Pirhəsənli böyük abadlıq dövrünü yaşayır

Bir az qəribə səslənsə də, bu kənddə görülən bütün işlər göz qabağındadır. Ağsu aşırımını arxada qoyan magistral yolun yolçuları Pirhəsənlidən keçib gedir və ya əksinə - bu kəndin içindən üzü Ağsu aşırımına, Bakıya tərəf yollanırlar. Bu kənddə dayanıb yol soruşan da olur, bir udumluq su istəyən də. Pirhəsənlilərin qonaqpərvərliyi ilk ünsiyyətdəncə diqqəti çəkir. Fikirləşirsən ki, nə yaxşı kənddir - özü də, adamları da.

Nahaq yerə demirlər ki, kəndin abadlığı yolundan bəlli olur. Pirhəsənlinin də kəndarası yolları asfaltlaşdırıldığına görə gediş-gəliş üçün heç bir problem qalmayıb. Kəndin qaz, işıq xətləri dəyişdirilərək təzələnib. Keçən rabitə şöbəsi üçün yeni bina tikilib, istifadəyə verilib. Poçt binasının tikintisi isə davam edir. Pirhəsənlinin baxımlı və abad görkəminə yaraşıq verən yeni tikililərdən ən möhtəşəmi 360 şagird yerlik orta məktəb binasıdır. Bina dövlət vəsaiti hesabına inşa edilib. Sözsüz ki, hər cür ləvazimat və avadanlıqla təmin edlmiş müasir məktəb binası keyfiyyətli tədris üçün böyük imkan və şərait deməkdir.

Söhbət zamanı Ağsu Rayon İcra Hakimiyyətinin başçısı Ənvər Seyidəliyev bir məqamı xüsusi vurğuladı ki, rayonda sahibkarlığın, özəl bölmənin inkişafına qayğı və diqqət yetirildiyi üçün vaxtilə bu yerlərdən, o cümlədən Pirhəsənlidən iş dalınca çıxıb getmiş gənclər də artıq böyük həvəslə öz elinə-obasına qayıdıb müəyyən bir işin qulpundan yapışırlar. Qeyd etmək yerinə düşər ki, son beş ildə Ağsuda 3109-u daimi olmaqla 5916 iş yeri açılmışdır. Ötən il isə 518 nəfər işlə təmin olunmuşdur. Həmin iş yerlərinin 104-ü daimidir. Pirhəsənli rayon mərkəzinə yaxın olduğuna görə elə Ağsunun özündə çalışan kənd sakinləri də çoxdur. Kənddən o qədər də uzaq olmayan bir ərazidə tikilən Azərbaycan-Almaniya birgə müəssisəsinin şirə və şərab emalı zavodunun da istifadəyə verilməsinə az qalıb. Zavodda çalışacaq 350 nəfər işçinin sırasında pirhəsənlilərin də olacağı şübhəsizdir.

Kənd əhalisinin Dünya Səhiyyə Təşkilatının normalarına uyğun içməli su ilə təmin edilməsi üçün respublika Ekologiya və Təbii Sərvətlər Nazirliyinin dəstəyi ilə Pirhəsənlidə modul tipli sutəmizləyici qurğunun tikilməsi planlaşdırılıb.

Pirhəsənlidə kənd əhalisinin əsas məşğuliyyəti əkinçilik və maldarlıqdır. Fərdi təsərrüfatlar da bu sahələrə, həmçinin taxılçılığa ciddi önəm verirlər. Kəndin icra nümayəndəsi Rövşən Mütəllimov bildirdi ki, əkib-becərmək üçün hər cür şərait yaradılıb. Yerli sahibkarlardan Mütəllim Mütəllimov həm heyvandarlıqla, həm də əkinçiliklə məşğul olur. Balacaxan Cəfərquliyev və Vəzir Cəfərquliyev də gün-güzəranlarını bu sahələrə bağlayıblar. İstehsal etdikləri məhsulun sərbəst bazara çıxmağında elə bir çətinlikləri olmur.

İşgüzar Pirhəsənli əhalisi kəndləri ilə bağlı daha bir xoş xəbər alıb: Pirhəsənlidə yeni mədəniyyət evinin tikilməsi planlaşdırılıb. Yaxın vaxtlarda işin icrasına başlanılacaq.

Telman NƏZƏRLİ

Azərbaycan.- 2009.- 18 iyul.- S. 2.