Ümummilli lider Heydər
Əliyevin hakimiyyətə gəlişinin 40 illiyi ilə
bağlı paytaxtın Səbail rayonunda keçirilən
silsilə tədbirlərə iyulun 13-də təntənəli
yığıncaqla yekun vurulmuşdur. Əvvəlcə tədbir
iştirakçıları Heydər Əliyev Fondunda ulu
öndərin həyat və fəaliyyətini əks etdirən
zəngin ekspozisiya ilə tanış olmuşlar.
Azərbaycan Dövlət
Musiqili Komediya Teatrında rayon icra strukturlarının, idarə,
müəssisə və təşkilatlarının, ali və
orta təhsil ocaqlarının, veteran və gənclər təşkilatlarının,
rayon ictimaiyyəti nümayəndələrinin, Milli Məclis
üzvlərinin və çoxsaylı qonaqların
iştirakı ilə keçirilən təntənəli tədbirdə
Heydər Əliyevin siyasi və dövlətçilik fəaliyyətindən
bəhs edilmiş, görkəmli şəxsiyyətin həyat
yoluna geniş spektrdə nəzər
salınmışdır. Tədbirdən əvvəl
nümayiş etdirilən qısametrajlı videofilm uzun və
şərəfli ömrün ayrı-ayrı səhifələri
haqqında mərasim iştirakçılarında əyani təsəvvür
yaratmışdır.
Səbail Rayon İcra
Hakimiyyətinin başçısı Asif Əsgərov
öz məruzəsində həyatını hədsiz dərəcədə
sevdiyi doğma Azərbaycanının tərəqqisinə və
inkişafına həsr edən Heydər Əliyevin şərəfli
ömür yolunun, siyasi və dövlətçilik fəaliyyətinin
müxtəlif parametrləri üzərində ətraflı
dayanmışdır. O bildirmişdir ki, Azərbaycanda
yaşayan bütün xalqların liderinə
çevrilmiş, əməlləri ilə milyonların
yaddaşında əbədi iz buraxmış Heydər Əliyevin
Azərbaycanda rəhbər olduğu 35 il müddətində
ölkəmiz geridə qalmış aqrar respublikadan xalq təsərrüfatının
əsas sahələrinin çox sürətlə inkişaf
etdiyi bir respublikaya çevrilmişdir. Azərbaycanın yeni
tarixinin bütöv bir mərhələsi, bilavasitə
dünya səviyyəli siyasətçi və dövlət
başçısı, zəmanəmizin əzəmətli və
bənzərsiz şəxsiyyəti Heydər Əliyevin
adı ilə bağlıdır. Ümummilli liderin adı hər
bir azərbaycanlının qəlbində, sadəliyi,
xeyirxahlığı, səmimiyyəti, alicənablığı,
vətənpərvərliyi və bütün digər
yüksək insani dəyərliliyi ilə unudulmaz izlər
qoyan müqəddəs varlığı ehtiva edir. Bu dahi
insanın adı xalqın simvoluna, əməlləri isə
şəxsi hünər rəmzinə çevrilmiş, həyat
və fəaliyyəti doğma xalqına və torpağa məhəbbət
və sədaqət meyarı olmuşdur.
Asif Əsgərov məruzəsində
vurğuladı ki, bu böyük azərbaycanlının
tariximizdəki yeri, missiyası və ölkə
qarşısındakı misilsiz xidmətləri barədə
çox deyilsə, çox yazılsa da, etiraf etmək
lazım gəlir ki, Heydər Əliyevə həsr olunmuş
çoxsaylı kitabların, məqalələrin,
araşdırmaların müəllifləri onun bütün
aspektlərini tam açmağa müvəffəq
olmayıblar. Ulu öndərin siyasi portretini tam
dolğunluğu ilə yaratmaq olduqca məsuliyyətli
işdir. Çünki Heydər Əliyev bütöv bir
tarixi epoxanın simasıdır. Natiqin qeyd etdiyi kimi,
ümummilli lider azərbaycanlı olması ilə fəxr
etdiyi kimi, hər bir azərbaycanlı da bu gün Heydər Əliyevin
ən böyük sənət əsəri olan müstəqil,
inkişaf etməkdə olan Azərbaycanın vətəndaşları
olmaqdan qürur duyur, böyük öndərə hörmət
və ehtiramını onun ideyaları ətrafında daha da
sıx birləşməklə nümayiş etdirir.
