Respublikamızın səfalı
guşələrindən olan Lənkəranın bir tərəfi
Xəzərdirsə, digər tərəfi yaşıl
libaslı, buz bulaqlı, gur şəlaləli dağlar, sitrus
meyvəli bağlardır. Nadir dəmirağac, palıd,
cökə, nil, akasiya ağacları, al-əlvan güllər-çiçəklər
bu yurda əzəmət gətirir, özgə gözəllik
verir. Bu gözəlliklərin
şəninə neçə-neçə şeirlər
yazılıb, nəğmələr
bəstələnib.
Dağlar, meşələr
qoynunda qərar tutan Xanbulançay su dəryaçası Lənkəranın
nadir incilərindəndir. Flora və faunası ilə zəngin
olan Hirkan Milli Parkı, 90 yaşı tamam olan
Qızılağac qoruğu açıq səma altında
canlı muzeylərdir. Rayon ərazisində 87 tarix və mədəniyyət
abidəsi mövcuddur. "Dairəvi Qala" (Zindan), Şeyx
Zahid türbəsi, Seyid Xəlifə türbəsi, Kiçik
Bazar məscidi, Lənkəran Mayakı, Mir Əhməd
xanın yaşayış evi və digər tarixi abidələr
buranın Azərbaycanın qədim yaşayış məskənlərindən
biri olduğunu göstərir. Son illər həmin abidələrin,
demək olar ki, hamısında təmir-bərpa işləri
aparılmışdır. Abidələr haqqında
üç dildə - Azərbaycan, ingilis və rus dillərində
məlumatlar hazırlanmışdır. Tarix-Diyarşünaslıq
Muzeyində rayonun abidələrini, zəngin tarixi şəxsiyyətlərinin
həyat və fəaliyyətlərini əks etdirən
çox sayda qiymətli əşyalar, eksponatlar qorunub
saxlanılır. Muzeyin üçüncü mərtəbəsində
"Mədəni irsimiz və turizm" guşəsi
yaradılmışdır. Ümumiyyətlə, bu torpaqda
turizmin bütün növlərinin inkişafı üçün
hər cür şərait vardır və bu istiqamətdə
rayonda ardıcıl iş aparılır. Hazırda burada 2
turist firma təşkilatı fəaliyyət göstərir. 9
iri xidmət obyekti - "Xanbulan", "Palıdlı
sahil", "Bəşəri" istirahət mərkəzləri,
"Qala", "Qızıl tac", "Dalğa",
"Xəzər" hotelləri, Mamusta qonaq evi, Hirkan xidmət
kompleksi ilboyu turistlərin xidmətindədir. Göyşaban
dairəsində yaradılmış sənətkarlıq
şəhərciyi mahiyyət etibarilə yüz illlər, min
illər bundan qabaqkı adət-ənənələrimizi
özündə əks etdirir. Burada açılmış
Turizm İnformasiya Mərkəzi bölgədə sahənin
inkişafında mühüm rol oynayacaqdır. Rayonda əl sənəti
nümunələrini yaratmaq üçün bir sıra tədbirlər
görülüb.
Dulusçuluq və həsirtoxunma
ilə məşğul olanların siyahısı dəqiqləşdirilib.
Separadi kənd sakini Zahid Əkbərov gil və torpaqdan nehrə,
bardaq, manqal düzəltməkdə, Kənarmeşə kənd
sakini Nargilə Qənbərova xalça toxumaqda,
xalçalara portretlər salmaqda, Şağlaser kənd sakini
Xanım Baxşıyeva həsir toxumaqda mahirdirlər.
Lənkəran Şəhər
İcra Hakimiyyəti turizmin inkişafı ilə bağlı
kompleks tədbirlər görür. Şəhər bir
neçə il ərzində tanınmaz dərəcədə
dəyişmiş, demək olar ki, yenidən qurulmuşdur. Ulu
öndərin adını daşıyan Heydər Əliyev
adına xatirə parkı özü ayrıca şəhəri
xatırladır. Buradakı fəvvarələr yayın isti
günlərində sərinlik gətirir, müasir
işıqlandırma sistemi ətrafı çıraqban edir.
