Cəbhə bölgəsinə dövlət qayğısı davamlı hal alıb

Azərbaycanın sosial-iqtisadi yüksəlişi bu gün, ilk növbədə, insanların gündəlik həyatında özünü qabarıq büruzə verir. Prezident İlham Əliyevin son beş il ərzində imzaladığı məqsədyönlü fərman və sərəncamlar, qəbul etdiyi praqmatik qərarlar, habelə obyektiv reallıqdan irəli gələn addımları ölkəmizin sürətli inkişafına təkan vermişdir. Həyata keçirilən effektiv iqtisadi islahatlarla Azərbaycan dünyanın ən sürətlə inkişaf edən ölkəsinə çevrilmişdir.

"Azərbaycan Respublikası regionlarının sosial-iqtisadi inkişafı Dövlət Proqramı (2004-2008-ci illər)"nın uğurla icrası qarşıya qoyulan vəzifələrin layiqincə yerinə yetirildiyini sübut etdi. Hər bir iqtisadi rayonun spesifik xüsusiyyətləri nəzərə alınmaqla reallaşdırılan sosial-iqtisadi inkişaf proqramı bütün bölgələrimizin tarazlı inkişafını təmin etmiş, əhalinin sosial rifah halı yüksəlmiş, sahibkarlıq mühiti genişləndirilmişdir. Ötən beş ildə ölkə üzrə yeni yaradılan müəssisələrin 40 faizi, iş yerlərinin 80 faizi regionların payına düşür. Təkcə bir faktı qeyd etmək kifayətdir ki, son beş ildə Azərbaycan iqtisadiyyatı 2,6 dəfə artmış, adambaşına düşən gəlir 5500 dollara çatmışdır. Yoxsulluğun səviyyəsi kəskin şəkildə azalmış, 49 faizdən 13,2 faizə düşmüşdür...

Dövlət proqramının vaxtında və keyfiyyətlə icra olunması nəticəsində bütün rayonların siması dəyişmiş, paytaxtla bölgələr arasında kəskin inkişaf fərqi aradan qaldırılmışdır. Proqramın uğurla icrasını və son beş ildə bütün sahələrdə əldə olunmuş yüksək nailiyyətləri müsbət qiymətləndirən Prezident İlham Əliyev 2009-2013-cü illəri əhatə edən regionların yeni sosial-iqtisadi inkişafı dövlət proqramını təsdiqləmişdir. Yeni dövlət proqramı da qarşıdakı illərdə dinamik inkişafın davam etdirilməsi, investisiya mühitinin daha da yaxşılaşdırılması, qeyri-neft sektorunun inkişafının sürətləndirilməsi, sahibkarlığa dövlət dəstəyinin gücləndirilməsi kimi mühüm vəzifələrin həyata keçirilməsinə hesablanıb.

Ölkə başçısı tərəfindən qəbul edilmiş II Dövlət Proqramı bütün bölgələri əhatə etməklə növbəti beş ildə Azərbaycanın daha sürətli inkişafına gətirib çıxaracaqdır.

Xüsusilə də cəbhə bölgəsində yaşayan əhalinin məşğulluğunun təmin edilməsi, yeni infrastrukturların yaradılması mühüm dövlət proqramında öz əksini tapmışdır. Ümummilli lider Heydər Əliyev həmişə vurğulayardı ki, dövlətin ən mühüm vəzifəsi öz torraqlarından didərgin düşmüş vətəndaşlarının güzəranını yaxşılaşdırmaq, onların rroblem və qayğılarını həll etmək və ən nəhayət, işğal altında olan torraqların azadlığını təmin etməklə hər bir məcburi köçkünün öz doğma yurduna qayıtmasına nail olmaqdır. Bu siyasi kursun layiqli davamçısı Prezident İlham Əliyev ilk gündən bəyan etdi ki, Azərbaycanın bir qarış torrağı belə düşmənə verilməyəcək, nə qədər ki sülh danışıqları davam edir, çadırlarda, dəmiryol vaqonlarında məskunlaşmış vətəndaşların ev və işlə təmin olunması rroblemi həllini taracaq. Qısa müddətdə çadır şəhərciklərinin ləğv edilməsi və müasir qəsəbələrin inşası, soydaşlarımızın işlə təmin olunması dövlət başçısının verdiyi vədə sadiq olduğunu bir daha sübut etdi. Bu gün cəbhə bölgəsinə, təmas xəttinə baş çəkən hər bir kəs məcburi köçkünlərin normal yaşayış şəraiti ilə təmin olunmasının reallaşdığının şahidinə çevrilə bilər.

