Seulda Azərbaycan-Koreya Respublikası İqtisadi Əməkdaşlıq Komissiyasının üçüncü iclası olmuşdur

İqtisadi İnkişaf Nazirliyinin mətbuat xidmətindən bildirmişlər ki, Seulda Azərbaycan-Koreya Respublikası İqtisadi Əməkdaşlıq Komissiyasının (İşçi qrup) üçüncü iclası keçirilmişdir.

Tədbirdə Azərbaycanı İqtisadi İnkişaf Nazirliyi Aparatının rəhbəri Samir Vəliyevin başçılıq etdiyi nümayəndə heyəti təmsil etmişdir.

İclasda 2007-ci ilin avqustunda Bakıda keçirilmiş görüşdən ötən dövrdə görülmüş işlər, ikitərəfli əlaqələrin mövcud vəziyyəti, qarşılıqlı səfərlərin iqtisadi əlaqələrə təsiri və gələcək əməkdaşlıq perspektivləri müzakirə edilmişdir.

Komissiyanın tərkibində yaradılmış 5 istiqamət - ticarət və investisiyalar, enerji və təbii ehtiyatlar, rabitə və informasiya texnologiyaları, tikinti və kənd təsərrüfatı sahələri üzrə komitələrin görüşləri də keçirilmiş, hər bir komitənin iclasları üzrə işçi protokollar imzalanmışdır.

Azərbaycan-Koreya Respublikası İqtisadi Əməkdaşlıq Komissiyasının üçüncü iclasının protokolu imzalanmış və növbəti iclasın 2010-cu ilin ikinci yarısında Bakıda keçirilməsi barədə razılıq əldə edilmişdir.

Səfər çərçivəsində Azərbaycan nümayəndə heyəti ölkənin bilik iqtisadiyyatı nazirinin birinci müavini Kim Yanq Hakla, habelə Azərbaycan-Koreya Mədəniyyət Mübadiləsi Assosiasiyasının həmsədri Li Su Hınqla görüşmüş, əməkdaşlığın genişləndirilməsi perspektivlərinə dair fikir mübadiləsi aparmışdır.

AzərTAc

Azərbaycan.- 2009.- 16 iyul.- S. 2.