Azərbaycan xalçasının YUNESKO-nun "Qeyri-maddi Mədəni irs üzrə reprezentativ siyahısı"na daxil edilməsinə dair "dəyirmi masa" keçirilmişdir

 

Mədəniyyət və Turizm Nazirliyinin dəstəyi və L.Kərimov adına Azərbaycan Xalçası və Xalq Tətbiqi Sənəti Dövlət Muzeyinin təşkilatçılığı ilə "Azərbaycan xalçasının YUNESKO-nun "Qeyri-maddi Mədəni irs üzrə reprezentativ siyahısı"na daxil edilməsinə dair: imkanlar, perspektivlər" mövzusunda "dəyirmi masa" keçirilmişdir.

Muzeyin direktoru Röya Tağıyeva Azərbaycan xalçasının adıçəkilən siyahıya salınması istiqamətində belə müzakirələrin əhəmiyyətindən danışmış, iştirakçıları fəal olmağa çağırmışdır.
Xalçaçılıqla məşğul olan müxtəlif qurumların, qeyri-hökumət təşkilatı nümayəndələrinin, xalçaçı rəssamların, dizaynerlərin, sənətşünasların iştirakı ilə keçirilən tədbirdə "Azərxalça" İstehsalat Birliyinin baş müdiri Əlisəfa Nuriyev, xalçaçı rəssam Eldar Mikayılzadə, Azərbaycan Rəssamlıq Akademiyasının dekorativ tətbiqi sənət kafedrasının dosenti Məmmədhüseyn Hüseynov və başqaları müzakirə olunan mövzu ilə bağlı fikirlərini açıqlamışlar.

Vurğulanmışdır ki, Azərbaycan xalçasının bu siyahıya daxil olunması ölkəmizdə xalçaçılığın inkişafına böyük təkan verəcəkdir. Təkcə paytaxtımızda deyil, bölgələrdə də bu sənətin yayılmasına yeni perspektivlər açılacaq, itirilmiş çeşnilərin bərpası və toxunulmasına marağı xeyli artıracaq, gənc nəslin mənəvi tərbiyəsinin gücləndirilməsində mühüm rol oynayacaqdır. Eyni zamanda, Azərbaycan xalçasının dünyada tanıdılmasına, təbliğinə geniş imkanlar yaradacaqdır.

Tədbirdə ölkəmizdə xalçaçılığın hazırkı vəziyyətindən, mövcud problemlərin aradan qaldırılması yollarından da ətraflı söhbət getmişdir.

 

 

AzərTAc

 

Azərbaycan.- 2009.- 14 iyul.- S. 15.