Azərbaycan hökuməti ilə Avropa İttifaqı arasında hava xidmətlərinə dair saziş imzalanmışdır

Azərbaycan Respublikası Dövlət Mülki Aviasiya Administrasiyasının direktoru Arif Məmmədovun rəhbərlik etdiyi nümayəndə heyəti iyulun 7-8-də Avropa Mülki Aviasiya Konfransının (ESAS) Strasburqda (Fransa) keçirilmiş 31-ci geniş sessiyasında iştirak etmişdir.

Üç ildən bir keçirilən iclasa üzv dövlətlərin aviasiya administrasiyalarının rəhbərləri ilə yanaşı, beynəlxalq təşkilatların (ACAC, AFCAC və LACAC) müşahidəçiləri də dəvət olunmuşdular.

Dövlət Mülki Aviasiya Administrasiyasından bildirmişlər ki, sessiyada Avropa Şurası baş katibinin, Beynəlxalq Mülki Aviasiya Təşkilatı (ICAO) prezidentinin, habelə ECAC-nin məsul şəxslərinin məruzələri dinlənilmişdir. Məruzələrdə uçuşların və ətraf mühitin təhlükəsizliyi, sənədləşdirmənin sadələşdirilməsi, aviasiya təhlükəsizliyi məsələlərinə toxunulmuş, Avropa hava nəqliyyatının 2020-ci il üçün inkişaf proqnozunu müəyyən edən iqtisadi amillər vurğulanmışdır.

Azərbaycan Prezidentinin 2009-cu il 6 iyul tarixli 370 nömrəli sərəncamı ilə verilmiş səlahiyyətə əsasən Dövlət Mülki Aviasiya Administrasiyasının direktoru Arif Məmmədov iyulun 7-də iclas çərçivəsində "Azərbaycan Respublikası hökuməti ilə Avropa İttifaqı arasında hava xidmətlərinin müəyyən aspektlərinə dair saziş"i ("Üfüqi saziş") Azərbaycan hökuməti adından imzalamışdır. Azərbaycanın Nəqliyyat Nazirliyi tərəfindən 2004-cü il noyabrın 14-də paraflanmış bu sazişin imzalanması Azərbaycan ilə Avropa İttifaqı arasında mülki aviasiya sahəsində əməkdaşlığın genişləndirilməsinə yönəlmişdir.

Bundan əlavə, sessiyanın gündəliyinə uyğun olaraq, Uçuşların Təhlükəsizliyi üzrə Avropa Agentliyi (EASA) ilə Avropa İttifaqının üzvü olmayan 11 dövlət arasında "İşçi saziş"in ("Working Arrangement") imzalanma mərasimi keçirilmişdir. Həmin 11 dövlətdən biri də Azərbaycandır. İlk dəfə bu sənəd "Azərbaycan Hava Yolları" Dövlət Konserni ilə EASA arasında 2006-cı il dekabrın 6-da imzalanmışdı. Ölkəmizin də üzv olduğu Avropanın Birləşmiş Aviasiya Administrasiyaları Qurumunun (JAA) 2009-cu il iyunun 30-da ləğv edildiyini nəzərə alaraq və mülki aviasiyada uçuşların təhlükəsizliyi ilə bağlı əməkdaşlığın davam etməsi üçün iyulun 7-də EASA ilə Dövlət Mülki Aviasiya Administrasiyası arasında yeni "İşçi saziş" imzalanmışdır.

AzərTAc

Azərbaycan.- 2009.- 14 iyul.- S.15.