Xalqımızın ümummilli lideri Heydər Əliyev cəbhə bölgəsinə, burada yaşayan insanlara həmişə xüsusi qayğı və diqqət göstərmiş, onların üzləşdikləri problemləri aradan qaldırmaq, həyat şəraitini yaxşılaşdırmaq üçün zəruri tədbirlər görmüşdür. Heydər Əliyev siyasi kursunun layiqli davamçışı Prezident İlham Əliyevin cəbhə bölgəsinə dövlət qayğısını daha da artırmaq, bölgə sakinlərinin sosial müdafiəsini gücləndirmək məqsədilə həyata keçirdiyi genişmiqyaslı tədbirlər soydaşlarımız tərəfindən hədsiz minnətdarlıqla qarşılanır. Dövlət başçısının cəbhə bölgəsinə vaxtaşırı etdiyi səfərlər döyüş xəttinə yaxın ərazilərdə yaşayan əhalinin həyatında diqqətçəkən yeniliklərlə müşayiət olunur. Bölgələrdə sosial infrastruktur sürətlə bərpa edilir. Yeni qəsəbələr salınır, körpülər tikilir, asfalt yollar çəkilir.

Uzun illərin fasiləsindən sonra Ağdama, Tərtərə, Füzuliyə təbii qaz verilməsinin bərpa edilməsi, cəbhə bölgəsində çoxsaylı sosial obyektlərin tikilib istifadəyə verilməsi əhalidə fəal vətəndaş mövqeyinin formalaşmasına əhəmiyyətli təsir göstərir. Ərazisinin dörddə üç hissəsi işğal altında olan Ağdam, real çətinliklərə baxmayaraq, sosial-iqtisadi inkişafın sürətinə və miqyasına görə digər rayonlardan heç də geri qalmır. Dövlət başçısının təşəbbüsü ilə Ağdam rayonunun Quzanlı qəsəbəsində Avropa standartlarına cavab verən Olimpiya İdman Kompleksi tikilib istifadəyə verilmişdir. 2008-ci il yanvarın 17-də Prezident İlham Əliyev rayonun idmançı gəncləri üçün əvəzsiz hədiyyə olan idman kompleksinin açılış mərasimində bildirmişdi: "Ağdam rayonunda olmağımdan məmnunluq hissi keçirirəm. İki il bundan əvvəl biz sizinlə bərabər bu gözəl Olimpiya İdman Kompleksinin təməlini qoyduq və bu gün onun açılışında iştirak edirik.

Bu, çox əlamətdar bir hadisədir. Bu onu göstərir ki, bizim qəbul etdiyimiz bütün qərarlar vaxtında, özü də böyük peşəkarlıqla, yüksək səviyyədə yerinə yetirilir. Bu Olimpiya İdman Kompleksi beynəlxalq standartlara cavab verən bir idman qurğusudur. Azərbaycanda son illər ərzində müxtəlif bölgələrdə olimpiya idman kompleksləri tikilmişdir. Lakin ilk dəfədir ki, rayonlarda kənddə, - əslində indi qəsəbədir, amma biz kompleksin təməlini qoyanda Quzanlı kənd hesab olunurdu, - belə möhtəşəm Olimpiya İdman Kompleksi tikilmişdir. Bu onu göstərir ki, bölgələrin inkişafı, Azərbaycanın müxtəlif yerlərində, ən ucqar yerlərində yaşayan insanların şəraitinin yaxşılaşdırılması üçün, müasir infrastrukturun yaradılması üçün bütün tədbirlər görülür. Biz ölkəmizi hərtərəfli inkişaf etdiririk. İstəyirik ki, bütün bölgələr inkişaf etsin və hər bir yerdə, hər bir rayonda, hər bir qəsəbədə bütün lazımi şərait olsun".

Quzanlı qəsəbəsi düşmənlə təmas xəttinin on addımlığında olsa da, tez-tez burada mötəbər yarışlar keçirilir, həmişə qələbəlik olur. Ağdamın "Qarabağ" futbol komandası da artıq xeyli vaxtdır ki, yeni məkanda, doğma divarlar arasında oynayır, çoxsayı azarkeşlərinə ruh yüksəkliyi verir, qələbə sevinci yaşadır.

