Azərbaycanlı alim XV Beynəlxalq "Neft, Enerji, Qaz" müsabiqəsinin laureatı oldu

Moskva Dövlət Şəkil Qalereyasında XV Beynəlxalq "Neft, Enerji, Qaz" müsabiqəsinin laureatlarının mükafatlandırılma mərasimi keçirilmişdir. Müsabiqənin təşkilatçısı Enerjijurnalistika üzrə Ümumrusiya İctimai Akademiyasıdır.

Müsabiqədə tərəfdaş kimi, Rusiya Federasiyası Dövlət Dumasının və federal xidmətlərin profil komitələri, nazirlik və komitələr, neft-qaz və energetika kampaniyaları, ictimai təşkilatlar çıxış etmişlər. Məqsəd Rusiya və onun hüdudlarından kənarda bu ölkənin Yanacaq-Energetika Kompleksinin (YEK) problemlərinə ictimaiyyətin, siyasi, işgüzar dairələrin, kütləvi informasiya vasitələrinin diqqətini cəlb etmək olmuşdur.

Müsabiqənin qalibləri 2008-ci il ərzində müxtəlif nəşrlərdə dərc edilmiş informasiyalar, məqalələr əsasında müəyyən edilmişdir. Müsabiqəyə təqdim edilən materiallar arasında YEK-nın bütün sahələrinə, o cümlədən neft və qaz hasilatı və elektrik enerjisi istehsalı, atom elektroenergetikası barədə materiallar öz əksini tapmışdır. Müsabiqənin keçirildiyi 14 il ərzində bura 4300 fərdi və kollektiv sifarişlər daxil olmuşdur. Sifarişçilər Rusiyanın 68 regionunu, Azərbaycan, Belarus, Qazaxıstan, Litva, Ukrayna və Estoniyanı təmsil etmişlər. Müsabiqə ənənəvi olaraq 12 nominasiya üzrə keçirilmişdir.

Birinci nominasiyada "Mətbuatda silsilə analitik və problemli materiallar üzrə" (beş məqalədən az olmamaqla) iqtisad elmləri namizədi, dosent, Azərbaycan Dövlət İqtisad Universitetinin doktorantı Şəfa Əliyev xüsusi prizə layiq görülmüşdür. Tədqiqatçı-alim bu müsabiqədə Rusiya Federasiyasının Azərbaycandakı səfirliyinin tövsiyəsi ilə iştirak etmişdir və müsabiqəyə Moskvanın nüfuzlu elmi jurnallarında dərc edilmiş məqalələrini göndərmişdir.

Qeyd edək ki, Şəfa Əliyev 80-dən çox elmi əsərin, bir neçə kitabın müəllifidir. 2008-ci ildə "Elm" nəşriyyatında onun "Xüsusi iqtisadi zonaların təşkili problemləri və inkişaf perspektivləri" mövzusunda monoqrafiyası dərc edilmişdir. 2008-2009-cu illərdə məhsuldar elmi yaradıcılıq fəaliyyəti göstərən tədqiqatçı-alim Ş.Əliyevin təkcə Rusiyanın müxtəlif nüfuzlu elmi jurnallarında və konfrans nəşrlərində 15-ə yaxın məqalə və məruzəsi çap olunmuşdur. Onu da deyək ki, bu elmi nəşrlərin coğrafiyası Rusiyanın bir çox regionlarını əhatə etmişdir (Moskva, Sankt-Peterburq, Omsk, Birobidcan, Volqoqrad, Maqnitoqorsk, Pyatiqorsk, Mahaçqala).

Tədqiqatçı-alimin fikrincə, Azərbaycan rəhbərliyinin apardığı uğurlu iqtisadi siyasətin beynəlxalq aləmdə öz əksini tapması üçün alimlər də var qüvvə ilə çalışıb öz sözlərini deməlidirlər.

Azərbaycan.- 2009.- 16 iyul.- S. 3.