Göygölün füsunkar təbiəti turistləri cəlb edir

Göygöldə istirahət etməyə üstünlük verən turistlərin sayı ötən illərlə müqayisədə xeyli çoxalıb.

Cari ildə rayonun gəzməli-görməli yerlərində 4800-dən çox turist olub. Ötən ilin müvafiq dövründə bu rəqəm 3550 nəfər təşkil edib. Rayonun mədəniyyət və turizm idarəsindən bildirilib ki, buna turist marşrutlarının maraqlı şəkildə müəyyənləşdirilməsi də səbəb olub.

Rayon mərkəzi Hacıkənd-Aşıqlı kəndi, Göygöl-Topalhəsənli-Zurnabat, Göygöl-Koşkü, Göygöl-Üçbulaq, Quşqara-Balçılı üzrə təyin edilən marşrutlar vasitəsilə turistlər rayonun gəzməli-görməli yerləri ilə tanış olur, onun qədim və maraqlı tarixini öyrənirlər. Turistlərin marağına ən çox iki əsrlik tarixi özündə əks etdirən Helendorf Cənnət Məkan İstirahət Mərkəzi, ikitağlı daş körpü, XII əsrə aid kurqanlar, 200 illik tarixə malik Lüteran kilsəsi, Toğana kəndində yerləşən "Qız qalası" abidəsi, Anaid və Müqəddəs Alban kilsələri, tunc dövrünə aid kurqanlar səbəb olur.

Azərbaycan.- 2009.- 16 iyul.- S. 3.