Atəşkəsin, demək olar ki, hər gün pozulduğu Ağdamda daş üstə qoyulan hər daşın, əkilən hər ağacın, tikilən hər binanın xüsusi mənası var. Hər şeydən əvvəl bu, dövlətin mövqeyidir, çətin şəraitdə yaşayan vətəndaşlarına münasibətin göstəricisidir. Ağdam rayonunun Quzanlı qəsəbəsinə təbii qazın verilməsi də əlamətdar hadisələrdən sayıla bilər. Azərbaycanın tarixində ilk dəfə olaraq, işğal altındakı rayonlar istisna olmaqla, hər bir rayona təbii qazın verilməsinə nail olunmuşdur. Xatırladaq ki, vaxtilə Ağdam-Quzanlı qaz kəməri vastəsilə qazdan istifadə edən qəsəbə Qarabağ müharibəsi nəticəsində uzun illər təbii yanacaqdan məhrum olmuşdu. Ölkə başçısının tapşırığı ilə Bərdə-Ağcabədi magistral qaz xəttindən çəkilən kəmər Quzanlı qəsəbəsində 450 abonentin qazla təminatına imkan vermişdir. 2008-ci il oktyabrın 4-də Prezident İlham Əliyev Ağdam rayonunun Quzanlı qəsəbəsinə təbii qazın verilməsi ilə əlaqədar keçirilən mərasimdə bildirmişdi: "Buraya qaz xəttinin çəkilməsi ilə həm insanların yaxşı yaşamasına şərait yaranacaq, həm də iqtisadi potensialın genişlənməsinə əlavə imkanlar olacaqdır. Mən çox istəyirəm ki, Ağdam rayonunun inkişafı daha da sürətlə getsin. Bildiyiniz kimi, bu məqsədlə müxtəlif tədbirlər görülür, əlavə vəsaitlər ayrılıbdır. Burada abadlıq işləri aparılır, yeni müəssisələrin yaradılması prosesi gedir, sosial obyektlərin, məktəblərin, tibb məntəqələrinin tikintisi davam etdirilir. Bütün bunlar insanlar üçündür. Azərbaycanın hər bir yerinə və xüsusilə işğaldan əziyyət çəkən bölgələrə daha da böyük diqqət göstərilməlidir. Bütün sosial problemlər öz həllini tapmalıdır, bütün infrastruktur layihələri uğurla icra edilməlidir. Buraya qaz xəttinin çəkilişi çox əlamətdardır".

Prezident İlham Əliyevin cəbhə bölgəsinə bəslədiyi xüsusi münasibət, göstərdiyi böyük qayğı və diqqət dövlətdə təmsil olunan ayrı-ayrı səlahiyyət sahibləri üçün də canlı örnəyə çevrilir, konkret nümunə olur. Bu baxımdan dövlət başçısının tapşırığı və tövsiyəsi ilə bölgədə, xüsusilə Ağdamda və Bərdədə görülən işlərin siyahısı kifayət qədər böyükdür. Qarqar çayı üzərində Ergiyə gedən yolda salınan körpünün əsl bayrama çevrilən açılışı hələ də yaddaşlardadır. Son beş ildə Ağdam rayonu ərazisində 35 kilometr yola asfalt örtük salınmış, 21 subartezian quyusu qazılmış, Quzanlı, Təzəkənd, İmamqulubəyli kəndlərində yeni məktəb binaları, Quzanlıda və Xındırıstanda uşaq bağçaları tikilib istifadəyə verilmiş, Quzanlı mədəniyyət evinin dam örtüyü yenidən vurulmuş, müasir istilik sistemi quraşdırılmışdır. Bütün bunlar görülən işlərin cüzi hissəsidir.

Quzanlı qəsəbəsinin sakini Afina Əliyeva bölgədə həyata keçirilən abadlıq-quruculuq işlərindən minnətdarlıqla danışır:

- Bütün xalqın sevimlisinə çevrilmiş Prezidentimizin qayğısı sayəsində yeni qəsəbədə, rahat mənzillərdə yaşayırıq. Allaha şükürlər olsun ki, əzablı, məşəqqətli günlərimiz artıq arxada qalıb. Uzun illər yayın istisini, qışın soyuğunu çadırlarda, qarğı-qamışdan tikilmiş daxmalarda, yük vaqonlarında yaşayan ağdamlılar xeyli vaxtdır ki, mənzil rahatlığına qovuşmuşlar.

