Ankarada Nabukko layihəsinə dair hökumətlərarası saziş imzalanmışdır

Dünyanın 20 ölkəsinin energetika nazirlərinin iştirak etdiyi mərasimdə Azərbaycanı sənaye və energetika naziri Natiq Əliyev təmsil etmişdir.

Mərasimi giriş sözü ilə açan Türkiyənin Baş naziri Rəcəb Tayyib Ərdoğan demişdir ki, sazişin imzalanması ilə Nabukko layihəsinin həyata keçirilməsinin hüquqi bazası yaradılmışdır. Dost və qardaş ölkələrin energetika sahəsində əməkdaşlığının yeni mərhələsi açılmışdır. Bəzi dairələr bu layihəyə xəyal kimi baxırlar. Amma unutmayaq ki, bir vaxt Bakı-Tbilisi-Ceyhan boru xətti də bu cür dəyərləndirilirdi. Biz Azərbaycan, Türkmənistan, Misir qazının, habelə gələcəkdə Rusiya qazının da Nabukko kəməri ilə nəql ounacağına inanırıq.

Sonra Avropa Komissiyasının sədri Joze Manuel Barrozu, Rumıniyanın Baş naziri Emil Bok, Macarıstanın Baş naziri Qordon Baynayi, Bolqarıstanın Baş naziri Sergey Stanişev, Avstriyanın Baş naziri Verner Fayman və Türkiyənin Baş naziri Rəcəb Tayyib Ərdoğan layihənin həyata keçirilməsi ilə bağlı hökumətlərarası sazişi imzalamışlar. Bildirilmişdir ki, layihə Avropanın enerji təhülkəsizliyi üçün olduqca əhəmiyyətlidir.

Boru xəttinin inşasına 2011-ci ildə, ilk mavi yanacağın xəttə vurulmasına isə 2014-cü ildə başlanacaqdır.

İqtisadi böhrana baxmayaraq, Avropa İttifaqı layihəni tam şəkildə dəstəkləyəcəyini bəyan etmişdir.

İmzalanma mərasimindən sonra layihənin tərəfdaşları və qaz hasilatçısı olan ölkələr geniş müzakirələr aparmışlar.

İraq Nabukko boru xəttinə ildə 15 milyard kubmetr təbii qaz verəcəyini bəyan etmişdir. Sonda müzakirələrin yekununa dair mətbuat konfransı keçirilmişdir.

Mərasimdə Gürcüstan Prezidenti Mixeil Saakaşvili, İraqın Baş naziri Nuri əl-Maliki, ABŞ-ın Avrasiya enerji məsələləri üzrə xüsusi səfiri Riçard Morninqstar da iştirak edirdilər.

Oqtay BAYRAMOV,

AzərTAc-ın xüsusi müxbiri

Ankara

Azərbaycan.- 2009.- 14 iyul.- S. 15.