolda uğurlar arzu etmək istəyirəm.
Sonra uzun illər
ümummilli lider Heydər Əliyevin məsləkdaşları
olmuş, onun rəhbərliyi altında
çalışmış veteranlar çıxış edərək,
ulu öndərlə bağlı xatirələrini
bölüşmüşlər.
İlk
çıxış edən Lidiya Rəsulova demişdir ki,
dünyada dahi rəhbərlər çox olmuşdur və
onların haqqında çox yazılmışdır. Lakin
Heydər Əliyev fenomeni ondan ibarətdir ki, o həm XX, həm
də XXI əsrin dahisi olmuşdur. Mən xoşbəxt insanam
ki, Heydər Əliyevlə uzun müddət - ötən əsrin
həm 70-ci, həm də 90-cı illərində bir yerdə
işləmişəm.
Heydər Əliyevin
respublikaya rəhbərliyinin ilk dövründə mən Azərbaycan
Kommunist Partiyası Mərkəzi Komitəsində elm və tədris
müəssisələri şöbəsi müdirinin
müavini işlədim. Sonra Nəsimi Rayon Partiya Komitəsinin
birinci katibi, Azərbaycan Həmkarlar İttifaqları
Şurasının sədri oldum. Mən SSRİ və Azərbaycan
ali sovetlərinin deputatı seçilmişəm. Azərbaycan
KP MK-nın büro üzvü olmuşam. Bunları deməklə
Heydər Əliyevin mənim kimi cavan kadrlara etimad göstərdiyini
xatırlatmaq istəyirəm. Ulu öndərin müstəqil
Azərbaycana rəhbərliyi dövründə isə bir
müddət təhsil naziri işləmişəm. Mən də
həmişə çalışmışam ki, bu etimadı
doğruldam.
Əgər biz Heydər
Əliyevin respublikada siyasi hakimiyyətə hər iki gəlişi
arasında körpü salmaq istəsək, görərik ki,
bunlar Azərbaycanın ağır dövrlərində
olmuşdur. 1960-cı illərin sonunda Azərbaycan İttifaqda
sonuncu yerlərdən birini tuturdu. Heydər Əliyev burada
oturanların əksəriyyətindən ibarət öz
komandasını yığdı və işi elə qurdu ki,
artıq 1970-ci ildə, yəni, bir ildən sonra Azərbaycan
SSRİ-nin keçici Qirmızı bayrağına nail oldu. Azərbaycan
hər sahədə, xüsusilə də, kənd təsərrüfatı
sahəsində - istər pambıqçılıqda, istər
üzümçülükdə, istərsə də
taxılçılıqda çox böyük nailiyyətlər
qazandı.
Heydər Əliyevin
gözəl xüsusiyyətlərindən birinin xalqa
arxalanmaq, xalqla məsləhətləşmək olduğunu
vurğulayan L.Rəsulova onun müxtəlif sahələrin
mütəxəssisləri ilə görüşlərə
xüsusi diqqət yetirdiyini söyləmiş və 1980-ci ildə
baş vermiş bir hadisəni xatırlatmışdır. Həmin
il Azərbaycanın üzüm plantasiyalarında bol məhsul
yetişdirilmişdi, lakin havaların yağıntılı
keçməsi məhsulun çox hissəsinin məhv
olması təhlükəsini yaratmışdı. Həm
yerli, həm də Rusiya və Ukrayna alimləri ilə məsləhətləşmələrdən
sonra Heydər Əliyev kənd təsərrüfatı əməkçilərinə
müraciət etdi və insanlar gecə-gündüz işləyərək,
üzümü tezliklə yığdılar. Yəni, Heydər
Əliyev xalqla daim məsləhətləşir və xalq da
onu həmişə dəstəkləyirdi.
L.Rəsulova xalqın təkidli
tələbi ilə Heydər Əliyevin ikinci dəfə Azərbaycanda
hakimiyyətə qayıdışından sonra xalqa arxalanaraq,
tez bir zamanda respublikada vəziyyəti sabitləşdirdiyini,
iqtisadiyyatın bütün sahələrində nailiyyətlərin
əldə edildiyini diqqətə
çatdırmışdır. O, ulu öndərin
komandasının üzvlərinə göstərdiyi diqqət
və qayğının təzahürü kimi, onu ABŞ-a
müalicəyə göndərdiyini də
vurğulamışdır.