"Azərbaycanda bir çadır şəhərciyi də qalmayacaqdır" deyən Prezident İlham Əliyev vədinə şərəflə əməl etdi. İndi hər cür rahatlığı, bağlı-bağçalı həyəti olan geniş və yaraşıqlı evlərdə yaşayırıq. Bu rahatlığı bizə bəxş edən sevimli rəhbərimizə həyatımız boyu minnətdarıq.

Ağdamın Təzəkənd kəndi cəbhə xəttində yerləşir. Bu kənd işğal olunmasa da, müharibədən ciddi zərər çəkib. Kəndə düşən çoxsaylı mərmilər evləri, sosial obyektləri dağıtmışdır. Müharibə məktəbdən də xətərsiz ötüşməyib. Lakin bu gün məktəbin vəziyyəti bambaşqadır. Təzəkənd məktəbinin direktoru Kubra Hüseynova dəyişiklikləri belə xatırlayır:

- Təsəvvürünüzə gətirin ki, məktəbdə normal bir sinif otağı da yox idi. Binanın çardağına mərmi düşmüşdü. Bəzi siniflərin qapı-pəncərəsi belə yerində deyildi. Olanı isə sınıq-salxaq idi. Valideynlər belə yararsız vəziyyətdə olan məktəbə uşaqlarını qoymurdular. Bu səbəbdən davamiyyət də zəif idi. Prezidentin tapşırığına əsasən, yaraşıqlı bir məktəb tikildi, müasir tipli istilik sistemi də quraşdırıldı. O günlərin şirin xatirəsi yaddaşımıza həkk olub. Prezidentin qayğısı sayəsində müəllimlər də, şagirdlər də əzab-əziyyətdən qurtulublar. Geniş, işıqlı və səliqəli siniflərdə dərs demək necə də xoşdur.

"Fərid-İnşaat" firması Qarabağda çox məşhurdur. Bölgədə göz oxşayan yaraşıqlı, milli memarlıq üslubunda inşa edilmiş diqqətçəkən binaların müəllifi məhz bu firmadır. Firmaya təcrübəli inşaatçı Sübhan Həsənov rəhbərlik edir. Təsadüfi deyil ki, bütün bölgədə ən möhtəşəm obyektlərin inşası bu firmaya etibar olunur. Müəssisənin ən uğurlu işlərindən biri Bərdədəki akademik Zərifə Əliyeva adına məktəb binasıdır. Məktəbin açılış mərasimindəki nitqində Prezident İlham Əliyev demişdir: "Bu məktəb görkəmli elm xadimi, gözəl həkim Zərifə Əliyevanın adını daşıyır. Mənim üçün ikiqat xoşdur ki, qədim Qarabağ torpağında Zərifə Əliyevanın adını daşıyan məktəb vardır, onun heykəli ucaldılıbdır. Zərifə Əliyeva böyük alim, çox peşəkar həkim idi. Amma eyni zamanda, o, xalqımızın ümummilli lideri Heydər Əliyevin həyat yoldaşı, onun sirdaşı, mənimsə anam idi. Mən sizə öz dərin minnətdarlığımı və təşəkkürümü bildirirəm. Bu məktəb çox yüksək səviyyədə tikilib və bütün müasir standartlara cavab verir. Əminəm ki, burada uşaqlar ən yüksək səviyyədə təhsil alacaqlar. Ümumiyyətlə, Azərbaycanda hər şey yüksək səviyyədə olmalıdır. Xüsusilə yeni məktəb və xəstəxana binaları ən yüksək səviyyədə inşa olunmalıdır. Burada ən yaxşı şərait yaradılıb, məktəbə gözəl, müasir avadanlıq verilibdir".

