Böyük Britaniya Azərbaycan üçün mühüm ölkə, strateji tərəfdaşdır

Xəbər verdiyimiz kimi, Azərbaycan Respublikasının Prezidenti İlham Əliyev iyulun 12-dən 15-dək Böyük Britaniya və Şimali İrlandiya Birləşmiş Krallığında rəsmi səfərdə olmuşdur.

İyulun 13-də dövlətimizin başçısı Londonda məşhur siyasətçilərin, diplomatların, mətbuat nümayəndələrinin, Avropanın tanınmış publisistləri və ictimai xadimlərinin üzvü olduqları Kral Beynəlxalq Münasibətlər İnstitutunda görüş keçirmişdir.

Prezident İlham Əliyevi binanın önündə Böyük Britaniya və Şimali İrlandiya Birləşmiş Krallığının Cənubi Qafqaz üzrə xüsusi nümayəndəsi ser Brayn Fol qarşıladı.

Ser Brayn Fol görüşü açaraq, Azərbaycan Prezidentini təqdim etdi.

Azərbaycan Prezidentini burada görməkdən məmnun olduğunu bildirən Brayn Fol dedi ki, Prezident İlham Əliyev Azərbaycanın xarici siyasətindən danışacaq və görüş iştirakçılarını maraqlandıran suallara cavab verəcəkdir.

Prezident İlham Əliyev görüşdə "Azərbaycan üçün xarici siyasət çağırışları" ("Foreign policy challenges for Azerbaijan") mövzusunda çıxış etdi.

Azərbaycan.- 2009.- 17 iyul.- S. 1.