Yazıçılar
Birliyinin sədri, xalq yazıçısı Anar
çıxışında demişdir ki, şəxsiyyətin
tarixdə rolu, zamanın şəxsiyyətə və ya
şəxsiyyətin zamana təsiri həmişə
insanları düşündürən problemlərdən
olmuşdur. Heydər Əliyevin timsalında biz bu problemin bariz
nümunəsini görürük. Heydər Əliyev bir-birinə
zidd olan, iki quruluşda rəhbər vəzifələrdə
olmuş və həmişə öz şəxsiyyətini
saxlamış, görmək istədiyi işi
görmüşdür. Onun həyatının əsas
amalı öz xalqına xidmət etmək olmuşdur. Bir
çox insanlar kimi, mən də o fikirdəyəm ki, əgər
1989-cu ildə Heydər Əliyev Azərbaycana rəhbərlik
etsəydi, ya da Moskvada öz vəzifəsində qalsaydı,
Qarabağ məsələsi olmayacaqdı. Yaxud 1993-cü ildə
Heydər Əliyev ölkədə ikinci dəfə hakimiyyətə
gəlməsəydi, Azərbaycan parçalanacaqdı. Azərbaycanda
artıq vətəndaş müharibəsi
başlanmışdı və bütün bunların
qarşısını Heydər Əliyev aldı.
1969-cu ildə Heydər Əliyevin
Azərbaycanda rəhbərliyə gəlməsindən sonra
gördüyü işləri xatırladan Anar ulu öndərin
ölkənin iqtisadi, mədəni tərəqqisi, o dövrdə
çoxlarına təəccüblü görünən bir
iş - Azərbaycanda hərbi kadrlar hazırlanması sahəsində
fəaliyyəti barədə danışmışdır. O
demişdir ki, keçmiş SSRİ-də Azərbaycanın
neçə-neçə yazıçı, şair, bəstəkar,
rəssam və memarı ulu öndərin böyük səyləri
nəticəsində ən yüksək ada - Sosialist Əməyi
Qəhrəmanı adına, eləcə də SSRİ
Dövlət mükafatına layiq
görülmüşdür. Heydər Əliyev
çalışırdı ki, ədəbiyyat, mədəniyyət
sahəsində Azərbaycanın nüfuzunu qaldırsın,
eyni zamanda, biz yazıçı və şairləri, o
cümlədən Bəxtiyar Vahabzadəni, Xəlil Rzanı,
hazırda bu salonda oturan Fikrət Qocanı da, Maqsud və
Rüstəm İbrahimbəyovları da, məni də
qoruyurdu. Çünki bizim barəmizdə Moskvaya çoxlu
yalan məlumatlar göndərilirdi. Lakin Heydər Əliyev
bunların qarşısını alırdı.
Sonda Anar Heydər Əliyevlə
olan səmimi söhbətlərini, ümummilli liderin ona
münasibətini bu yaxınlarda çap olunmuş
"Unudulmaz görüşlər" kitabında əks
etdirdiyini xatırladaraq demişdir ki, bizim vəzifəmiz ulu
öndəri, onunla görüşləri olduğu kimi
yazıb gələcək nəsillərə
çatdırmaqdır.
Azərbaycan Milli Elmlər
Akademiyasının (AMEA) vitse-prezidenti, akademik Akif Əlizadə
çıxışında bildirmişdir ki, məhz ötən
əsrin 70-ci illəri, Heydər Əliyevin respublikada rəhbərliyə
gəlməsindən sonra Azərbaycanda təhsil, elm və mədəniyyətin
intibah illəri olmuşdur. AMEA-da məhz bu illər dünya
elminin aparıcı istiqamətlərində tədqiqatlar
aparılmış, mühüm elmi nəticələr əldə
edilmişdir. Ulu öndər Heydər Əliyevin respublika
qarşısında qoyduğu məsul vəzifələrdən
irəli gələn məsələləri həll etmək
məqsədi ilə alimlərimiz bütün qüvvələrini
elmi tədqiqat işlərinin keyfiyyətinin yüksəldilməsinə,
elmi nailiyyətlərin istehsalatda tətbiqinə və ətraf
mühitin mühafizəsi problemləri üzrə
araşdırmaların genişləndirilməsinə, yeni
elmi ideyaların texniki nəticələrinin işlənilməsinə
və iqtisadiyyatın inkişafının əsas istiqamətlərinə
yönəldilməsinə səfərbər etdi. Bu illərdə
fizika, riyaziyyat, biologiya, astronomiya, neft kimyası, ictimai elmlər
sahəsində bir sıra fundamental işlər
görüldü. SSRİ-də ilk dəfə olaraq, AMEA-da təbiətin
və onda baş verən proseslərin kosmosdan tədqiqi kimi
xalq təsərrüfatı və müdafiə əhəmiyyətli
işlərə başlanıldı.