Məktəbin açılışı Bərdədə əsl el şənliyinə çevrilmişdi. Hamı fərəhlənir, adamların üz-gözündən sevinc yağırdı. O zaman bəlkə də hamıdan çox sevinən inşaat firmasının rəhbəri Sübhan Həsənov idi. Niyə də sevinməsin?! Axı onun gördüyü işə dövlət başçısı çox yüksək qiymət vermişdi. Necə deyərlər, hər şey gözəl alınmışdı. Bu çətin və məsuliyyətli sınaqdan qalib çıxan Sübhan Həsənov qəlbində məktəbin tikintisinin sifarişçilərinə hədsiz dərəcədə minnətdar idi. Ona görə ki, bu şərəfli işi - Zərifə xanımın adını daşıyacaq məktəbin inşasını ona etibar etmişdilər. Tikinti materiallarının ən yaxşısı, ən kefiyyətlisi tapılıb bu obyektə göndərilirdi. Sübhan Həsənov o günləri fərəhlə xatırlayır:

- Doğrusu, çox gərgin işləyirdik. Qarşımıza belə tələb qoyulmuşdu ki, hər şey akademik Zərifə xanımın adına layiq olmalıdır. Zəhmətimiz hədər getmədi. Respublika Prezidentinin bölgələrin sosial-iqtisadi inkişafı ilə bağlı tövsiyələrinin icrasını sürətləndirməyə çalışan insanlar istər Bərdədə, istərsə də Ağdamda abadlıq və tikinti sahəsində alqışa layiq çox iş gördülər. Biz inşaatçılar bu sifarişləri yerinə yetirməkdən hədsiz qürur duyuruq.

Akademik Zərifə Əliyevanın adını daşıyan məktəb bu gün ölkənin ən qabaqcıl təhsil ocaqlarından biridir. Məktəbin müəllimləri də, şagirdləri də bu təhsil ocağının açılışında Prezident İlham Əliyevin dəyərli tövsiyələrini, daha dəqiq desək, "Əminəm ki, bu məktəbdə oxuyacaq uşaqlar və dərs deyəcək müəllimlər bu təhsil ocağının qədrini biləcəklər" tapşırığını layiqincə yerinə yetirirlər. Məktəbin direktoru Rzaqulu Şərifov məlumat verir ki, keçən tədris ilində məktəbin məzunlarından 32 nəfəri yüksək bal toplayaraq respublikanın ən nüfuzlu ali məktəblərinə qəbul olunmuşdur. Bu tədris ilində isə, heç şübhəsiz, daha yüksək nəticə qazanılacaqdır. Rzaqulu müəllim onu da qürurla dilə gətirdi ki, 2007-2008-ci tədris ilində keçirilmiş "Ən yaxşı ümumtəhsil məktəbi" müsabiqəsinin qalibi olmuşlar. Bu böyük uğurun məntiqi davamı olaraq məktəb texniki fənlər təmayüllü məktəb-lisey adlandırılmışdır. Rzaqulu müəllim yaradılan nümunəvi şərait, göstərilən böyük qayğı və diqqət üçün respublika Prezidenti İlham Əliyevə minnətdarlığını bildirdi. Məktəbin araya-ərsəyə gəlməsində müstəsna əməyi olan insanlara xoş arzularını ünvanladı.

Son onilliklərdə böyük çətinliklər və məşəqqətlər yaşamış qaçqın və məcburi köçkünlərə davamlı dövlət qayğısını təmin edən ulu öndər Heydər Əliyev bu təbəqənin ən böyük xeyirxahı və səmimi dostu olmuşdur. Təqdirəlayiq haldır ki, ölkə rəhbəri cənab İlham Əliyev bu mərhəmət missiyasını layiqincə davam etdirir və bu gün köçkünlərin yaşayış şəraitinin yüksəlməsi, sosial vəziyyətinin yaxşılaşması üçün məqsədyönlü addımlar atır. Lakin ümummilli lider kimi, cənab Prezident də hər zaman vurğulayır ki, gərək hər bir dövlət məmuru bu təbəqədən olan insanların problemini öz problemi hesab etsin, onlara hər zaman kömək göstərsin. Bu gün Qarabağ bölgəsində, daim gərgin ab-havanın hökm sürdüyü cəbhə zonasında ulu öndər Heydər Əliyevin və Prezident İlham Əliyevin göstərişləri əməli işlə gerçəyə çevrilir, məcburi köçkünlərə himayədarlıq etməklə bağlı tövsiyələri isə tam şəkildə həyata keçirilir. Bu qayğı, diqqət insanlarda dövlətə inamı yüksəltməklə yanaşı, qələbəyə əminliyi də möhkəmləndirir.

Lazım QULİYEV

Azərbaycan.- 2009.- 15 iyul.- S. 3.