Ümummilli lider Heydər
Əliyevin 40 il öncə hakimiyyətə gəlməsi
iqtisadi uçurum, mənəvi tənəzzül, siyasi
vassallıq məngənəsində çapalayan Azərbaycanın
yüksəlişinə zəmin yaratdı. Ölkəmiz
sovetlər birliyinin ən inkişaf etmiş respublikasına
çevrildi, vətəndaşlarımız tarixi köklərinə
qayıdaraq milli mənliyini, bənzərsiz ədəbiyyata,
mədəniyyətə, adət-ənənələrə
sahib olduğunu aydın dərk etdi. Paytaxtın Səbail
rayonunda Heydər Əliyevin şəxsi təşəbbüsü
və dəstəyi ilə ucaldılan çoxsaylı
memarlıq inciləri, həmişəyaşar abidələr
var. Ulu öndərin Azərbaycana rəhbərlik etdiyi illərdə
rayon ərazisində bir sıra dövlət qurumları,
güc strukturları üçün yeni inzibati binalar, ali təhsil
ocaqları üçün korpuslar, səhiyyə obyektləri,
mədəniyyət və istirahət kompleksləri
tikilmiş, parklar salınmışdır. Həsən bəy
Zərdabinin, Əliağa Vahidin, Yusif Məmmədəliyevin,
A.Puşkinin abidələri bu rayonun
yaraşığını qat-qat artırır.
Heydər Əliyevin Azərbaycana
rəhbərlik etdiyi bütün dövrlər ərzində,
o cümlədən müstəqil Azərbaycanın Prezidenti
kimi fəaliyyət göstərdiyi on ildə həmişə
xalqımızın milli maraqlarını dəqiq müəyyən
etdiyini, ictimai-siyasi, iqtisadi, mədəni və digər sahələrdə
qazanılan böyük uğurların memarı olduğunu
görmək çətin deyil. Ulu öndər bütün
bu illər ərzində xalqın maddi rifah halının
yaxşılaşdırılması, aztəminatlı əhalinin
sosial ehtiyaclarının ödənilməsindən
ötrü bütün mümkün tədbirlərin həyata
keçirilməsi üçün yorulmadan fəaliyyət
göstərmişdir. Tale elə gətirdi ki, Heydər Əliyev
Azərbaycana rəhbərlik etdiyi zaman başladığı
tarixi missiyanın şərəfli və müqəddəs
yolu sonradan müstəqil, suveren Azərbaycan dövlətinin
Prezidenti kimi uğurla, ardıcıl şəkildə davam
etdirdi. Uğurlu xarici siyasət strategiyasının
formalaşdırılması, separatizmin cilovlanması, cəbhədə
atəşkəs əldə edilməsi, qanunsuz silahlı dəstələrin
ləğvi, xarici investisiyaların ölkəyə cəlbi,
"Əsrin müqaviləsi"nin imzalanması, yeni iqtisadi
münasibətlərə keçid, torpaq islahatı,
qanunvericilik bazasının Avropa standartlarına
uyğunlaşdırılması ümummilli liderin Qurtuluş
epopeyasının qürur doğuran səhifələridir. Bu,
ilk növbədə, Heydər Əliyevin kifayət qədər
mükəmməl daxili və xarici siyasətinin
doğurduğu məntiqi reallıq kimi dəyərləndirilməlidir.
Məhz bu siyasət nəticəsində Azərbaycan real
siyasi və iqtisadi təhlükələrdən uzaqlaşaraq
öz suverenliyini qoruyub saxlaya bildi. Müstəqil Azərbaycana
rəhbərlik etdiyi on il ərzində Heydər Əliyev
respublikada dövlətçiliyin real inkişaf modelini
yaratmağa müvəffəq oldu.
Səbail Rayon İcra
Hakimiyyətinin başçısı Asif Əsgərovun məruzəsində,
eləcə də Milli Məclisin deputatı Fəttah Heydərovun,
Milli Məclisin İqtisadi siyasət komitəsinin sədri,
akademik Ziyad Səmədzadənin, Azərbaycan Respublikası
Prezidenti yanında Dövlət İdarəçilik
Akademiyasının rektoru, professor Seyfəddin Qəndilovun, Azərbaycan
Dövlət Pedaqoji Universitetinin magistri Səbuhi Məmmədovun,
xalq artisti Laləzar Mustafayevanın
çıxışlarında ulu öndər Heydər Əliyevin
çoxşaxəli siyasi və dövlətçilik fəaliyyəti
hərtərəfli təhlil edilmiş, onun Azərbaycan
xalqı qarşısında xidmətləri yad olunmuşdur. Qeyd
olunmuşdur ki, əsası ümummilli lider tərəfindən
qoyulmuş və bu gün onun layiqli siyasi varisi Prezident
İlham Əliyevin böyük uğurla davam etdirdiyi milli
dövlətçilik siyasəti və iqtisadi inkişaf
strategiyası xalqımız tərəfindən dəstəklənir
və böyük rəğbətlə qarşılanır.
Azərbaycan bu gün nəinki regionun, eləcə də
dünyanın iqtisadi cəhətdən inkişaf etmiş
ölkələri sırasında öz sözünü deməkdədir.
Akif CABBARLI
Azərbaycan.- 2009.- 14
iyul.- S. 8.