ATƏT və Azərbaycan arasında əməkdaşlıq inkişaf edir

Ədliyyə Nazirliyinin mətbuat xidmətindən bildirmişlər ki, iyulun 16-da ədliyyə naziri, Məhkəmə-Hüquq Şurasının sədri Fikrət Məmmədov ATƏT-in baş katibi, səfir Mark Perrin de Brişambo ilə görüşmüşdür.

Azərbaycan və ATƏT arasında münasibətlərin dinamik inkişaf etdiyini bildirən nazir Prezident İlham Əliyevin rəhbərliyi ilə ədliyyə və məhkəmə sisteminin müasirləşdirilməsi sahəsində ölkədə həyata keçirilmiş kompleks tədbirlər, Ədliyyə Akademiyasının fəaliyyətinin təşkili barədə məlumat vermiş, ATƏT-lə əməkdaşlıqda görülmüş işlərin, xüsusilə hakim və hakimliyə namizədlərlə aparılan tədris məşğələlərinin, o cümlədən səhnələşdirilmiş məhkəmə formatında keçirilən təlimlərin əhəmiyyətini vurğulamışdır.

ATƏT-lə Azərbaycan arasında geniş əlaqələrin olduğunu deyən cənab Mark Perrin de Brişambo qanunun aliliyinin təşviqinin əhəmiyyətini vurğulayaraq, bu istiqamətdə açıq və səmərəli əməkdaşlığa görə minnətdarlığını bildirmişdir. Baş katib Azərbaycanın Avropada ən müasir penitensiar sistemin yaradılmasına doğru irəlilədiyini, qabaqcıl beynəlxalq standartlara uyğun tikilmiş Bakı istintaq təcridxanasının buna bariz nümunə olduğunu, bu sahədə şəffaflığın və aşkarlığın mövcudluğunu məmnunluqla qeyd etmişdir.

Görüşdə demokratik cəmiyyətdə müstəsna əhəmiyyəti olan inzibati məhkəmələrin ölkəmizdə yaradılması təqdir edilmiş, məhkəmə monitorinqlərinin aparılmasına dair tədbirlər, habelə əməkdaşlığın inkişafı üçün geniş perspektivlərin olduğu vurğulanmış, qarşılıqlı fəaliyyətə dair konkret təkliflər səslənmişdir.

AzərTAc

Azərbaycan.- 2009.- 17 iyul.- S. 3.