A.Əlizadə
vurğulamışdır ki, bugünkü 64 yaşlı
AMEA-nın intibahı məhz Heydər Əliyevin adı ilə
bağlıdır. XX əsrin 70-ci illərində Heydər Əliyevin
müdrik təşkilatçılığı sayəsində
AMEA dünyada şöhrət qazanmışdır. Ulu
öndərin 1997-ci ildə AMEA-nın üzvləri ilə
tarixi görüşü, proqram səciyyəli
çıxışı hələ uzun illər alimlərimizin
yaradıcılıq istiqamətlərini müəyyənləşdirməkdə
meyar olacaqdır. Heydər Əliyev 70-ci illərdə hakimiyyətdə
olduğu illərdə bugünkü müstəqil Azərbaycanın
iqtisadi, sosial və elmi-texniki potensialının
hazırlanmasını böyük uzaqgörənliklə həyata
keçirirdi. Məhz bunun nəticəsidir ki, SSRİ
dağıldıqdan sonra iqtisadi əlaqələrin birdən-birə
kəsildiyi şəraitdə Azərbaycan yaşaya bildi və
uğurla dünya iqtisadi inteqrasiyasına qoşuldu. Ulu öndərin
təşəbbüsü ilə 1970-80-ci illərdə
keçmiş İttifaqın ən nüfuzlu təhsil
ocaqlarına göndərilən yüzlərlə, minlərlə
gənc indi müstəqil respublikamızda ən mürəkkəb
siyasi, iqtisadi və mənəvi problemlərin həllində
öndə gedirlər.
Çıxışının
sonunda A.Əlizadə ulu öndər Heydər Əliyevin dahi
uzaqgörənliklə müəyyənləşdirdiyi yolla
hərtərəfli inkişaf edən Azərbaycanın
Prezident İlham Əliyevin məqsədyönlü siyasəti
nəticəsində regionda bütün sahələrdə
lider dövlətə çevrildiyini
vurğulamışdır.
Nazirlər Kabinetinin
baş məsləhətçisi İmran Əbilov 1969-cu ildən
1991-ci ilədək kənd təsərrüfatı nazirinin
müavini vəzifəsində işlədiyini söyləmiş,
ümummilli lider Heydər Əliyevin Mərkəzi Komitənin
birinci katibi seçildiyi ilk gündən aqrar sahəyə
verdiyi diqqət və qayğı barədə xatirələrini
danışmışdır. O demişdir ki, respublikada 1969-cu
ildə 600 min başa qədər qoyun-quzu, 200 min baş
qaramal qırılmışdı, mal-qara pis şəraitdə
saxlanılırdı, yem yox idi. Taxıl, pambıq,
üzüm, kartof, tütün istehsalı minimum həddə
enmişdi.
Heydər Əliyevin rəhbərliyi
dövründə isə Azərbaycana 1,2 milyon baş cins
qoyun, 300 min baş cins qaramal, hər il 1 milyon ton
qarışıq və qüvvəli yem gətirildi,
respublikada 100-dən çox iri heyvandarlıq kompleksi, 100-dən
çox quşçuluq fabriki tikilib istifadəyə verildi.
İri şərab,
konserv zavodları, çay, tütün fabrikləri və digər
müəssisələr tikildi. Kənd təsərrüfatı
gəlirli sahəyə çevrildi. Heyvandarlıq məhsulları
istehsalı 3-4 dəfə, üzüm istehsalı 6 dəfə,
pambıq 4 dəfə, tütün 6 dəfə artdı. Nəhəng
meliorativ qurğular tikildi, respublikaya güclü texnika,
maşın və avadanlıq gətirildi. Hər il respublika o
zaman ölkənin ən yüksək mükafatı
sayılan keçici Qırmızı bayraqlarla təltif
edildi. Rayon və kəndlərdə böyük abadlıq
işləri aparıldı. Bütün bunlar Heydər Əliyevin
gərgin əməyi, dərin zəkası, tələbkarlığı,
böyük dövlətçilik təcrübəsi
hesabına baş verdi. Keçmiş SSRİ-də hamı
onun işinə heyran idi, müəyyən məsələlərlə
bağlı Moskvaya gedərkən, onun hörməti sayəsində
hər yerdə qapılar üzümüzə açıq
idi.
Azərbaycan
keçmiş SSRİ-də, demək olar ki, ilk sıraya
çıxdı, məşhur oldu. Heydər Əliyev Moskvada
işləyəndə də daim Azərbaycanı düşünür,
ən çətin işlərdə kömək göstərirdi.
Heydər Əliyevin rəhbərliyi
altında işləmək həm çətin, həm də
böyük xoşbəxtlik idi. Biz yaxşı bilirdik ki, Heydər
Əliyevlə hər hansı bir məsələ və ya
problem haqqında danışmaq üçün nə qədər
ciddi hazırlaşmaq lazım idi. Bütün sahələr,
ixtisaslar üzrə mükəmməl məlumatı
vardı. Təəccüblənirdik ki, böyük dövlət
işləri ilə məşğul olan bu insan nə zaman
vaxt tapıb məsələni bu qədər tam dərinliyi
ilə öyrənmişdir. Onunla adi söhbətdə belə,
sən hər sözünə, danışığına
diqqət verməli idin. Bütün bunlar bizi öz üzərimizdə
çox işləməyə, məsuliyyətli olmağa
öyrədirdi.