Parkda ümummilli liderin adını daşıyan muzey fəaliyyət
göstərir. Bundan əlavə, bir sıra yerlərdə də
parklar, xiyabanlar salınmış, istirahət güşələri
yaradılmışdır.
Ekoturizmin inkişafı
ilə bağlı kəndlərdə münasib məişət
şəratinə malik olan ev sahiblərinin
razılığı əsasında turistlərin qəbulu
istiqamətində də işlər aparılır. Lənkəran
hava limanından, dəmiryolu və avtomobil vağzalından, dəniz
limanından, Hirkan Milli Parkından turizmin inkişafında səmərəli
istifadə edilməsi planlaşdırılmış,
balıqçılıq və ovçuluq həvəskarı
olan turistlər üçün
razılaşdırılmış ərazilərdə ov
mövsümünün təşkili nəzərdə
tutulmuşdur.
Lənkəran rayonu ərazisində
fəaliyyət göstərən istirahət mərkəzlərindən
biri "Qafqaz" sahil hotelidir. Burada hər bir şərait
ideal səviyyədə yaradılmışdır. Səliqə-sahman,
təmizlik göz oxşayır. Dənizlə hotel arasında
cəmi 50 metr məsafə var. Turistlər bol günəş
qəbul etməklə yanaşı, Xəzərin göz
yaşı kimi dupduru suyunda çimir, bədənlərini
möhkəmləndirir, dincəlirlər. Hotelin geniş ərazisində
uşaqlar üçün şəhərcik
salınmış, müxtəlif qurğular
quraşdırılmışdır. Baş menecer Mehmet
Sözenin dediklərindən məlum oldu ki, 40 nəfərin
çalışdığı hotel il boyu fəaliyyət
göstərir. "Qafqaz" sahil hotelinin əsas binası
ikimərtəbəlidir. 19 adi, 4 lüks, 1 senyor-suita nömrəsi,
18 koteci, 42 ümumi nömrəsi, 1 restoranı, 2 kafesi, idman
zalı və saunası var.
Ailəsi ilə
"Qafqaz" sahil hotelində dincələn Bakı şəhər
sakini Tahir Məmmədov buradakı şəraitdən və
xidmətdən razılığını bildirdi. Dedi ki,
bundan əvvəl Qəbələdəki "Qafqaz"
istirahət mərkəzində dincəlib. Hər ikisi
yaxşıdır və hər birinin öz yeri var. Buradakı
üstünlük bircə dənizin olmasıdır. Şəraitə,
təmiz havaya, göstərilən xidmətə həm orada,
həm də burada söz ola bilməz.
"Palıdlı
sahil" Lənkəran şəhərinin
yaxınlığındakı Sitəmurdov kəndində yerləşir.
Bura palıdlı meşə zolağı ilə dənizin təmasda
olduğu məkandır. Buna görə də istirahət mərkəzi
"Palıdlı sahil" adlandırılıb. Burada da mənalı
istirahət üçün bütün şərait
yaradılıb. Dənizdə çimmək, balıq ovu,
faytonda gəzinti, Lənkəranın görməli yerlərinə,
bölgədəki ziyarətgahlara səyahət unudulmaz anlar
yaşadır, xoş təəssüratlar oyadır. "Palıdlı
sahil"ə hər il yay tətili günlərində məktəblilər,
o cümlədən Qarabağ əlilləri və şəhid
ailələrinin uşaqları gəlirlər.
Bir sözlə, Lənkəranda
turizm sürətlə inkişaf edir, bura gələnlərin
sayı ildən-ilə çoxalır.
Seyran CAVADOV
Azərbaycan.-2009.- 17 iyul.- S. 6.
