Məktəb tikintisi diqqət mərkəzindədir

Regionların sosial-iqtisadi inkişafı Dövlət Proqramına uyğun olaraq Masallı rayonunda 2004-2008-ci illərdə 16 məktəb tikilərək şagird və müəllimlərin ixtiyarına verilmişdir.
Bunlardan Yeddioymaq 1 və 2 saylı, Güllütəpə, Təzəkənd kənd orta məktəbləri Heydər Əliyev Fondunun, Mollaoba kənd orta məktəbi Yaponiya səfirliyinin, Təzə Alvadı, Lürən, Yeyənkənd kənd orta məktəbi, Əhmədli kənd əsas məktəbi, "Dəfinə" liseyi dövlət vəsaiti, qalan təhsil ocaqları isə daxili imkanlar hesabına inşa olunmuşdur. İstifadəyə verilmiş yeni məktəblərdə 4 mindən çox şagird təhsil alır. Müasir tələblərə cavab verən təhsil ocaqlarının hər birinin işıqlı sinif otaqları, fənn kabinetləri, kitabxanası, idman zalı, idman meydançası, istilik sistemi vardır. Onlar bütün lazımi avadanlıqlar, kompüter dəstləri ilə təchiz edilmişdir. Bunlarla bərabər, həmin müddətdə Masallı şəhər 1,3 saylı, Boradigah və Kalinovka kənd orta məktəbləri də əsaslı təmir olunmuşdur.

Artıq təhsil ocaqlarında dərs ili başa çatmışdır. Sinif otaqları müvəqqəti olaraq sükuta qərq olmuşdur. Lakin hər bir məktəb rəhbərinin yay dövründə də qayğısı az olmur. Masallıda şagirdləri yeni dərs ilində işıqlı, səliqəli, təmiz sinif otaqlarında qarşılamaq üçün əllərindən gələni əsirgəmirlər.

Rayonda məktəb tikintisi bu gün də davam etdirilir. Bambaşı kəndində 480, Hişkədərə kəndində 360, Babaser kəndində 220 şagird yerlik məktəb inşa olunur. İnşaatçılar işin sürəti ilə yanaşı, onun keyfiyyətinə də xüsusi diqqət yetirirlər.

Seyran CAVADOV

Azərbaycan.- 2009.- 16 iyul.- S. 3.