Bakıda "Mədəniyyətlərarası dialoqda gənclərin rolu" mövzusunda beynəlxalq seminar keçirilir

İyulun 13-də Bakıda "İRƏLİ", Azərbaycan Könüllüləri ictimai birliklərinin və Demokratik İştirak Naminə Avropa İnstitutunun birgə təşkilatçılığı ilə "Mədəniyyətlərarası dialoqda gənclərin rolu" mövzusunda beynəlxalq seminar başlanmışdır.

Avropa İttifaqı Gənclər Proqramının, Gənclər və İdman Nazirliyinin dəstəyi ilə keçirilən seminarda İspaniya, Rumıniya, Litva, Belarus, Ukrayna, Slovakiya, Serbiya, Hollandiya və Azərbaycan gəncləri iştirak edirlər.

Açılış mərasimində çıxış edən gənclər və idman nazirinin müavini İntiqam Babayev, "İRƏLİ"nin sədri Ceyhun Osmanlı və başqaları seminarın məqsədi və əhəmiyyətindən danışmış, gənclərə uğurlar arzulamışlar. Bildirilmişdir ki, məqsəd Avropa İttifaqına qonşu olan ölkələrdəki gənclər və gənclər təşkilatlarının birgə fəaliyyətini və əməkdaşlığını genişləndirmək, layihələr hazırlamaq, Azərbaycandakı gənclər təşkilatlarını tanıtmaq və Avropadakı təşkilatlarla əlaqələndirməkdir. Bundan başqa, seminarda əməkdaşlıq, layihələrin hazırlanması və digər mühüm məsələlər də müzakirə ediləcəkdir.

Seminar beynəlxalq təlimçilər tərəfindən aparılır və iyulun 18-dək davam edəcəkdir.

AzərTAc

Azərbaycan.- 2009.- 14 iyul.- S. 15.