O, hər kəsin
nöqsanını üzünə açıq deməyi,
doğru yol göstərməyi, düzəlməyəndə
isə onu tənbeh etməyi bacaran bir dövlət xadimi idi. Heydər
Əliyevin gözəl insani keyfiyyətlərini saymaqla
qurtarmaq olmaz. Elə bil ki, Allah onu insanlara cəsarətin, mərdliyin,
ədalətin, sadəliyin, dərin zəkanın, natiqliyin,
gözəl əxlaqın rəmzi və nümunəsi kimi
yaratmışdı.
Filologiya elmləri
doktoru, yazıçı-publisist, keçmiş SSRİ
dövründə uzun illər Dövlət Təhlükəsizliyi
Komitəsində məsul vəzifələrdə
çalışmış Yasif Nəsirli demişdir:
-Mən xoşbəxtəm
ki, bu gün mənəvi cəhətdən Heydər Əliyevin
adını çəkə bilirəm, ulu öndər
haqqında nə isə söyləmək istəyirəm. Buna
insanın mənəvi haqqı olmalıdır.
Y.Nəsirli Heydər Əliyevin
Azərbaycan KP MK-nın birinci katibi seçiləndən sonra
Mərkəzi Komitədə, daha sonra Dövlət Təhlükəsizliyi
Komitəsinə işə qəbul olunmasını
xatırlatmış, ümummilli lider ilə unudulmaz
görüşlərini yada salmış və Heydər Əliyevin
tövsiyələrinin onun həyatında böyük əhəmiyyət
kəsb etdiyini vurğulamışdır.
Son illər Azərbaycanda
qazanılan böyük nailiyyətlərin ulu öndər
Heydər Əliyevin siyasi xəttinin layiqli
davamçısı Prezident İlham Əliyevin rəhbərliyi
altında əldə edildiyini bildirən Y.Nəsirli Azərbaycanın
parlaq gələcəyinə əminliyini söyləmişdir.
Eyni zamanda, demişdir ki, veteranların vəzifəsi dahi Heydər
Əliyevin Azərbaycan xalqı qarşısında misilsiz
xidmətlərini gələcək nəslə
çatdırmaqdır.
Sonda Əli Əhmədov
yekun sözü ilə çıxış edərək demişdir
ki, Heydər Əliyev barədə xatirələrini
bölüşməyə çoxlarının mənəvi
haqqı vardır. Bu xatirələr Azərbaycanın şərəfli
tarixini yaratmış ulu öndərlə
çiyin-çiyinə işləmiş insanların həyatının
bir parçasıdır. Biz tariximizə də, bu tariximizi
yaradan dahi şəxsiyyət Heydər Əliyevə də
böyük hörmətimizi ifadə etməklə
yanaşı, eyni zamanda, ümummilli liderin ideyalarının
reallaşdırılması yolunda fədakarlıq göstərmiş
insanlara da hörmət və ehtiramımızı bildiririk. Azərbaycan
var olduqca, Heydər Əliyevin adı da onunla bir yerdə
çəkiləcək, nə qədər ki, Azərbaycan
xalqı Heydər Əliyev yoluna sadiqdir, Azərbaycan da
yüksələcək, ucalacaq və dünyanın ən zəngin,
qüdrətli və firavan ölkəsi, Heydər Əliyevin
şah əsəri kimi özünü daim təsdiqləyəcəkdir.
Biz həmişə Heydər Əliyevlə, bu dahi insanla fəxr
etmişik. Azərbaycanın qürur mənbəyi Heydər Əliyevdir,
onun qurub-yaratdığı müstəqil dövlətimizdir,
bu dövlətin tarixdə və bugünkü praktikada
nümunəsi olmayan sürətlə inkişaf etdirən Azərbaycanın
Prezidenti İlham Əliyevdir. Biz Heydər Əliyev siyasətinə
sadiq qalaraq dövlətimizə, Vətənimizə və
Prezidentimizə xidmət edirik. Güman edirəm ki, bu, Heydər
Əliyevin xatirəsi önündə hər birimizin, bu
salonda oturan hər kəsin, Azərbaycanın hər bir vətəndaşının
müqəddəs borcudur. Heydər Əliyev yolu daim
yaşayacaqdır! Bu əlamətdar gün münasibətilə
hamınızı bir daha təbrik edirəm.
AzərTAc
Azərbaycan.- 2009.- 14 iyul.- S. 2, 3.
